ໃນ 1 ປີຜ່ານມາ ການພັດທະນາເສດຖະກິດຂອງເມືອງຫີນເຫີບ, ແຂວງວຽງຈັນ ເຫັນວ່າ ມີການສືບຕໍ່ຂະຫຍາຍຕົວຢ່າງຕໍ່ເນື່ອງ ຕາມເງື່ອນໄຂ ແລະ ທ່າແຮງທີ່ມີ ເປັນຕົ້ນແມ່ນໃນຂົງເຂດກະສິກຳ-ປ່າໄມ້, ອຸດສາຫະກໍາປຸງແຕ່ງ, ອຸດສາຫະກໍາ-ການຄ້າ ແລະ ການບໍລິການ ສາມາດປະກອບສ່ວນໃຫ້ແກ່ການເຕີບໂຕຂອງລວມຍອດຜະລິດຕະພັນພາຍໃນໄດ້ເປັນຢ່າງດີ.
ທ່ານ ວອນ ວໍລະສານ ຄະນະປະຈໍາພັກເມືອງ, ຮອງເຈົ້າເມືອງໆຫີນເຫີບ ໄດ້ກ່າວໃນຮ່າງບົດລາຍງານຫຍໍ້ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 1 ປີຜ່ານມາ ແລະ ທິດທາງແຜນການປີ 2018 ຕໍ່ກອງປະຊຸມຄົບຄະນະບໍລິຫານງານພັກເມືອງຫີນເຫີບ ຄັ້ງທີ 9 ສະໄໝທີ 3 ທີ່ໄດ້ຈັດຂຶ້ນໃນເມື່ອບໍ່ດົນ ຜ່ານມານີ້, ທີ່ສະໂມສອນໃຫຍ່ຂອງເມືອງວ່າ: 1 ປີ ຜ່ານມາສາມດບັນລຸມູນຄ່າທາງດ້ານເສດຖະກິດໄດ້ທັງໝົດ 452 ຕື້ກວ່າກີບ, ລວມຍອດຜະລິດຕະພັນພາຍໃນ(GDP)ຂະຫຍາຍຕົວ 10,33%, ເພີ່ມຂຶ້ນ 2,27%, ສະເລ່ຍໃສ່ຫົວຄົນໄດ້ 13 ກວ່າກີບຕໍ່ຄົນຕໍ່ປີ,ດ້ານກະສິກຳ-ປ່າໄມ້ ປະຕິບັດໄດ້ 54 ຕື້ກວ່າກີບ, ສະເລ່ຍເຂົ້າກິນປະຕິບັດໄດ້ 370 ກິໂລກຣາມ ຕໍ່ຄົນຕໍ່ປີ, ດ້ານອຸດສາຫະກໍາ ແລະ ພະລັງງານບໍ່ແຮ່ປະຕິບັດໄດ້ 390 ຕື້ກວ່າກີບ, ດ້ານການບໍລິການອື່ນໆປະຕິບັດໄດ້ 15 ຕື້ກ່ວາກີບ, ການພັດທະນາພື້ນຖານໂຄງລ່າງດ້ານການລົງທຶນຂອງພາກລັດ ແລະ ເອກະຊົນພາຍໃນ, ຕ່າງປະເທດ ແລະ ການຊ່ວຍເຫຼືອລ້າຂອງອົງການສາກົນມີມູນຄ່າລວມ 2 ຕື້ກວ່າກີບ, ໃນນີ້ການລົງທຶນຂອງລັດຖະບານມີ 9 ໂຄງການ ມີມູນຄ່າ 1 ຕື້ກວ່າກີບ ແລະ ການຊ່ວຍເຫຼືອລ້າຂອງອົງການສາກົນ ມີມູນຄ່າ 1 ຕື້ກວ່າກີບ, ການເກັບລາຍຮັບເຂົ້າງົບປະມານຂອງເມືອງ ສາມາດບັນລຸໄດ້ 2 ຕື້ກວ່າກີບ, ລື່ນຄາດໝາຍ 134 ກວ່າ%, ສາມາດປຸກລະດົມເງິນຝາກໄດ້ທັງໝົດ 17 ຕື້ກວ່າກີບ, ທຽບໃສ່ແຜນການປີປະຕິບັດໄດ້ 370% ແລະ ສາມາດປ່ອຍເງິນກູ້ໄດ້ທັງໝົດ 4 ຕື້ກວ່າກີບ, ທຽບໃສ່ແຜນການປີປະຕິບັດໄດ້ 139%.
ທ່ານ ວອນ ວໍລະສານ ຄະນະປະຈໍາພັກເມືອງ,ຮອງເຈົ້າເມືອງໆຫີນເຫີບ ຍັງໄດ້ລາຍງານຕື່ມອີກວ່າ: ໃນປີ 2018 ນີ້ ເມືອງຫີນເຫີບ ຈະສູ້ຊົນສ້າງລາຍຮັບຈາກຜະລິດຕະພັນພາຍໃນໃຫ້ໄດ້ທັງໝົດ 468 ຕື້ກວ່າກີບ ແລະ ຈັງຫວະການຂະຫຍາຍຕົວຂອງ(GDP) ໃຫ້ໄດ້ລະດັບສະເລ່ຍ 10,5%, ຮັບປະກັນເຂົ້າກິນໃຫ້ໄດ້ 380 ກິໂລກຣາມຕໍ່ຄົນຕໍ່ປີ, ໃນນັ້ນຂົງເຂດກະສິກໍາ-ປ່າໄມ້ ໃຫ້ໄດ້ມູນຄ່າ 28 ຕື້ກວ່າກີບ, ຫຼືເທົ່າກັບ 6%, ຂົງເຂດອຸດສາຫະກຳ ແລະ ການຄ້າໃຫ້ໄດ້ 299 ຕື້ກວ່າກີບ, ຫຼື ເທົ່າກັບ 64%, ຂົງເຂດການບໍລິການໃຫ້ໄດ້ 11 ຕື້ກວ່າກີບ, ຫຼືເທົ່າກັບ 2,5% ແລະ ຈະຍາດແຍ່ງທຶນຮອນເຂົ້າໃນການພັດທະນາມາຈາກ 3 ແຫຼ່ງທຶນ ຄື: ຍາດແຍ່ງການລົງທຶນຂອງລັດ ແລະ ການຊ່ວຍເຫຼືອລ້າໃຫ້ໄດ້ 9 ຕື້ກວ່າກີບ, ຫຼື ເທົ່າກັບ 2%, ດຶງດູດການລົງທຶນຂອງເອກະຊົນພາຍໃນ ແລະ ຕ່າງປະເທດໃຫ້ໄດ້ 7 ຕື້ກວ່າກີບ ແລະ ດຶງດູດການລົງທຶນຂອງປະຊາຊົນໃຫ້ໄດ້ 112 ຕື້ກວ່າກີບ, ຫຼື ເທົ່າກັບ 24%, ຈະສູ້ຊົນເກັບລາຍຮັບເຂົ້າງົບປະມານຂອງເມືອງໃຫ້ໄດ້ທັງໝົດ 2 ຕື້ 200 ລ້ານກວ່າກີບ.
ໃຫ້ກຽດເຂົ້າຮ່ວມກອງປະຊຸມຄົບຄະນະບໍລິຫານງານພັກເມືອງຫີນເຫີບ ຄັ້ງທີ 9 ສະໄໝທີ 3 ນີ້ ໂດຍແມ່ນ ທ່ານ ທອງສະຫວັນ ວົງສຳພັນ ຄະນະປະຈຳພັກແຂວງ, ປະທານແນວລາວສ້າງຊາດແຂວງວຽງຈັນ, ມີທ່ານ ອຸດົງ ວົງສະຫວາດ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆຫີນເຫີບ, ມີບັນດາຄະນະປະຈໍາ, ກຳມະການພັກເມືອງ, ເລຂາໜ່ວຍພັກສຳນັກງານຫ້ອງການ,ໂຮງຮຽນ,ໂຮງໝໍ,ພ້ອມດ້ວຍເລຂາພັກບ້ານ ທົ່ວເມືອງເຂົ້າຮ່ວມ.
Editor: ກຳປານາດ ລັດຖະເຮົ້າ
