ເມື່ອບໍ່ດົນມານີ້, ກົມອົບຮົມຊາວຫນຸ່ມ ສູນກາງຊາວຫນຸ່ມ ປະຊາຊົນ ປະຕິວັດລາວ ໄດ້ຈັດພິທີປາຖະກາຖາ ຂື້ນ ພາຍໃຕ້ຫົວຂໍ້ວ່າ: ວັນຜ່ານວົງປິດລ້ອມ ຂອງກອງພັນທີ 2 ວິລະຊົນທົ່ງໄຫຫິນ ຊຽງຂວາງ ຄົບຮອບ 59 ປີ (18/05/1959-18/05/2018) ແລະ ວັນວິລະກໍາໂຕນຄຸກ ຢ່າງມະຫັດສະຈັນ ຂອງບັນດາຜູ້ນໍາພັກ, ຜູ້ນໍາແນວລາວສ້າງຊາດ ຄົບຮອບ 58 ປີ. ( 24/05/1960-24/05/2018) ເຊີ່ງທັງສອງວັນ ແມ່ນເປັນວັນທີ່ມີຄວາມຫມາຍສໍາຄັນທາງປະຫວັດສາດຂອງລາວ. ພິທີປາຖະກາຖາ ດັ່ງກ່າວ ໄດ້ຈັດຂື້ນທີ່ຫ້ອງປະຊຸມ ສູນກາງຊາວຫນຸ່ມ ປະຊາຊົນ ປະຕິວັດລາວ ໂດຍການເປັນປະທານໃນການປາຖະກາຖາ ຄັ້ງນີ້ ແມ່ນ ທ່ານ ພົນຈັດຕະວາ ທອງເຄນ ອ່ອນລະວົງ ພະນັກງານບໍານານ ອະດິດຮອງປະທານສະຫະພັນນັກຮົບເກົ່າແຫ່ງຊາດລາວ. ເຂົ້າຮ່ວມຮັບຟັງ ມີ ທ່ານນາງ ວິລະວອນ ພັນທະວົງ ຮອງເລຂາຄະນະບໍລິຫານງານ ສູນກາງຊາວຫນຸ່ມ ປະຊາຊົນ ປະຕິວັດລາວ, ມີ ທ່ານ ບຸນຕາ ເທບພະວົງ ຮອງເລຂາ ຄະນະບໍລິຫານງານຊາວຫນຸ່ມ ປະຊາຊົນ ປະຕິວັດລາວ, ມີບັນດາສະມາຊິກຊາວຫນຸ່ມ, ພະນັກງານລັດຖະກອນ ອ້ອມຂ້າງສູນກາງຊາວຫນຸ່ມ ເຂົ້າຮ່ວມ ຢ່າງພ້ອມພຽງ
ຈຸດປະສົງຫລັກ ໃນການປາຖະກາຖາ 2 ວັນປະຫວັດສາດ ເພື່ອເສີມຂະຫຍາຍມູນເຊື້ອອັນດີງາມຂອງວັນປະຫວັດສາດ ເປັນການນໍາເອົາບົດຮຽນ ນໍາເອົາມາຝຶກຝົນຫລໍ່ຫລອມ ໃຫ້ແກ່ພະນັກງານ-ລັດຖະກອນ ທົ່ວສູນກາງຊາວຫນຸ່ມ ປະຊາຊົນ ປະຕິວັດລາວ ໃຫ້ເປັນຂະບວນຟົດຟື້ນ, ເປັນການເພີ່ມທະວີໃຫ້ຊາວຫນຸ່ມລາວ ໄດ້ຮັບຮູ້ ແລະ ເຂົ້າໃຈເລີກເຊີ່ງ ເຖິງມູນເຊື້ອປະຫວັດສາດ ກໍ່ຄືວັນສໍາຄັນທັງ 2 ວັນດັ່ງກ່າວ. ພ້ອມກັນນັ້ນ ຍັງເປັນການປຸກຈິດສໍານຶກໃຫ້ຊາວຫນຸ່ມລາວ ໄດ້ສຶບທອດເອົາສີ່ງຍອດຍິ່ງ ແລະ ແນວຄິດ ຂອງຜູ້ນໍາລາວ ທີ່ສະຫລາດສ່ອງໃສ ປະກອບສ່ວນເຂົ້າໃນການພັດທະນາປະເທດຊາດ ໃຫ້ຈະເລີນຮຸ່ງເຮືອງສີວິໄລ ໄປເລື້ອຍໆ.
Editor: ກຳປານາດ ລັດຖະເຮົ້າ
