ຄະນະ ແລະ ວິຊາການໂຮງໝໍເມືອງ 2 ຈາກນະຄອນໂຮ່ຈີ່ມິງ ສາທາລະນະລັດ ສັງຄົມນິຍົມ ນໍາໂດຍ ທ່ານ ວັນ ດຶກ ຮອງຫົວໜ້າອໍານວຍການໂຮງໝໍເມືອງ 2 ນະຄອນໂຮ່ຈີ່ມິງ ສາທາລະນະລັດ ສັງຄົມນິຍົມຫວຽດນາມ ພ້ອມຄະນະ ສົມທົບກັບສະມາຄົມຂັ້ນແຂວງ, ຂັ້ນເມືອງ ຈັດກິດຈະກຳນຳພາທີມແພດຈາກໂຮງໝໍເຂດ 2 ນະຄອນໂຮ່ຈີ່ມິງ ລົງກວດພະຍາດ ແລະ ຈ່າຍຢາໂດຍບໍ່ເສຍຄ່າ ໃຫ້ກັບປະຊາຊົນພາຍໃນເມືອງທ່າແຕງ, ແຂວງເຊກອງ ໂດຍຈັດຂຶ້ນທີ່ໂຮງໝໍເມືອງ ເຊິ່ງໃຫ້ກຽດເຂົ້າຮ່ວມຂອງ ທ່ານ ຄໍາສອນ ກອນເຍີ ເຈົ້າເມືອງ-ເມືອງທ່າແຕງ, ມີບັນດາພະແນກການ, ຂະແໜງການທີ່ກ່ຽວຂ້ອງຂັ້ນແຂວງ-ເມືອງ ພ້ອມດ້ວຍທີມງານແພດໝໍທາງສອງຝ່າຍ ແລະ ພໍ່-ແມ່ປະຊາຊົນເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ວັນ ດຶກ ຮອງຫົວໜ້າອໍານວຍການໂຮງໝໍເມືອງ 2 ນະຄອນໂຮ່ຈີ່ມິງ ສາທາລະນະລັດ ສັງຄົມນິຍົມຫວຽດນາມ, ໄດ້ຂຶ້ນກ່າວຄວາມເປັນມາຂອງການຈັດກິດຈະກໍາຄັ້ງນີ້ ໂດຍໄດ້ສົມທົບກັບທຸກພາກສ່ວນຂັ້ນແຂວງ-ເມືອງ ຈັດໃຫ້ມີກິດຈະກຳໜ່ວຍແພດເຄື່ອນທີ່ມິດຕະພາບເພື່ອສຸຂະພາບ ເພື່ອເຮັດການກວດສຸຂະພາບ ແລະ ປິ່ນປົວພະຍາດ, ຈ່າຍຢາ ພ້ອມທັງມອບເຄື່ອງຈໍານວານໜຶ່ງ ໂດຍບໍ່ເສຍຄ່າ ໃຫ້ກັບປະຊາຊົນເມືອງທ່າແຕງ, ແຂວງເຊກອງ ເພື່ອຊ່ວຍເຫຼືອ ແລະ ບັນເທົາທຸກໃຫ້ແກ່ປະຊາຊົນຜູ້ມີບັນຫາດ້ານສຸຂະພາບໄດ້ສາມາດເຂົ້າເຖິງການບໍລິການປິ່ນປົວໂດຍບໍ່ເສຍຄ່າໃຊ້ຈ່າຍ ແລະ ພ້ອມກັນນັ້ນກໍ່ຍັງເປັນການແລກປ່ຽນຮຽນຮູ້, ເສີມສ້າງຄວາມສາມາດທາງດ້ານວິຊາການໃຫ້ແກ່ພະນັກງານ-ແພດໝໍຂອງໂຮງໝໍເມືອງ ທ່າແຕງ ໃຫ້ດີຂຶ້ນເລື້ອຍໆ.
ສຳລັບງົບປະມານທີ່ນຳໃຊ້ເຂົ້າໃນກິດຈະກຳຄັ້ງນີ້ ແມ່ນໄດ້ຮັບການຊ່ວຍເຫຼືອຈາກໂຮງໝໍເມືອງ 2 ນະຄອນໂຮ່ຈີ່ມິງ ສາທາລະນະລັດ ສັງຄົມນິຍົມຫວຽດນາມ ຮ່ວມກັບ ບໍລິສັດ ຄູນມີໄຊ ປະຈໍາເມືອງທ່າແຕງ, ແຂວງເຊກອງ ລວມມູນຄ່າທັງໝົດ 304 ລ້ານ 7 ແສນກວ່າດົ້ງ ຫຼືເທົ່າກັບ 115 ລ້ານກີບ.
ໂອກາດດັ່ງກ່າວ ທ່ານ ຄໍາສອນ ກອນເຍີ ເຈົ້າເມືອງທ່າແຕງ ໄດ້ກ່າວສະແດງຄວາມຂອບໃຈ ຕໍ່ ທ່ານ ວັນ ດຶກ ຮອງຫົວໜ້າອໍານວຍການໂຮງໝໍເມືອງ 2 ນະຄອນໂຮ່ຈີ່ມິງ ພ້ອມຄະນະ ແລະ ທຸກພາກສວ່ນກ່ຽວຂ້ອງຂັ້ນແຂວງ-ເມືອງ ທີ່ໄດ້ຈັດກິດຈະກຳຄັ້ງນີ້ຂຶ້ນ ເຊິ່ງເປັນການຢັ້ງຢືນໃຫ້ເຫັນເຖິງການເສີມສ້າງສາຍພົວພັນຮ່ວມມືອັນໃກ້ຊິດ ແລະ ສະໜິດສະໜົມລະຫວ່າງປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ແລະ ຄວາມສາມັກຄີພິເສດຂອງສອງພັກ, ສອງລັດ ພາຍໃນເມືອງທ່າແຕງ, ແຂວງ ເຊກອງ ສປປ ລາວ ແລະ ໂຮງໝໍເມືອງ 2 ນະຄອນໂຮ່ຈີ່ມິງ ສສ ຫວຽດນາມ ທີ່ມີມາຍາວນານໃຫ້ດີຍິ່ງຂຶ້ນ ເພື່ອພ້ອມກັນສ້າງຄວາມເຂັ້ມແຂງທາງດ້ານເສດຖະກິດ ແລະ ວັດທະນະທຳ-ສັງຄົມໃນຂອບເຂດການຮ່ວມມືປະເທດອາຊຽນຢ່າງໜັກແໜ້ນ.
ຈາກນັ້ນ ກໍ່ໄດ້ກວດພະຍາດຕ່າງໆໃຫ້ກັບປະຊາຊົນ ໂດຍສະເພາະຄົນເຈັບ ພ້ອມທັງຈ່າຍຢາ ຕາມການກວດພະຍາດຂອງຄົນເຈັບ ເຊິ່ງທົ່ວເມືອງທ່າແຕງ, ມີ 47 ບ້ານ, ມີພົນລະເມືອງ 41.306 ຄົນ, ກວມເອົາ 37% ຂອງພົນລະເມືອງ ທົ່ວແຂວງເຊກອງມີ 8.108 ຄົນ, ໃນນັ້ນ ເມືອງທ່າແຕງມີຄອບຄົວທຸກຍາກ 289 ຄອບຄົວ, ມີພົນລະເມືອງທຸກຍາກ 1.519 ຄົນ, ຍິງ 753 ຄົນ ໃນນີ້ ມີປະຊາຊົນເຂົ້າມາກວດພະຍາດຕົວຈິງມີຈໍານວນ 500 ຄົນ, ພ້ອມທັງມອບຂອງຂັວນມີ ໝີ່ໄວໆສໍາເລັດຮູບ, ເກືອ, ນໍ້າຕານ ແລະ ອື່ນໆ ໃຫ້ພໍ່ແມ່ປະຊາຊົນໃນຈໍານວນດັ່ງກ່າວຕື່ມອີກ
Editor: ກຳປານາດ ລັດຖະເຮົ້າ
