ກອງປະຊຸມດັ່ງກ່າວໄດ້ຈັດຂື້ນເມື່ອບໍ່ດົນມານີ້, ຢູ່ທີ່ສະໂມສອນຂອງຫ້ອງວ່າການເມືອງ ກິເຊີນ ແຂວງ ເຫ້ງ ອານ ສາທາລະນະລັດ ສັງຄົມນິຍົມ ຫວຽດນາມ ຢ່າງເປັນທາງການ.ກອງປະຊຸມຄັ້ງນີ້ໃຫ້ກຽດຕ້ອນຮັບຢ່າງອົບອຸ່ນຈາກ ທ່ານ ວີແຫ່ວ, ກໍາມະການພັກແຂວງ, ເລຂາພັກເມືອງ, ປະທານປະຊາຊົນເມືອງກິເຊີນ ແລະ ທ່ານ ຫງ້ຽນ ແທງ ຮວາ, ຮອງເລຂາພັກເມືອງ, ເຈົ້າເມືອງ-ເມືອງກິເຊີນ, ໂດຍມີຄະນະຜູ້ແທນຈາກເມືອງກວັນ ເຊີ່ງນໍາໂດຍ ທ່ານ ດາວເພັດ ພົມສຸວັນ ຄະນະປະຈໍາພັກເມືອງ, ຮອງເຈົ້າ-ເມືອງກວັນ ແຂວງຫົວພັນ ພ້ອມດ້ວຍຄະນະນໍາ ແລະ ຄະນະຜູ້ແທນຂອງເມືອງໜອງແຮດ, ເມືອງໝອກ, ເມືອງຄໍາ ແຂວງຊຽງຂວາງເຂົ້າຮ່ວມ.
ໃນວາລະດໍາເນີນກອງປະຊຸມຕ່າງໜ້າຄະນະນໍາຂອງແຕ່ລະເມືອງ ກໍ່ໄດ້ພັດປ່ຽນກັນຂື້ນລາຍງານສະພາບການເຄື່ອນໄຫວພາຍໃນເມືອງຂອງຕົນໃນໄລຍະ 5 ເດືອນຜ່ານມາ ໂດຍສະເພາະລຽບຕາມຊາຍແດນ, ເຊີ່ງໄດ້ຍົກໃຫ້ເຫັນສະພາບໂດຍລວມແມ່ນມີຄວາມສະຫງົບເປັນພື້ນຖານ. ໃນກອງປະຊຸມຍັງໄດ້ພ້ອມກັນປະກອບຄໍາຄິດຄໍາເຫັນ ເພື່ອຊອກຫາຊ່ອງທາງຕ້ານ ແລະ ສະກັດກັ້ນປະກົດການຫຍໍ້ທໍ້ລຽບຕາມຊາຍແດນໃຫ້ຄ່ອຍໆໝົດໄປເທື່ອລະກ້າວ, ສ້າງ ແລະ ອໍານວຍຄວາມສະດວກໃຫ້ປະຊາຊົນທັງສອງພາກຊາຍແດນຢູ່ທ່າງທໍາມາຫາກິນ, ໄປມາຫາສູ່, ຄ້າຂາຍແລກປ່ຽນສີ້ນຄ້າເຊີ່ງກັນແລະ ກັນ, ພ້ອມກັນເຄົາລົບລະບຽບ, ກົດໝາຍຂອງແຕ່ລະປະເທດໃຫ້ເຂັ້ມງວດ, ບົນຟື້ນຖານສ້າງຄວາມສາມັກຄີລະຫວ່າງສອງຊາດລາວ-ຫວຽດນາມ, ຫວຽດນາມ-ລາວ ໃຫ້ນັບມື້ມີທ່າຂະຫຍາຍຕົວຂື້ນເລື້ອຍໆ. ກອງປະຊຸມດັ່ງກ່າວໄດ້ດໍາເນີນໄປເປັນເວລາ 1 ຕອນ ແລະ ປິດລົງດ້ວຍຜົນສໍາເລັດອັນຈົບງາມ.
ຂ່າວຍັງໃຫ້ຮູ້ຕື່ມອີກວ່າໃນໂອກາດດຽວກັນນີ້ ຄະນະຜູ້ແທນທັງສອງຝ່າຍຍັງໄດ້ເດີນທາງໄປວາງພວງມະໄລທີ່ອະນຸສະຖານຂອງ ທ່ານ ປະທານໂຮຈີມີ່ນ ຜູ້ນໍາອັນແສນເຄົາລົບເນື່ອງໃນວັນຄ້າຍວັນເກີດຄົບຮອບ 128 ປີ. ທີ່ສໍານັກແຂວງ ເຫ້ງ ອານ ນໍາອີກດ້ວຍ.
ຂ່າວຈາກ ທ່ານ ຄໍາມີ ສີພະຄຸນ ຫ້ອງການ ຖວທ ເມືອງກວັນ ແຂວງຫົວພັນ
Editor: ກຳປານາດ ລັດຖະເຮົ້າ
