ໃນວັນທີ 23 ພຶດສະພາ 2018 ທີ່ຜ່ານມາ, ຄະນະກໍາມະການເຜີຍແຜ່ສີລະທໍາ ແລະ ປະຕິບັດກໍາມະຖານ ສູນກາງ, ໄດ້ຈັດພິທີປາຖະກາຖາພິເສດຂື້ນ ພາຍໃຕ້ຫົວຂໍ້: ແນວທາງນະໂຍບາຍຂອງພັກ-ລັດ ກັບວຽກງານພຸດທະສາສະໜາ ທີ່ສູນອົບຮົມສູນກາງແນວລາວສ້າງຊາດ, ນະຄອນຫລວງວຽງຈັນ ເຊີ່ງໃຫ້ກຽດເປັນປະທານ ປາຖະກາຖາໂດຍແມ່ນ ທ່ານ ສາດສະດາຈານ ປອ ກິແກ້ວ ໄຂຄໍາພິທູນ ເລຂາທິການສູນກາງພັກ, ປະທານສະພາວິທະຍາສາດສັງຄົມແຫ່ງຊາດ, ຫົວໜ້າຄະນະໂຄສະນາອົບຮົມສູນກາງພັກ. ແລະ ເຂົ້າຮ່ວມມີພະອາຈານໃຫຍ່ ປອ, ມະຫາເຫວດ ມະເສໄນ ຮອງປະທານສູນກາງອົງການພຸດທະສາສະໜາສໍາພັນລາວ, ປະທານຊີ້ນໍາວຽກງານກໍາມາທິການເຜີຍແຜ່ສິນລະທໍາ ແລະ ປະຕິບັດກໍາມະຖານ, ມີພະອາຈານ ສິທົນ ໄຊຍະວົງສອນ ຫົວຫນ້າກໍາມາທິການເຜີຍແຜ່ສິນລະທໍາ ແລະ ປະຕິບັດກໍາມະຖານ, ມີພະອາຈານ ອະທິປະໄຕ ໄມຕຣີຈິດ ຮອງຫົວຫນ້າກໍາມາທິການ (ຝ່າຍບໍລິຫານ) ແລະ ພຣະອາຈານ ພຸດທະສອນ ລະຄອນຄໍາ ຮອງຫົວໜ້າກໍາມາທິການ ( ຝ່າຍວິຊາການ) ພ້ອມນີ້ຍັງມີບັນດາຄະນະ ພະສົງ ຈາກ 4 ກໍາມາທິການ 1 ຫ້ອງການ ອພສ ແລະ 9 ຕົວເມືອງ ໃນນະຄອນຫລວງວຽງຈັນ ເຂົ້າຮ່ວມ ຢ່າງພ້ອມພຽງ,
ໃນພິທີ ທ່ານ ສາດສະດາຈານ ປອ ກິແກ້ວ ໄຂຄໍາພິທູນ ຫົວໜ້າຄະນະໂຄສະນາອົບຮົມສູນກາງພັກ. ໄດ້ຍົກໃຫ້ເຫັນວ່າ: ລັດຖະທໍາມະນູນ ແຫ່ງ ສປປ ລາວ ໝວດທີ 4 ມາດຕາ 43 ວ່າ: ພົນລະເມືອງລາວ ມີສິດສະເໝີພາບໃນການເຊື່ອຖື ຫລື ບໍ່ເຊື່ອຖື ສາສະໜາ, ພັກເຮົາ ຍາມໃດກໍ່ຮູ້ວ່າ ຜູ້ໃດເຂົ້າສາດສະໜາອັນໃດ ກໍ່ແມ່ນຄົນລາວ, ບໍ່ເປັນຄົນຕ່າງປະເທດ, ບັນດາສາດສະໜາຕ່າງໆ ຕ້ອງເຮັດໜ້າທີ່ປົກປັກຮັກສາປະເທດຊາດບ້ານເມືອງ ໃຫ້ສະຫງົບສຸກ, ເພື່ອປະກອບສ່ວນສ້າງສາພັດທະນາປະເທດຊາດ, ສ້າງບ້ານແປງເມືອງ, ສ້າງໂຄງການຕ່າງໆ ຊ່ວຍພັກ ແລະ ປະຊາຊົນ, ພັກເຮົາຍາມໃດແມ່ນຢາກໃຫ້ບັນດາສາສະ ໜາມີຄວາມສາມັກຄີປອງດອງ ເປັນຈິດຫນື່ງໃຈດຽວກັນ, ບໍ່ຂັດແຍ່ງແບ່ງສອງ ພ້ອມກັນປະກອບສ່ວນເຈົ້າໃນການປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ ໃຫ້ສີວິໄລ ຄືນານາປະເທດ ເພື່ອຄວາມຢູ່ດີກິນດີ ຂອງປະຊາຊົນ ທັງຊາດ.
Editor: ກຳປານາດ ລັດຖະເຮົ້າ
