ກະຊວງແຮງງານ ແລະ ສະຫວັດດີການສັງຄົມ ໄດ້ຈັດກອງປະຊຸມວິທະຍາສາດກ່ຽວກັບ ວຽກງານແຮງງານ ແລະ ສະຫວັດດີການສັງຄົມ ໃນກອງປະຊຸມ ທ່ານ. ປອ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ໄດ້ກ່າວມີຄໍາເຫັນວ່າ: ຄະນະພັກ, ຄະນະນຳກະຊວງແຮງງານ ແລະ ສະຫັວດດີການສັງຄົມ ຍາມໃດກໍ່ຖືເອົາວຽກງານການຊີ້ນຳ ນໍາພາອົງການຈັດຕັ້ງມະຫາຊົນເປັນວຽກທີ່ສຳຄັນ, ຖືເອົາອົງການຈັດຕັ້ງມະຫາຊົນເປັນອົງປະກອບທີ່ສຳຄັນໃນການຈັດຕັ້ງປະຕິບັດໜ້າທີ່ການເມືອງ, ວຽກງານວິຊາສະເພາະ ແລະ ຄວນມີກອງປະຊຸມແບບນີ້ຂື້ນອີກໃນຄັ້ງຕໍ່ໆໄປ. ໃຫ້ຄະນະຊາວໜຸ່ມກະຊວງຖອດຖອນເອົາບົດຮຽນ ຈາກການຈັດກອງປະຊຸມຄັ້ງນີ້ໄປຜັນຂະຫຍາຍເຂົ້າໃນວຽກງານຕົວຈິງ ໃຫ້ເກີດດອກອອກຜົນ.

ພ້ອມນີ້ ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ຍັງຮຽກຮ້ອງໃຫ້ສະມາຊິກຊາວໜຸ່ມທຸກໆຄົນ, ການຈັດຕັ້ງຂອງຊາວໜຸ່ມທຸກຂັ້ນ ຈົ່ງເຊື່ອໝັ້ນຕໍ່ບົດບາດການນຳພາຂອງພັກເຮົາ, ຈົ່ງສ້າງ ແລະ ຝຶກຝົນຫຼໍ່ຫຼອມຕົນເອງໃຫ້ກາຍເປັນຜູ້ທີ່ມີຄວາມຮູ້, ຄວາມສາມາດ, ມີຄຸນສົມບັດສິນທຳປະຕິບັດທີ່ແທ້ຈິ່ງ ເພື່ອສືບຕໍ່ ເປັນຜູ້ສືບທອດທີ່ີດີ ໃນການປະຕິບັດພາລະກິດການປະຕິວັດຂອງພັກເຮົາ. ຊາວໜຸ່ມທຸກຄົນຈົ່ງເຊື່ອໝັ້ນວ່າ: ຄະນະພັກ, ຄະນະນຳກະຊວງກໍຄືຄະນະພັກຂັ້ນເທິງທຸກຂັ້ນ ຈະສືບຕໍ່ຖືວຽກງານງານການຈັດຕັ້ງຂອງຊາວໜຸ່ມ, ຖືຂະບວນການຊາວໜຸ່ມເປັນເວທີແຫ່ງການຝຶກຝົນຫຼໍ່ຫຼອມ ແລະ ກໍ່ສ້າງພະນັກງານຢ່າງແທ້ຈິງ, ຈະໃຫ້ການຊີ້ນຳນຳພາ ແລະ ອຳນວຍຄວາມສະດວກທຸກຄົນ ໃຫ້ແກ່ການເຄື່ອນໄຫວວຽກງານຊາວໜຸ່ມ ຂອງອົງການຈັດຕັ້ງມະຫາຊົນ ທຸກອົງການຢ່າງເອົາໃຈໃສ່.

Editor: ກຳປານາດ ລັດຖະເຮົ້າ