ໃນລະຫວ່າງ ວັນທີ 24-25 ພຶດສະພາ 2018 ຜ່ານມາ ຢູ່ທີ່ຫ້ອງການປົກຄອງເມືອງ ສັງທອງ ໄດ້ຈັດກອງປະຊຸມເຜີຍແຜ່ ແລະ ທາບທາມຄໍາຄິດຄໍາເຫັນໃສ່ຮ່າງ ປະມວນກົດໝາຍແພ່ງ ໄດ້ຈັດຂຶ້ນ ພາຍໃຕ້ການເປັນປະທານຂອງ ທ່ານ ປອ. ເສີມສຸກ ສິມພະວົງ ຮອງເລຂາຄະນະພັກ, ຮອງລັດຖະມົນຕີກະຊວງຍຸຕິທໍາ, ໂດຍການເຂົ້າຮ່ວມຂອງ ທ່ານ ດາວເພັດ ອາລຸນ ເລຂາພັກເມືອງ, ເຈົ້າເມືອງ ເມືອງສັງທອງ, ມີທ່ານ ອິຣິເອ ຄະຊຶໂນຣິ (Mr. IRIE Katsunori) ຊ່ຽວຊານດ້ານກົດໝາຍ ປະຈໍາໂຄງການພັດທະນາຊັບພະຍາກອນມະນຸດໃນຂົງເຂດຍຸຕິທໍາ, ມີຄະນະສ້າງຮ່າງປະມວນກົດໝາຍແພ່ງ, ຜູ້ຕາງໜ້າພະແນກຍຸຕິທໍານະຄອນຫຼວງ, ຫ້ອງການຍຸຕິທໍາເມືອງ, ນາຍບ້ານ, ປກສ ກຸ່ມບ້ານ, ສະຫະພັນແມ່ຍິງບ້ານ ພາຍໃນເມືອງ ສັງທອງ ເຂົ້າຮ່ວມຢ່າງພ້ອມພຽງ.
ຈຸດປະສົງກອງປະຊຸມໃນຄັ້ງນີ້ ເພື່ອປັບປຸງຫຼັກການ ແລະ ບົດບັນຍັດກົດໝາຍທີ່ເຫັນວ່າຍັງບໍ່ສອດຄອງກັບສະພາບການຂອງການປ່ຽນແປງ ໂດຍສະເພາະການປ່ຽນແປງທາງດ້ານເສດຖະກິດ-ສັງຄົມ ຕາມກົນໄກເສດຖະກິດຕະຫຼາດ ທີ່ມີການດັດສົມຂອງລັດ, ປັບປຸງເນື້ອໃນກົດໝາຍທີ່ມີຢູ່ແລ້ວໃຫ້ສອດຄ່ອງ ແລະ ຖືກຕ້ອງກັບສະພາບຕົວຈິງ, ສ້າງໃນສ່ວນທີ່ກົດໝາຍ ຂອງ ສປປ ລາວ ຍັງບໍ່ໄດ້ກຳນົດ ແລະ ດັດປັບ, ສ້າງບັນດາເນື້ອໃນກົດໝາຍໃຫ້ເປັນລະບົບ ແລະ ສອດຄ່ອງກົມກຽວຫຼາຍຂຶ້ນກວ່າເກົ່າ. ນອກຈາກນັ້ນ, ກໍໄດ້ເຜີຍແຜ່ ແລະ ທາບທາມລາຍງານສັງລວມຄວາມຄືບໜ້າໃນການສ້າງປະມວນກົດໝາຍແພ່ງຂອງ ສປປ ລາວ ເປັນຕົ້ນການໄດ້ກໍາມະສິດ ແລະ ການປົກປ້ອງກໍາມະສິດ,ການຈຳນອງດ້ວຍສັງຫາລິມະຊັບ, ດອກເບ້ຍ ການກູ້ຢືມ, ການໝັ້ນໝາຍ, ສູ່ຂໍ, ການແຕ່ງດອງ, ການຢ່າຮ້າງ, ການສືບທອດມູນມໍຣະດົກ ແລະ ບາງມາດຕາທີ່ສໍາຄັນໃນພາກສັນຍາ.
ໃນກອງປະຊຸມຜູ້ເຂົ້າຮ່ວມກໍໄດ້ພ້ອມກັນຄົ້ນຄວ້າປຶກສາຫາລື ແລະ ແລກປ່ຽນຄໍາຄິດເຫັນຢ່າງກົງໄປກົງມາ ເພື່ອເຮັດໃຫ້ຮ່າງປະມວນກົດໝາຍແພ່ງ ສະບັບທໍາອິດ ຂອງ ສປປ ລາວ ມີຄວາມເປັນເອກະພາບ,ຈະແຈ້ງ, ຊັດ ເຈນ, ສົມບູນ, ສອດຄ່ອງກັບສະພາບຄວາມເປັນຈິງ ແລະ ສາມາດຈັດຕັ້ງປະຕິບັດໄດ້ໃນພາກປະຕິບັດຕົວຈິງ. ກອງປະຊຸມໄດ້ດຳເນີນເປັນເວລາ 2 ວັນ ແລະ ປິດລົງໃນວັນທີ 25 ພຶດສະພາ 2018.
Editor: ກຳປານາດ ລັດຖະເຮົ້າ
