ເພື່ອເຮັດໃຫ້ຄະນະພັກ-ຄະນະບັນຊາທົ່ວກອງບັນຊາການປ້ອງກັນຄວາມສະຫງົບ ໄດ້ຮັບຮູ້, ເຂົ້າໃຈ, ກໍາແໜ້ນເນື້ອໃນຈິດໃຈຂອງກົດໝາຍ ແລະ ເຫັນໄດ້ຄວາມສໍາຄັນຂອງກົດໝາຍ ດັ່ງນັ້ນ ກອງບັນຊາການປ້ອງກັນຄວາມສະຫງົບເມືອງທ່າແຕງ ຈຶ່ງໄດ້ຈັດພິທີເຜີ່ຍແຜ່ກົດໝາຍວ່າດ້ວຍກຳລັງປ້ອງກັນຄວາມສະຫງົບປະຊາຊົນ (ສະບັບປັບປຸງໃໝ່) ຂື້ນຢູ່ທີ່ສະໂມສອນເມືອງທ່າແຕງ, ແຂວງເຊກອງ ໂດຍການເປັນປະທານເຜີຍແຜ່ເອກະສານຂອງ ທ່ານ ພັນໂທ ສົມສັກ ຂັດຕິຍະວົງ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງເຊກອງ, ມີບັນດາສະຫາຍຄະນະພັກ-ຄະນະບັນຊາ, ຫົວໜ້າ-ຮອງພະແນກກ່ຽວຂ້ອງ ພ້ອມດ້ວຍພະນັກງານພາຍໃນກົມກອງ ເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ພັນໂທ ສົມສັກ ຂັດຕິຍະວົງ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງເຊກອງ ໄດ້ເຜີຍແຜ່ໃຫ້ຮູ້ວ່າ: ກົດໝາຍ ວ່າດ້ວຍກໍາລັງປ້ອງກັນຄວາມສະຫງົບປະຊາຊົນ (ສະບັບປັບປຸງ ໃໝ່) ປະກອບມີ 9 ພາກ, 6 ໝວດ ແລະ 55 ມາດຕາ, ໄດ້ປັບປຸງຕື່ມຈຳນວນ 46 ມາດຕາ ແລະ ສ້າງໃໝ່ 6 ມາດຕາ, ທີ່ໄດ້ກໍານົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງ,ການເຄື່ອນໄຫວຂອງກຳລັງປ້ອງກັນຄວາມສະຫງົບປະຊາຊົນ ແລະ ເພື່ອຮັບປະກັນໃຫ້ກຳລັງມີຄວາມໝັກແໜ້ນ ທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ, ມີລະບຽບວິໄນເຂັ້ມງວດ, ມີຄວາມຊໍານານທາງດ້ານວິຊາສະເພາະ, ມີແບບແຜນວິທີເຮັດວຽກທີ່ກ້າວໜ້າ ແລະ ທັນສະໄໝ, ເຮັດສໍາເລັດໜ້າທີ່ໃນການປົກປັກຮັກສາສະຖຽນລະພາບທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ປະກອບສ່ວນເຂົ້າໃນການປົກປັກຮັກສາ, ສ້າງສາ ແລະ ພັດທະນາປະເທດຊາດ. ນອກນັ້ນ, ທ່ານຍັງໄດ້ເນັ້ນໝັກໃຫ້ຄະນະພັກ-ຄະນະບັນຊາ ທົ່ວກອງບັນຊາການປ້ອງກັນຄວາມສະຫງົບເມືອງທ່າແຕງ ຈົ່ງພ້ອມກັນນຳເອົາເນື້ອໃນຂອງກົດໝາຍສະບັບນີ້ ນຳໄປຈັດຕັ້ງປະຕິບັດຢ່າງຖືກຕ້ອງຕາມກົດໝາຍວາງອອກ ຢ່າງເຂັ້ມງວດ. ພ້ອມກັນນັ້ນ ກໍ່ໄດ້ມີການ ປະກາດການເລື່ອນຊັ້ນ ໃຫ້ນາຍ ແລະ ພົນຕໍາຫຼວດ ທີ່ມີມາດຖານເງື່ອນໄຂຄົບຖ້ວນ ເລື່ອນຊັ້ນ ພັນຕີ ຂຶ້ນ ພັນໂທ ມີ 2 ສະຫາຍ, ເລື່ອນຊັ້ນ ຮ້ອຍໂທ ຂຶ້ນ ຮ້ອຍເອກ ມີ 2 ສະຫາຍ, ເລື່ອນຊັ້ນ ວ່າທີ ຂຶ້ນ ຮ້ອຍຕີ ມີ 3 ສະຫາຍ, ຍິງ 1 ສະຫາຍ ແລະ ເລື່ອນຊັ້ນ ສິບເອກ ຂຶ້ນ ວ່າທີ ມີ 13 ສະຫາຍ, ຍິງ 1 ສະຫາຍ ໂດຍການໃຫ້ກຽດປະດັບຊັ້ນຂອງ ທ່ານ ພັນໂທ ສົມສັກ ຂັດຕິຍະວົງ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງ ເຊກອງ ແລະ ທ່ານ ພັນໂທ ອ່ອນຕາ ສະສົມບັດ ກໍາມະການພັກເມືອງ ຫົວໜ້າກອງບັນຊາການປ້ອງກັນຄວາມສະຫງົບ ເມືອງທ່າແຕງ.

Editor: ກຳປານາດ ລັດຖະເຮົ້າ