ພິທີເປີດຊຸດອົບຮົມຫັດແອບສ້າງກຸ່ມບ້ານປ້ອມໝັ້ນສູ້ລົບຕິດລຽນ ໂດຍຕິດພັນກັບການສ້າງກຸ່ມບ້ານພັດທະນາຕາມ 4 ເນື້ອໃນ 4 ຄາດໝາຍ ແລະ ວຽກງານ 3 ສ້າງພາຍໃນເມືອງທ່າແຕງ ໂດຍສະເພາະ ເຂດຈຸດສຸ່ມພັດທະນາທີ 5 ບ້ານປະຫຼາຍ ເມືອງທ່າແຕງ, ແຂວງເຊກອງ ໄດ້ໄຂຂື້ນທ້າຍເດືອນພຶດສະພາ 2018 ນີ້ ຢູ່ທີ່ເຂດດັ່ງກ່າວ, ໂດຍພາຍໃຕ້ການເປັນປະທານຂອງ ທ່ານ ພົນຈັດຕະວາ ສົມທອງ ດອນກັນນ້ອຍ ຄະນະປະຈໍາພັກແຂວງ ຫົວໜ້າກອງບັນຊາການທະຫານແຂວງເຊກອງ, ໃຫ້ກຽດເຂົ້າຮ່ວມຂອງ ທ່ານ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງເຈົ້າເມືອງ-ເມືອງ ທ່າແຕງ, ມີ ທ່ານ ພັນໂທ ແສງມະນີ ດາລາສິນ ຄະນະປະຈໍາພັກເມືອງ ຫົວໜ້າກອງບັນຊາການທະຫານ ເມືອງທ່າແຕງ, ມີຄະນະພັກ-ຄະນະບັນຊາສອງກອງບັນຊາການທະຫານ-ຕຳຫຼວດ, ອໍານາດການປົກຄອງບ້ານ, ກໍາລັງກອງຫຼອນບ້ານ ແລະ ແຂກຖືກເຊີນ 100 ກວ່າສະຫາຍເຂົ້າຮ່ວມ.
ທ່ານ ພັນໂທ ຄໍາຕື້ ກ້ອນມະນີ ຮອງຫົວໜ້າການເມືອງກອງບັນຊາການທະຫານ ເມືອງ ທ່າແຕງ ໄດ້ຂື້ນຜ່ານແຜນການອົບຮົມຫັດແອບສ້າງກຸ່ມບ້ານປ້ອມໝັ້ນສູ້ລົບຕິດລຽນ ໂດຍຕິດພັນກັບການສ້າງບ້ານພັດທະນາຕາມ 4 ເນື້ອໃນ 4 ຄາດໝາຍ ແລະ ວຽກງານ 3 ສ້າງພາຍໃນເມືອງ ທ່າແຕງ ປະຈຳປີ 2018 ເຊິ່ງເອກະສານທີ່ນຳມາອົບຮົມມີ ຫຼັກການ ແລະ ການນໍາໃຊ້ອາວຸດພື້ນເມືອງ, ການກໍ່ສ້າງບ້ານເຂັ້ມແຂງຮອບດ້ານ,ສິດ ແລະ ໜ້າທີ່ຂອງ ປກສ ບ້ານ, ຕ້ານ ແລະ ສະກັດກັ້ນປະກົດການຫຍໍ້ທໍ້ອື່ນໆ, ການຫັດແອບການເມືອງ-ການທະຫານສອງພາກ. ຈຸດປະສົ່ງເພື່ອເຮັດໃຫ້ລະບົບການຈັດຕັ້ງຂອງກອງຫຼອນ ໃນ 7 ໝູ່ບ້ານທີ່ຂື້ນກັບເຂດຈຸດສຸ່ມພັດທະນາທີ V ມີຄວາມເຂັ້ມແຂງຮອບດ້ານ,ແນ່ໃສ່ຍົກລະດັບວິຊາສະເພາະການເມືອງ-ການທະຫານໃຫ້ດີຂື້ນກ່ວາເກົ່າ, ຍົກສູງສະຕິລະວັງຕົວຕໍ່ທຸກກົນອຸບາຍຂອງກຸ່ມຄົນບໍ່ດີທີ່ຫວັງມ້າງເພທຳລາຍພັກເຮົາ,ທັງເປັນການຍົກສູງຄວາມເປັນເຈົ້າ ແລະ ເພີ່ມທະວີໃນການປົກປັກຮັກສາທ້ອງຖິ່ນໃຫ້ເປັນລະບຽບຮຽບຮ້ອຍ, ມີຄວາມ ໜັກແໜ້ນ, ເຮັດໃຫ້ສັງຄົມມີຄວາມສະຫງົບປອດໄພ. ເຊິ່ງພິທີດັ່ງກ່າວຈະດໍາເນີນໄປເປັນເວລາ 15 ວັນຈິ່ງຈະສຳເລັດ.
ໂອກາດດຽວກັນນີ້ ທ່ານ ພົນຈັດຕະວາ ສົມທອງ ດອນກັນນ້ອຍ ຄະນະປະຈໍາພັກແຂວງ ຫົວໜ້າກອງບັນຊາການທະຫານແຂວງ ເຊກອງ ໄດ້ກ່າວສະແດງຄວາມຍ້ອງຍໍຊົມເຊີຍ ພ້ອມທັງ ເນັ້ນໜັກໃຫ້ບັນດາກອງຫຼອນ ທຸກສະຫາຍ ເອົາໃຈໃສ່ຍົກສູງຕໍ່ໜ້າທີ່ການເມືອງຂອງຕົນ, ຈັດຕັ້ງປະຕິບັດຕາມກົດລະບຽບໃຫ້ເຂັ້ມງວດ, ເພີ່ມທະວີຄວາມສາມັກຄີໃຫ້ໜັ້ກແໜ້ນ, ເອົາໃຈໃສ່ຝຶກແອບຮ່ຳຮຽນ ແລະ ກຳແໜ້ນໃຫ້ໄດ້ທາງດ້ານທິດສະດີ, ລະບຽບ-ຫຼັກການ, ການສ້າງບ້ານ, ກຸ່ມບ້ານສູ້ລົບຕິດລຽນ ຕິດພັນກັບການສ້າງກຸ່ມບ້ານພັດທະນາຕາມ 4 ເນື້້ອໃນ 4 ຄາດໝາຍຂອງ ກົມການເມືອງສູນກາງພັກວາງອອກ ເພື່ອໃຫ້ບັນລຸຕາມຄາດໝາຍທີ່ວາງໄວ. ສໍາລັບບັ້ນອົບຮົມຄັງນີ້ ຈະດໍາເນີນໄປຈົນເຖິງວັນທີ 4 ມີຖຸນາ 2018 ຈິ່ງຈະໄດ້ອັດລົງ
ແຫລ່ງຂ່າວ ຈາກເມືອງທ່າແຕງ
Editor: ກຳປານາດ ລັດຖະເຮົ້າ
