ໃນຕອນເຊົ້າຂອງວັນທີ 30 ພຶດສະພາ 2018 ຜ່ານມາ, ທີ່ສຳນັກງານນາຍົກລັດຖະມົນຕີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ, ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ຈີນ ເບີນາດ ຄາຣາສໂກ (Jean Bernard Carrasco) ໃນໂອກາດມາດຳລົງຕຳແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງປະເທດອົດສະຕຣາລີ ຄົນ ໃໝ່ປະຈຳ ສປປ ລາວ. ໂອກາດນີ້, ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຍິນດີຕ້ອນຮັບຊົມເຊີຍ ຕໍ່ການມາຮັບໜ້າທີ່ໃໝ່ຂອງ ທ່ານ ຈີນ ເບີນາດ ຄາຣາສໂກ ອັນເປັນການສືບຕໍ່ເສີມຂະຫຍາຍສາຍພົວພັນມິດຕະພາບ ລະຫວ່າງສອງປະເທດ ລາວ-ອົດສະຕຣາລີ ໂດຍສະເພາະ ການຈັດຕັ້ງຜັນຂະຫຍາຍ ຜົນຂອງກອງປະຊຸມສຸດຍອດ ອົດສະຕຣາລີ-ອາຊຽນ ທີ່ຈັດຂຶ້ນໃນເດືອນມີນາ 2018 ທີ່ຜ່ານມາ ຢູ່ປະເທດອົດສະຕຣາລີ.
ພ້ອມນີ້, ທ່ານຮອງນາຍົກລັດຖະມົນຕີ ກໍ່ໄດ້ຕີລາຄາສູງ ຕໍ່ສາຍພົວພັນການຮ່ວມມືລະຫວ່າງສອງລັດຖະບານ ໃນໄລຍະທີ່ຜ່ານມາ ທັງການຊ່ວຍເຫຼືອປັບປຸງກໍ່ສ້າງດ້ານພື້ນຖານໂຄງລ່າງຂອງລາວ, ການພັດທະນາຊົນນະບົດ, ການເກັບກູ້ລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ, ການຊ່ວຍຍົກລະດັບ ແລະ ສ້າງຊັບພະຍາກອນມະນຸດ ໃຫ້ແກ່ ສປປ ລາວ, ດ້ານການລົງທຶນ ກໍ່ໄດ້ມີນັກທຸລະກິດຂອງອົດສະຕຣາລີ ເຂົ້າມາລົງທຶນໃນບາງຂະແໜງການທີ່ສຳຄັນ ທີ່ເປັນທ່າແຮງຂອງ ສປປ ລາວ ເປັນຕົ້ນ ໃນຂະແໜງພະລັງງານ ແລະ ບໍ່ແຮ່. ອັນເປັນການປະກອບສ່ວນສຳຄັນ ເຂົ້າໃນການພັດທະນາເສດຖະກິດ-ສັງຄົມຂອງລາວ ໃນແຕ່ລະໄລຍະ.
ທ່ານ ສອນໄຊ ສີພັນດອນ ແລະ ທ່ານ ຈີນ ເບີນາດ ຄາຣາສໂກ ກໍ່ຍັງໄດ້ສົນທະນາກັນຕື່ມ ໃນບາງບັນຫາທີ່ຕ່າງຝ່າຍຕ່າງມີຄວາມສົນໃຈ ເປັນຕົ້ນ ການເປີດໂອກາດໃຫ້ຄົນອົດສະຕຣາລີ ເຊື້ອຊາດລາວ ມາລົງທຶນ ແລະ ສ້າງສາພັດທະນາ ຢູ່ ສປປ ລາວ ໂດຍສະເພາະ ໃນຖິ່ນຖານບ້ານເກີດຂອງຕົນ, ການຮ່ວມມືກັນຕື່ມ ທາງດ້ານການທ່ອງທ່ຽວ ໃນປີ 2018 ທີ່ເປັນປີທ່ອງທ່ຽວລາວ, ການຮ່ວມມືໃນການພັດທະນາການເຊື່ອມຈອດ ຈາກປະເທດທີ່ບໍ່ມີທາງອອກສູ່ທະເລ ກາຍເປັນປະເທດເຊື່ອມຈອດໃນພາກພື້ນ ເປັນຕົ້ນ ກໍ່ແມ່ນການສ້າງເສັ້ນທາງດ່ວນ, ການກໍ່ສ້າງເສັ້ນທາງລົດໄຟຄວາມໄວສູງ ແລະ ການພັດທະນາທ່າເຮືອຮຸງອານ, ການລົງທຶນເຂົ້າໃນຂົງເຂດການປູກໄມ້ອຸດສາຫະກຳ ເພື່ອເນື້ອທີ່ຂອງປ່າໄມ້ ໃຫ້ໄດ້ 70 ສ່ວນຮ້ອຍ ໃນປີ 2020 ຕາມທີ່ລັດຖະບານ ໄດ້ກຳນົດໄວ້.
ໃນຕອນທ້າຍ, ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຫວັງວ່າ ທ່ານ ຈີນເບີນາດ ຄາຣາສໂກ ໃນເວລາທີ່ມາຮັບໜ້າທີ່ ເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງປະເທດອົດສະຕຣາລີ ຄົນໃໝ່ປະຈຳ ສປປ ລາວ ຈະສືບຕໍ່ເພີ່ມທະວີການຮ່ວມມືກັບຝ່າຍລາວ ເວົ້າສະເພາະ ກໍ່ແມ່ນການຊ່ວຍເຫຼືອພັດທະນາ ແລະ ຍົກລະດັບ ໃນຂະແໜງການຕ່າງໆຂອງລາວ ທີ່ມີຄວາມຈຳເປັນຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 8 ກໍ່ຄືເປົ້າໝາຍການພັດທະນາແບບຍືນຍົງ ໂດຍຜ່ານກົນໄກການຮ່ວມມືສອງຝ່າຍ, ຫຼາຍຝ່າຍ ກໍ່ຄືໃນຂອບຂອງອົດສະຕຣາລີ-ອາຊຽນ.
ແຫລ່ງຂ່າວ ກົມປະຊາສໍາພັນ ( ສນຍ)
Editor: ກຳປານາດ ລັດຖະເຮົ້າ
