ເພື່ອປະຕິບັດຕາມຂໍ້ຄົກລົງ ສະບັບເລກທີ 1113/ກປ, ລົງວັນທີ 21 ພຶດສະພາ 2018 ວ່າດ້ວຍການອະນຸມັດ ເປີດກອງປະຊຸມທາບທາມຮ່າງກົດຫມາຍວ່າດ້ວຍປ່າໄມ້ ສະບັບປັບປຸງ. ດັ່ງນັ້ນ ທ້າຍເດືອນພຶດສະພາ 2018 ທີ່ຜ່ານມາ, ທີ່ກະຊວງກະສິກໍາ ແລະ ປ່າໄມ້ ໄດ້ຈັດກອງປະຊຸມດັ່ງກ່າວຂື້ນ, ໂດຍການເປັນປະທານ ຂອງ ທ່ານ ປອ ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້, ພ້ອມນີ້ ຍັງມີຮອງລັດຖະມົນຕີ, ຮອງລັດຖະມົນຕີ ກະຊວງທີ່ກ່ຽວຂ້ອງກັບກົດຫມາຍ, ຜູ້ຕາງຫນ້າຄະນະກໍາມາທິການສະພາແຫ່ງຊາດ, ມີຫົວຫນ້າ-ຮອງຫົວຫນ້າ, ກົມ, ຫ້ອງການ, ສະຖາບັນ, ພະແນກການ, ຫນ່ວຍງານ ທີ່ກ່ຽວຂ້ອງ ເຂົ້າຮ່ວມ.
ຈຸດປະສົງກອງປະຊຸມ ເພື່ອເປັນການທາບທາມ, ປຶກສາຫາລື ແລະ ປະກອບຄໍາເຫັນໃສ່ ຮ່າງກົດຫມາຍວ່າດ້ວຍປ່າໄມ້ ສະບັບປັບປຸງ ໃຫ້ມີຄວາມສົມບູນຄົບຸ້ວນ ແລະ ສອດຄ່ອງກັບສະພາບຄວາມເປັນຈິງ ແລະ ການພັດທະນາເສດຖະກິດ-ສັງຄົມ ແຫ່ງຊາດ ໃນປະຈຸບັນ. ໃນກອງປະຊຸມ ທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ຂື້ນສະເໜີ ຮ່າງ ກົດຫມາຍວ່າດ້ວຍປ່າໄມ້ ສະບັບປັບປຸງ ເຊີ່ງປະກອບມີ 13 ພາກ, 17 ໝວດ ແລະ 160 ມາດຕາ. ໃນນັ້ນໄດ້ເພີ່ມຕື່ມ 1 ພາກ, 4 ໝວດ, ປັບປຸງ 61 ມາດຕາ ແລະ ເພີ່ມໃຫມ່ 36 ມາດຕາ ( ຮັກສາເດີມ 58 ມາດຕາ, ຕັດອອກ 5 ມາດຕາ ) ຫລັງຈາກນັນ ຜູ້ແທນໃນກອງປະຊຸມ ໄດ້ພ້ອມກັນປະກອບຄໍາຄິດເຫັນໃສ່ຮ່າງກົດຫມາຍວ່າດ້ວຍປ່າໄມ້ ສະບັບປັບປຸງ ເພື່ອເຮັດໃຫ້ຮ່າງກົດຫມາຍ ດັ່ງກ່າວ ມີເນື້ອໃນຄົບຸ້ວນ ແລະ ສົມບູນ
Editor: ກຳປານາດ ລັດຖະເຮົ້າ
