"ພິທີເປີດຊຸດຝຶກອົບຮົບວັດທະນະທຳລາວ ປະຈຳປີ 2016"
ພິທີດັ່ງກ່າວໄດ້ຈັດຂຶ້ນເມື່ອບໍ່ດົນມານີ້ ທີ່ຫ້ອງປະຊຸມ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ໂດຍການເຂົ້າຮ່ວມຂອງ “ທ່ານ ຄຳໃບ ໂພທິສານ” ຮອງຫົວໜ້າຫ້ອງການ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ປະທານສະມາຄົມນັກປະພັນລາວ, ທ່ານນາງ ສົມພຽນ ພົງສະຫວັດມີໄຊ ຮອງຫົວໜ້າກົມພິມຈຳໜ່າຍ, ທ່ານ ໂອທອງ ຄຳອິນຊູ ຫົວໜ້າສະໂມສອນ ວັດທະນະທຳສິນໄຊ ມີບັນດານັກສໍາມະນາກອນເຂົ້າຮ່ວມ 112 ຄົນ, ຍິງ 49 ຄົນ ພະສົງ 26 ອົງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ບັນດາຜູ້ເຂົ້າຮ່ວມຍັງຈະໄດ້ຮັບຟັງການປາຖະກະຖາກ່ຽວກັບ ວຽກງານວັດທະນະທໍາການນຸ່ງຖື, ມາລະຍາດສັງຄົມ ແລະ ມີໂອກາດພົບກັບນັກສະແດງແບບປະຈຳສະໂມສອນ, ຜູ້ທີ່ຜ່ານການຝຶກອົບຮົມ ແລະ ມີຜົນສຳເລັດໃນການປະກອບວິຊາອາຊີບຂອງຕົນ. ເພື່ອສະດວກໃນການເຂົ້າຮ່ວມຂອງນັກຮຽນ, ນັກສຶກສາ ການຝຶກອົບຮົມຈະໄດ້ດໍາເນີນສະເພາະວັນເສົາ ແລະ ວັນອາທິດ ເປັນເວລາ 3 ອາທິດ ຫຼື 6 ວັນ. ເຊິ່ງສະຖານທີ່ແມ່ນ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ແລະ ຍັງຈະແບ່ງອອກເປັນ 3 ຫ້ອງ ແຕ່ລະຫ້ອງຈະເນັ້ນໃສ່ການປະຕິບັດຕົວຈິງ.
ຫ້ອງຝຶກອົບຮົມການສະແດງແບບ ແລະ ຟ້ອນ ຢູ່ໂສພາຜ້າໄໝ ບ້ານ ປາກທ້າງ, ເມືອງ ສີໂຄດຕະບອງ, ນະຄອນຫຼວງວຽງຈັນ, ຫ້ອງຝຶກອົບຮົມການແຕ່ງເລື່ອງສັ້ນ ຢູ່ຕຶກອົງການທ່ອງທ່ຽວແຫ່ງຊາດ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແລະ ຫ້ອງຝຶກອົບຮົມການແຕ່ງກາບກອນ, ຢູ່ສາລາກະວີ (ງົວ ແລະ ກວຽນ) ບ້ານ ໜອງວຽງຄໍາ (ມະຫາວິທະຍາໄລແຫ່ງຊາດ ວິທະຍາເຂດດົງໂດກ) ເມືອງ ໄຊທານີ, ນະຄອນຫຼວງວຽງຈັນ.
ນອກຈາກຝຶກອົບຮົມກັບທີ່ແລ້ວຍັງມີການເຄື່ອນໄຫວຕັ້ງຄ້າຍພັກຢູ່ຕ່າງແຂວງ ເພື່ອໃຫ້ຜູ້ເຂົ້າຮ່ວມຝຶກອົບຮົມໄດ້ສະແດງອອກໃນສິ່ງທີ່ຕົນຝຶກມາໂດຍການສະແດງໃນຄ້າຍພັກ ການສະແດງແລກປ່ຽນກັບຊາວໜຸ່ມໃນບ້ານ, ການສະແດງໃນໂຮງດັ່ງນີ້ເປັນຕົ້ນ. ໃນປັດຈຸບັນ ກິດຈະກໍາການເຄື່ອນໄຫວຂອງສະໂມສອນວັດທະນະທໍາສິນໄຊ ຍັງໄດ້ຮັບຄວາມສົນໃຈຢ່າງກ້ວາງຂວາງຈາກໄວໜຸ່ມແຕ່ລະປີ ມີຜູ້ມາສະໝັກເຂົ້າຝຶກອົບຮົມຢ່າງຫຼວງຫຼາຍ ພໍ່ແມ່ຜູ້ປົກຄອງ ກໍ່ຄືສັງຄົມທົ່ວໄປ ໃຫ້ຄວາມສົນໃຈ ເຮັດໃຫ້ກິດຈະການເຄື່ອນໄຫວຂອງສະໂມສອນໄດ້ຮັບການສະໜັບສະໜູນ ແລະ ຊຸກຍູ້ສົ່ງເສີມເປັນຢ່າງດີ.
