ໃນວັນທີ 29 ພຶດສະພາ ທີ່ຜ່ານມາ ຢູ່ທີ່ບ້ານ ຫລັງຄັງ, ເມືອງ ບົວລະພາ, ແຂວງຄໍາມ່ວນ ໄດ້ຈັດພິທີປີດການຮຽນ-ການສອນ ກົດໝາຍຊັ້ນຕົ້ນ ພ້ອມທັງ ມອບປະກາສະນີຍະບັດ ກົດໝາຍຊັ້ນຕົ້ນ ລະບົບ 03 ເດືອນ ຊຸດທີ 08 ສົກປີ 2017-2018, ໂດຍການເຂົ້າຮ່ວມຂອງທ່ານ ຄໍາເພົ່າ ທອງເທພາຮັກ ເຈົ້າເມືອງໆບົວລະພາ, ທ່ານ ຈັນທາ ພົມມະສອນ ຫົວໜ້າພະແນກ ຍຸຕິທໍາແຂວງ, ພ້ອມດ້ວຍບັນດາຫົວໜ້າ, ຮອງຫົວໜ້າຫ້ອງການ ພະນັກງານວິຊາການ ອຳນາດການປົກຄອງບ້ານ ແລະ ນັກຮຽນກົດໝາຍຊັ້ນຕົ້ນ ຊຸດທີ 8 ເຂົ້າຮ່ວມ.
ທ່ານ ຄໍາຟອງ ຈັນປັນຈາ ຫົວໜ້າຫ້ອງການ ຍຸຕິທໍາເມືອງ ໄດ້ສະຫລຸບຜົນການເຄື່ອນໄຫວຈັດຕັ້ງປະຕິບັດ ການເປີດ ການຮຽນ-ການສອນ ແລະ ຜົນສຳເລັດ ເຊິ່ງໄດ້ເລີ່ມ ແຕ່ວັນທີ 13 ກຸມພາ 2018 ຫາ ວັນທີ 04 ພຶດສະພາ 2018 ຈຶ່ງໄດ້ສຳເລັດ, ເຊິ່ງມີເຂົ້າຮຽນ ທັງໝົດ 57 ຄົນ, ຍິງ 09 ຄົນ. ໃນນັ້ນ ສະຖາບັນ ຍຸຕິທໍາແຫ່ງຊາດ ພາກກາງ ຍັງໄດ້ຜ່ານຂໍ້ຕົກລົງ ຂອງທ່ານ ຫົວໜ້າສະຖາບັນ ຍຸຕິທຳແຫ່ງຊາດ ວ່າດ້ວຍການ ຕົກລົງອອກໃບປະກາສະນີຍາບັດ ໃຫ້ຜູ້ສຳເລັດການຮຽນກົດໝາຍຊັ້ນຕົ້ນ ປີ 2018 ນີ້, ພ້ອມດຽວກັນນັ້ນ ທ່ານ ຈັນທາ ພົມມະສອນ ຫົວໜ້າພະແນກ ຍຸຕິທຳແຂວງ ຄຳມ່ວນ ກໍ່ໄດ້ ມອບໃບປະກາສະນີຍາບັດ ກົດໝາຍຊັ້ນຕົ້ນ ໃຫ້ກັບ ບັນດາຜູ້ທີ່ສຳເລັດການສືກສາກົດໝາຍຊັ້ນຕົ້ນ ປະຈຳສົກປີ 2017-2018 ແລະ ຍັງໄດ້ມອບໃບຍ້ອງຍໍ ໃຫ້ກັບ ບັນດາຫ້ອງການ, ຂະແໜງການຕ່າງໆ ແລະ ບຸກຄົນ ທີ່ໄດ້ປະກອບສ່ວນເຂົ້າໃນການຈັດຕັ້ງປະຕິບັດວຽກງານດັ່ງກ່າວໃຫ້ໄດ້ຮັບຜົນສຳເລັດເປັນຢ່າງດີ.
ຕອນທ້າຍພິທີ ທ່ານເຈົ້າເມືອງໆບົວລະພາ ທ່ານກໍ່ໄດ້ສະແດງ ຄວາມຍ້ອງຍໍຊົມເຊີຍມາຍັງ ການນຳຂັ້ນແຂວງ, ຂັ້ນເມືອງ ແລະ ພໍ່ແມ່ປະຊາຊົນ ທີ່ໄດ້ປະກອບສ່ວນ ເຫື່ອແຮງ ຈິດໃຈ ວັດຖຸ ແລະ ທຶນຮອນ ເຂົ້າໃນການຈັດຕັ້ງປະຕິບັດວຽກງານຍຸຕິທຳໃນຄັ້ງນີ້, ພ້ອມກັນນັ້ນ ທ່ານ ກໍ່ໄດ້ຮຽກຮ້ອງໃຫ້ ບັນດາຜູ້ທີ່ໄດ້ສຳເລັດການຮຽນຕ້ອງໄດ້ນຳເອົາຄວາມຮູ້ທີ່ຕົນຮຽນມາ ນຳໄປຈັດຕັ້ງຜັນຂະຫຍາຍໃຫ້ເກີດດອກອອກຜົນເປັນຢ່າງດີຢູ່ໃນແຕ່ລະທ້ອງຖີ່ນຮາກຖານບ້ານ.
Editor: ນັກຂ່າວເມືອງບົວລະພາ
