ເພື່ອລະນຶກເຖິງຄຸນງາມຄວາມດີ ແລະ ຄວາມສະຫລຽວສະຫລາດຂອງບັນດາຜູ້ນຳ ໃນການຜ່າວົງປິດລ້ອມຂອງກອງພັນທີ 2 ແລະ ໂຕນຄຸກຢ່າງມະຫັດສະຈັນຂອງຜູ້ນຳພັກ-ລັດ. ດັ່ງນັນ, ໃນທ້າຍເດືອນພຶດສະພາທີ່ຜ່ານມາ ຢູ່ທີ່ ສະໂມສອນ ເມືອງນາຊາຍທອງ, ນະຄອນຫລວງວຽງຈັນ ໄດ້ຈັດພິທີປາຖະກະຖາ ລະນຶກວັນຜ່າວົງປິດລ້ອມຂອງກອງພັນທີ 2 ວິລະຊົນ ທີທົ່ງໄຫຫີນຊຽງຂວາງ ຄົບຮອບ 59 ປີ ຄື: ວັນທີ 18 ພຶດສະພາ 1959 - 18 ພຶດສະພາ 2018 ແລະ ວິລະກຳໂຕນຄຸກຢ່າງມະຫັດສະຈັນຂອງຜູ້ນຳພັກ ແລະ ແນວລາວຮັກຊາດ ຄົບຮອບ 58 ປີ ວັນທີ 24 ພຶດສະພາ 1960- 24 ພຶດສະພາ 2018 ໃຫ້ກຽດປາຖະກະຖາໂດຍທ່ານ ພັນເອກ ດວງດີ ພົມມະລີ ອະດີດກໍາມະການພັກ ກົມໃຫຍ່ເສນາທິການ ກະຊວງປ້ອງກັນປະເທດ, ມີຄະນະພັກ ຄະນະນໍາ ພະນັກງານ-ລັດຖະກອນ, ນັກຮຽນນັກສຶກສາ ເຂົ້າຮ່ວມຮັບຟັງ.
ທ່ານ ພັນເອກ ດວງດີ ພົມມະລີ ອະດີດກໍາມະການພັກ ກົມໃຫຍ່ເສນາທິການ ກະຊວງປ້ອງກັນປະເທດ, ໄດ້ຍົກໃຫ້ເຫັນປະຫວັດຄວາມເປັນມາ ສະພາບການຖືກປິດລ້ອມຂອງກອງພັນທີ 2 ຊຶຶ່ງບັນດາຜູ້ນຳໄດ້ຊອກທຸກວິທີທາງ ເພື່ອຜ່າວົງປິດລ້ອມໄປໄດ້ຢ່າງປອດໄພ ຕໍ່ກັບສະພາບການຜັນແປຢ່າງຂ້ຽວຂາດ ແຕ່ບັນດາຜູ້ນຳກໍ່ບໍ່ລົດລະຄວາມພະຍາຍາມ ໃນການປຸກລະດົມຂົນຂວາຍກຳລັງທະຫານ ເພື່ອຕິດຕາມສະພາບການຕ່າໆ ດ້ວຍຄວາມອົດທົນພະຍາຍາມ ຄວາມສາມັກຄີປອງດອງ ຄວາມສະຫລຽວສະຫລາດຂອງບັນດາຜູ້ນຳກຳລັງປະກອບອາວຸດ ຈົນສາມາດຜ່າວົງປິດລ້ອມໄດ້ຢ່າງປອດໄພ, ນອກນິີ້ ກໍ່ໄດ້ຍົກໃຫ້ເຫັນຄວາມອົດທົນພະຍາຍາມ ໃນການເຕົ້າໂຮມກໍາລັງທະຫານ ເພື່ອຄັດເລືອກເອົາພະນັກງານຂັ້ນສູງສຸດຂອງແນວລາວຮັກຊາດ ຜ່ານການເຄື່ອນໄຫວດ້ວຍຄວາມຫຍຸ້ງຍາກ ລະອິດລະອ້ຽວ ໃນການຫລອກລວງ ຕີຕ້ານພວກສັດຕູລູກແຫລ່ງຕີນມືຂອງພວກຈັກກະພັດຕ່າງດ້າວດ້ວຍຫລາຍຮູບການ ຈົນສາມາດໂຕນອອກຈາກຄຸກໂພນເຄັງ ແລ້ວກັບຄືນສູ່ເຂດທີ່ຫມັ່ນໄດ້ຢ່າງປອດໄພ.
ຊຶ່ງການປາຖະກະຖາໃນຄັ້ງນີ້ ເພື່ອແນ່ໃສ່ເຮັດໃຫ້ພະນັກງານ-ລັດຖະກອນ ພາຍໃນເມືອງນາຊາຍທອງ, ນະຄອນຫລວງວຽງຈັນ ໄດ້ຮັບຮູ້ເຂົ້າໃຈຕໍ່ຜົນງານການເຄື່ອນໄຫວ ຂອງຜູ້ນຳພັກ-ລັດ ແລະ ພ້ອມກັນເຊີດຊູມູນເຊື້ອໃຫ້ຄົນຮຸ້ນຫລັງໄດ້ຮຽນຮູ້ຕໍ່ຜົນງານດັ່ງກ່າວ.
Editor: ຕະວັນ ແສງສະຫວັນ
