ໃນວັນທີ່ 31 ພຶດສະພາ 2018 ນີ້ ກອງບັນຊາການ ປກສ ແຂວງບໍ່ແກ້ວ ໄດ້ຈັດພິທີປິດຊຸດຮຽນສະໜັບສະໜູນ ແລະ ລະບຽບພັກຂຶ້ນຢ່າງເປັນທາງການ ຢູ່ທີ່ຫ້ອງປະຊຸມກອງບັນຊາການ ປກສ ແຂວງບໍ່ແກ້ວ ໂດຍການເປັນປະທານຂອງທ່ານ ພັນໂທ ວຽງແກ້ວ ພົມມະໃຈ ຫົວໜ້າຫ້ອງການເມືອງ ປກສ ແຂວງບໍ່ແກ້ວ, ມີບັນດາຫົວໜ້າຫ້ອງ, ຮອງຫ້ອງ, ຫົວໜ້າພະແນກ, ຮອງພະແນກ ພ້ອມດ້ວຍນັກສໍາມະນາກອນອ້ອມຂ້າງກອງບັນຊາການເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ພັນໂທ ອໍາພອນ ບັນນຸສິດ ຮອງຫ້ອງການເມືອງ ກໍ່ໄດ້ຂຶ້ນຜ່ານບົດສະຫຼຸບໃນການດໍາເນີນການເປີດຮຽນລະບຽບຂອງພັກ ແລະ ເອກະສານໂຄງການ 5 ບົດ ໃຫ້ມະຫາຊົນຜູ້ທີ່ກ້າວໜ້າ ທີ່ເປັນເປົ້າໝາຍຂະຫຍາຍເຂົ້າພັກ. ໃນບົດສະຫຼຸບໄດ້ຍົກໃຫ້ເຫັນເຖິງການເອົາໃຈໃສ່ໃນການຄົ້ນຄວ້າຮ່ຳຮຽນຂອງບັນດານັກສຳມະນາກອນ. ນອກຈາກນີ້, ທາງຄະນະຄູສອນ ຍັງໄດ້ໃຫ້ນັກສຳມະນາກອນຂຽນບົດເກັບກ່ຽວຂອງຕົນເອງ ໃນການຖອດຖອນແລກປ່ຽນບົດຮຽນກັບບັນດາຄູ-ອາຈານ ໂດຍການຈັດແບ່ງເປັນຈຸເປັນໜ່ວຍຄົ້ນຄວ້າ ເຫັນວ່າແຕ່ລະຄົນແມ່ນໄດ້ມີການປະກອບຄໍາຄິດ-ຄໍາເຫັນໃສ່ບັນດາບົດຮຽນຕ່າງໆໄດ້ດີພໍສົມຄວນ.
ໃນພິທີຍັງໄດ້ມີການມອບໃບຍັ້ງຢືນໃຫ້ແກ່ນັກສໍາມະນາກອນ ທີ່ຜ່ານການຮໍ່າຮຽນ ສະນັບສະໜູນ ແລະ ລະບຽບພັກ ລວມທັງໝົດມີ 106 ສະຫາຍ, ຍິງ 18 ສະຫາຍ. ໃນນັ້ນ, ປະກອບມີ: ຜູ້ຮຽນສະໜັບສະໜູນ 65 ສະຫາຍ, ຍິງ 17 ສະຫາຍ, ລະບຽບພັກ 41 ສະຫາຍ, ຍິງ 01 ສະຫາຍ.
ຕອນທ້າຍຂອງພິທີທ່ານປະທານ ຍັງໄດ້ໂອ້ລົມຕໍ່ບັນດານັກສໍາມະນາກອນ ໂດຍໄດ້ເນັ້ນໜັກໃສ່ວຽກງານການຂະຫຍາຍພັກ ແລະ ຍົກໃຫ້ເຫັນເຖິງຄວາມສຳຄັນຂອງພັກໃນການຈັດຕັ້ງປະຕິບັດ ແລະ ພ້ອມກັນເປັນເຈົ້າການໃນການສ້າງຕົນເອງໃຫ້ກາຍເປັນສະມາຊິກຜູ້ທີ່ດີຂອງພັກໃນຕໍ່ໜ້າ.
Editor: ປກສ ແຂວງບໍ່ແກ້ວ
