ກອງປະຊຸມ ຄົບຄະນະບໍລິຫານງານພັກເມືອງຫມື່ນ ຄັ້ງທີ 10 ສະໄຫມທີ II ໄຂຂຶ້ນ ແລະ ອັດລົງ ໃນວັນທີ 6 ມີຖຸນາ 2018 ນີ້ ຢູ່ທີ່ສະໂມສອນໃຫຍ່ ຫ້ອງວ່າການ ປົກຄອງເມືອງຫມື່ນ ແຂວງວຽງຈັນ. ໂດຍການເປັນປະທານ ຂອງສະຫາຍ ພູວອນ ບຸນວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຫມື່ນ, ທ່ານ ບຸນໄທ ອ່ອນວິເນດ ຮອງເລຂາພັກເມືອງ ປະທານກວດກາພັກ - ລັດ ເມືອງຫມື່ນ, ເປັນກຽດເຂົ້າຮ່ວມຂອງສະຫາຍ ນາງ ຮັງລີ ແກ້ວວິໄລສັກ ສະມາຊິກສະພາປະຊາຊົນແຂວງວຽງຈັນ ເຂດເລືອກຕັ້ງເມືອງຫມື່ນ , ມີບັນດາຄະນະປະຈຳພັກເມືອງ, ກຳມະການພັກເມືອງ ,ພະນັກງານຫຼັກແຫຼ່ງຂອງເມືອງ, ເລຂາໜ່ວຍພັກບ້ານ-ນາຍບ້ານ ທົ່ວເມືອງເຂົ້າຮ່ວມຢ່າງພ້ອມພຽງ.
ສະຫາຍ ພູວອນ ບຸນວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຫມື່ນ ໄດ້ ຜ່ານບົດລາຍງານການຊີ້ນຳ-ນຳພາລວມຂອງຄະນະບໍລິຫານງານພັກເມືອງໄລຍະ 3 ເດືອນຜ່ານມາ ແລະ ທິດທາງແຜນການຕໍ່ໜ້າ, ຜ່ານບົດສະຫຼຸບຕີລາຄາຜົນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະ 3 ເດືອນຜ່ານມາ ແລະ ທິດທາງແຜນການ ໂດຍ ສະຫາຍ ພອນເທີດ ສຸຫວັດດີ ຄະນະປະຈຳພັກເມືອງ ຮອງເຈົ້າເມືອງ - ເມືອງຫມື່ນ. ໄລຍະ 3 ເດືອນຜ່ານມາ ໄດ້ສຸມໃສ່ຊີ້ນໍາ-ນໍາພາຈັດຕັ້ງປະຕິບັດແນວທາງປ່ຽນແປງໃໝ່ ທີ່ມີຫຼັກການຂອງພັກ, ໂຄງການດຳເນີນງານຂອງອົງຄະນະພັກແຂວງ ກໍ່ຄືຂອງອົງຄະນະພັກເມືອງຫມື່ນ ສືບຕໍ່ຜັນຂະຫຍາຍ ມະຕິຄຳສັ່ງ, ຄຳແນະນຳ ແລະ ນິຕິກຳ ທີ່ສຳຄັນຂອງກົມການເມືອງ ສູນກາງພັກ ກໍຄື ອົງຄະນະພັກແຂວງວຽງຈັນ ເຂົ້າສູ່ພຶດຕິກຳຕົວຈິງ ແຕ່ລະຂົງເຂດວຽກງານ ແລະ ຂັ້ນຮາກຖານບ້ານ ດ້ວຍການຫັນເປັນແຜນການ, ໂຄງການລະອຽດ ເຮັດໃຫ້ແນວທາງຂອງພັກ, ລະບຽບກົດໝາຍຂອງລັດໄດ້ຮັບການຈັດຕັ້ງປະຕິບັດ ແລະ ມີໝາກຜົນຕົວຈິງ. ໄດ້ລົບລ້າງການປູກໄມ້ວິກຂອງປະຊາຊົນ ເພື່ອສະກັດກັ້ນການຈັບຈອງທີ່ດິນແບບບໍ່ຖືກຕ້ອງ ແລະ ເປັນການທຳລາຍປ່າໄມ້ ໄກ່ເກ່ຍສິ່ງກີດຂວາງ ເພື່ອອຳນວຍຄວາມສະດວກໃນການກໍ່ສ້າງຊົນລະປະທານ ນ້ຳຂວາງ, ສ້າງແຜນຄຸ້ມຄອງປ່າໄມ້ ເຄື່ອງປ່າຂອງດົງຂັ້ນບ້ານ ປະຕິບັດຄຳສັ່ງເລກທີ 15 /ນຍ ຢ່າງເຂັ້ມງວດ, ເຮັດໃຫ້ເມືອງໝື່ນ ມີສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວຕໍ່ເນື່ອງ ຊີວິດການເປັນຢູ່ຂອງປະຊາຊົນບັນດາເຜົ່າແມ່ນມີທ່າດີຂຶ້ນ ສະເລ່ຍລາຍຮັບຕໍ່ຫົວຄົນໄດ້ 13,833,729 ກີບ/ປີ ເທົ່າກັບ 1,729 ໂດລາສະຫາລັດ, ເຂົ້າກິນຕໍ່ຫົວຄົນໄດ້ 510 ກິໂລ ຕໍ່ຄົນ/ປີ , ຈັງຫວະການຂະຫຍາຍຕົວເສດຖະກິດຂອງເມືອງແມ່ນ 10,75% ເຊິ່ງສະແດງອອກແຕ່ລະຂະແໜງການຄື: ຂົງເຂດກະສິກຳ 10%, ຂົງເຂດອຸດສາຫະກຳ 12%, ຂົງເຂດບໍລິການ 11%, ຄອບຄົວທຸກຍາຍັງເຫຼືອ 81 ຄອບຄົວ, ເທົ່າກັບ 0,13%. ຈາກນັ້ນ ກອງປະຊຸມຍັງໄດ້ຮັບຟັງ ຮາກຖານບ້ານ, ຂະແໜງການຂັ້ນເມືອງ ແລະ ຄະນະປະຈໍາພັກເມືອງ ຂຶ້ນປະກອບຄຳຄິດຄຳເຫັນໃສ່ກອງປະຊຸມຢ່າງກົງໄປກົງມາ
ກອງປະຊຸມຍັງໄດ້ຮັບຟັງການໂອ້ລົມ ຈາກສະຫາຍ ພູວອນ ບຸນວິໄລ ກຳມະການພັກເເຂວງ ເລຂາພັກເມືອງ ເຈົ້າເມືອງ - ເມືອງໝື່ນ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະ ທີ່ພ້ອມກັນຍາດມາໄດ້ໃນໄລຍະ 3 ເດືອນຜ່ານມາ ພ້ອມທັງເນັ້ນໜັກໃຫ້ ຈັດຕັ້ງປະຕິບັດມະຕິ ກອງປະຊຸມໃຫຍ່ຄັ້ງທີ່ 10 ຂອງພັກ, ມະຕິ 5 ຂອງອົງຄະນະພັກແຂວງວຽງຈັນ ແລະ ມິຕິ 2 ຂອງອົງຄະນະພັກເມືອງໝື່ນ ແລະ ນໍາເອົາເນື້ອໃນຈິດໃຈກອງປະຊຸມຄົບຄະນະໃນຄັ້ງນີ້ ໄປຈັດຕັ້ງຜັນຂະຫຍາຍ ເປັນທິດທາງແຜນການລະອຽດ ເພື່ອນຳພາ ພະນັກງານ ສະມາຊິກພັກ, ປະຊາຊົນ ບັນດາເຜົ່າຈັດຕັ້ງປະຕິບັດໃຫ້ປະກົດຜົນເປັນຈິງ.
Editor: ນັກຂ່າວເມືອງຫມື່ນ
