ເມື່ອບໍ່ດົນນີ້ ສະຫະພັນແມ່ຍິງເມືອງຊົນນະບູລີ, ແຂວງສະຫວັນນະເຂດ ໄດ້ຮັບນາມມະຍົດເປັນແມ່ຍິງ 3 ດີ. ຄັ້ງທີ 1 ຊຶ່ງພິທີໄດ້ຈັດຂຶ້ນຢູ່ທີ່ສະໂມສອນຂອງເມືອງ ໂດຍການເປັນປະທານຂອງທ່ານ ສຸວິໄລ ຫຼວງຊະລາດ ຫົວໜ້າຄະນະຈັດຕັ້ງເມືອງ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຄະນະຫ້ອງການ, ພ້ອມດ້ວຍສະມາຊິກສະຫະພັກແມ່ຍິງໃນທົ່ວເມືອງເຂົ້າຮ່ວມ.
ທ່ານນາງ ບົວບານ ອິນທິລາດ ຮອງປະທານສະຫະພັນແມ່ຍິງເມືອງ ໄດ້ຜ່ານບົດສະຫຼຸບ ຕີລາຄາການຈັດຕັ້ງປະຕິບັດຂະບວນການແຂ່ງຂັນ 3 ດີໄລຍະ 2 ປີ (2015-2017) ແລະ ທິດທາງແຜນການໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ໄລຍະທີ 2 ປີ (2018-2019) ໂດຍໃຫ້ຮູ້ວ່າ: ໃນທົ່ວເມືອງຊົນນະບູລີ ມີອົງການຈັດຕັ້ງສະຫະພັນແມ່ຍິງ ປະກອບມີ 7 ຮາກຖານ ມີ 19 ໜ່ວຍຂຶ້ນກັບ, ມີ 25 ໜ່ວຍອ້ອມຂ້າງເມືອງ, ສໍາລັບຢູ່ຂັ້ນບ້ານປະກອບມີ 62 ບ້ານ, ໃນນັ້ນມີສະມາຊິກສະຫະພັນແມ່ຍິງທັງໝົດ 5.083 ຄົນ, ຢູ່ພື້ນຖານການຜະລິດ 4.687 ຄົນ, ພະນັກງານສັງກັດລັດ 396 ຄົນ. ສະຫະພັນແມ່ຍິງເມືອງໄດ້ຈັດຕັ້ງປະຕິບັດຂໍ້ແຂ່ງຂັນ 3 ດີ ໄປຄຽງຄູ່ກັບຂະບວນການແຂ່ງຂັນຮັກຊາດ ແລະ ພັດທະນາຂະບວນການຕ່າງໆຂອງພັກ-ລັດ. ໃນໂອກາດດັ່ງກ່າວ ທ່ານ ວົນໃຈ ຖິ່ນທອງສີ ຫົວໜ້າຫ້ອງການພາຍໃນເມືອງ ກໍ່ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 150/ ຈມ.ຊນລ ລົງວັນທີ 14/5/2018 ວ່າດ້ວຍການຢັ້ງຢືນ ແລະ ຮັບຮອງເອົາເມືອງຊົນນະບູລີເປັນສະຫະພັນແມ່ຍິງເມືອງ 3 ດີ ຄັ້ງທີ 1 ແລະ ຂໍ້ຕົກລົງຂອງທ່ານເຈົ້າເມືອງສະບັບເລກທີ 130/ຈມ,ຊນລ ລົງວັນທີ 3/5/2018 ວ່າດ້ວຍການອອກໃບຢັ້ງຢືນເອົາບ້ານປະຕິບັດສິດສະເໝີພາບຍິງ-ຊາຍ ແລະ ປະສະຈາກການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ຈໍານວນ 7 ບ້ານ ແລະ ຂໍ້ຕົກລົງຂອງປະທານສະຫະພັນແມ່ຍິງແຂວງ ສະບັບເລກທີ 392 ລົງວັນທີ 1/5/218 ວ່າດ້ວຍການຮັບຮອງເອົາສະຫະພັນແມ່ຍິງເມືອງຊົນນະບູລີເປັນສະຫະພັນແມ່ຍິງເມືອງ 3 ດີ ຂອງແຂວງສະຫວັນນະເຂດໄລຍະ I ປີ 2015-2017
Editor: ກຳປານາດ ລັດຖະເຮົ້າ
