ເມື່ອບໍ່ດົນມານີ້ ຢູ່ຫ້ອງປະຊຸມສານປະຊາຊົນເຂດ 3 ເມືອງເຊໂປນ ໄດ້ຈັດກອງປະຊຸມຂື້ນແຜນກໍານົດພະນັກງານນໍາພາຄຸ້ມຄອງຂື້ນຢ່າງເປັນທາງການ, ໂດຍການເປັນປະທານຂອງ ທ່ານ ດໍາ ຫຼວງສົມພົງ ຄະນະປະຈໍາພັກເມືອງ, ຫົວໜ້າຄະນະຈັດຕັ້ງເມືອງ, ທ່ານ ປະລິນຍາເອກ ພູຄໍາ ເລນິນປະທານສານປະຊາຊົນແຂວງ, ທ່ານ ບົວພັນ ສີລາດວງໃຈ ປະທານສານປະຊາຊົນເຂດ 3 ເມືອງ ເຊໂປນ, ເຂົ້າຮ່ວມມີບັນດາຫົວໜ້າ, ຄະນະຫ້ອງການສານ, ໜ່ວຍງານຕ່າງໆພ້ອມດ້ວຍພະນັກງານເຂົ້າຮ່ວມຢ່າງພ້ອມພຽງ,

ໃນກອງປະຊຸມກໍ່ໄດ້ຜ່ານມະຕິຂອງກົມການເມືອງສູນກາງພັກ ສະບັບເລກທີ 030/ກມສພ, ເລກທີ 032/ກມສພ, ຜ່ານບັນດາມາດຖານເງື່ອນໄຂຜູ້ທີ່ຈະຖືກຄັດເລືອກມາປະກອບໃສ່ໂຄ່ງຮ່າງການຈັດຕັ້ງກໍ່ຄືປະທານ, ຮອງປະທານສານປະຊາຊົນເຂດ 3 ເມືອງເຊໂປນ, ເຊີ່ງຕ້ອງແມ່ນບຸກຄົນທີ່ມີນໍ້າໃຈຮັບໃຊ້ຊາດ, ຮັບໃຊ້ປະຊາຊົນຢ່າງແທ້ຈິ່ງ, ມີຄວາມຈົ່ງຮັກພັກດີຕໍ່ພັກ, ມີສະຕິຕໍ່ການຈັດຕັ້ງ,ປະຕິບັດລະບຽບວິໄນຢ່າງເຂັ້ມງວດ ແລະ ມີປະຫວັດຈະແຈ້ງ, ມີການດໍາລົງຊິວິດປອດໃສຂາວສະອາດ, ມີຄວາມສາມັກຄີເປັນເອກະພາບບົນພື້ນຖານແນວທາງນະໂຍບາຍຂອງພັກ, ມີທັດສະນະມະຫາຊົນ, ມີວີຊາສະເພາະໃດໜຶ່ງທີ່ແນ່ນອນສາມາດຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ, ມີຄວາມຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບການມອບໝາຍ, ປະຕິບັດມະຕິຄໍາສັ່ງ, ມີສຸຂະພາບແຂງແຮງດີ, ສາມາດຮັບພາລະໜ້າທີ່ທີ່ການຈັດຕັ້ງມອບໝາຍໃຫ້ເປັນຢ່າງດີແລະແນະນໍາບັດທາບທາມ, ວີທີຂີດບັດ, ຈາກນັ້ນບັນດາທ່ານທີ່ເຂົ້າຮ່ວມກອງປະຊຸມຍັງໄດ້ນໍາໃຊ້ສິດປະຊາທິປະໄຕຂອງຕົນເພື່ອຄັດເລືອກເອົາປະທານ, ຮອງປະທານສານປະຊາຊົນເຂດ 3 ຄົນໃໝ່ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່

ຂ່າວຍັງແຈ້ງຕື່ມອີກວ່າ: ຢູ່ສະໂມສອນເມືອງໄດ້ຈັດກອງປະຊຸມເຜີຍແຜ່ກົດໝາຍໃນຫົວຂໍ້ ຈະເຂົ້າຫາຂະບວນການຍຸຕິທໍາ ໄດ້ແນວໃດ ແລະ ກົດໝາຍວ່າດ້ວຍສານປະຊາຊົນຂື້ນຢ່າງເປັນທາງການ, ໂດຍການເປັນປະທານຂອງທ່ານດໍາ ຫຼວງສົມພົງຄະນະປະຈໍາພັກເມືອງ, ຫົວໜ້າຄະນະຈັດຕັ້ງເມືອງ, ທ່ານປະລິນຍາເອກ ພູຄໍາ ເລນິນ ປະທານສານປະຊາຊົນແຂວງ, ມີບັນດາທ່ານຫົວໜ້າ,ຄະນະຫ້ອງການອອ້ມຂ້າງ, ຫົວໜ້າຈຸດສຸມ, ກຸ່ມບ້ານ, ຄະນະບ້ານອອ້ມຂ້າງພ້ອມດ້ວຍພະນັກງານຫ້ອງການສານປະຊາຊົນເຂດ 3 ເຂົ້າຮ່ວມຢ່າງພ້ອມພຽງ

Editor: ກຳປານາດ ລັດຖະເຮົ້າ