ໃນວັນທີ 7 ມີຖຸນາ 2018 ທີ່ນະຄອນຫລວງວຽງຈັນ ສະຫະພາບເອີຣົບ(EU) ແລະ ສປປ ລາວ ໄດ້ຈັດກອງປະຊຸມເຈລະຈາຊ່ອງໜ້າ ຄັ້ງທີ 2 ສໍາລັບແຜນງານການຈັດຕັ້ງປະຕິບັດ ກົດຫມາຍປ່າໄມ້, ການຄຸ້ມຄອງ ແລະ ການຄ້າໄມ້, ເພື່ອກາຍເປັນຄູ່ສັນຍາການຄ້າໄມ້ແບບສະໝັກໃຈ. ເຊີ່ງເປົ້າຫມາຍຂອງສັນຍາດັ່ງກ່າວ ແມ່ນເພື່ອກວດກາຢັ້ງຢືນຄວາມຖືກຕ້ອງ ທາງດ້ານລະບຽບກົດຫມາຍ ຂອງຜະລິດຕະພັນໄມ້ ທີ່ຜ່ານການຂຸດຄົ້ນ,ນໍາເຂົ້າ,ປຸງແຕ່ງ ແລະ ສົ່ງອອກໂດຍ ສປປ ລາວ. ແຜນງານດັ່ງກ່າວ ແມ່ນເປັນການສົ່ງເສີມໃຫ້ແກ່ການຄ້າຜະລິດຕະພັນໄມ້, ປັບປຸງການຄຸ້ມຄອງປ່າໄມ້ ແລະ ທັງເປັນການປະກອບສ່ວນໃນການສະກັດກັ້ນ ການຕັດໄມ້ ທີ່ຜິດກົດຫມາຍ.

ລັດຖະບານ ສປປ ລາວ ມີຄວາມຕັ້ງໃຈ ແລະ ໃຫ້ຄໍາເຊື່ອໝັ້ນໃນການສະກັດກັ້ນການຕັດໄມ້ທີ່ຜິດກົດຫມາຍ ແລະ ເອົາໃຈໃສ່ແກ້ໄຂບັນດາຜົນກະທົບ ທີ່ສົ່ງຜົນຕໍ່ສັງຄົມ, ເສດຖະກິດ ແລະ ສິ່ງແວດລ້ອມ. ທ່ານ ປອ ພວງປະຣິສັກ ປຣະວົງວຽງຄໍາ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ກ່າວວ່າ: ການຈັດຕັ້ງປະຕິບັດຄໍາສັ່ງຂອງນາຍົກລັດຖະມົນຕີ ສະບັບເລກທີ 15/ນຍ ທີ່ກໍາລັງດໍາເນີນຢູ່ ເຊີ່ງໄດ້ສຸມໃສ່ການເພີ່ມທະວີຄວາມເຂັ້ມງວດ ໃນການຄຸ້ມຄອງການຂຸດຄົ້ນໄມ້, ການກວດກາ, ການຂົນສົ່ງ ແລະ ການຄ້າໄມ້. ແມ່ນເຫັນໄດ້ເຖິງຄວາມຄຶບຫນ້າຈາກການຈັດຕັ້ງປະຕິບັດດັ່ງກ່າວ ຄໍາສັງ 15/ນຍ ແລະ ແຜນການຈັດຕັ້ງປະຕິບັດກົດຫມາຍປ່າໄມ້, ການຄຸມຄອງ ແລະ ການຄ້າໄມ້ ເພື່ອກາຍເປັນຄູ່ສັນຍາການຄ້າໄມ້ແບບສະໝັກໃຈ ເຊີ່ງເປັນ 2 ວຽກທີ່ມີການເຊື່ອມໂຍງ ແລະ ສະໜັບສະໜູນເຊີ່ງກັນ ແລະ ກັນ.

ການເຈລະຈາ ຊ້ອງຫນ້າ ຄັ້ງທີ 2 ລະຫວ່າງ ສະຫາພາບເອີຣົບ ແລະ ສປປ ລາວ ຄັ້ງນີ້, ໄດ້ເປັນຂິດຫມາຍໃນການຜັນຂະຫຍາຍນະໂຍບາຍການຄຸ້ມຄອງປ່າໄມ້ ລວມທັງເປັນການປັບປຸງຕ່ອງໂສ້ ການສະໜອງໄມ້, ນອກຈາກນັ້ນ ຍັງເປັນການສະຫລຸບຜົນບັນດານະໂຍບາຍ ແລະ ຫນ້າວຽກທີ່ເປັນບູລິມະສິດ ຂອງ ສປປ ລາວ ເພື່ອກະກຽມໃຫ້ແກ່ ວີພີເອ (VPA) ການເຈລະຈາຂ້ອງຫນ້າ ຄັ້ງທີ 2 ສໍາລັບແຜນງານ ວີພີເອ ລະຫວ່າງ ສປປ ລາວ ແລະ ສະຫາພາບ ເອີຣົບ (EU) ແມ່ນປະກອບດ້ວຍ 2 ວາລະການດໍາເນີນກອງປະຊຸມ ເຊີ່ງປະກອບດ້ວຍກອງປະຊຸມຮ່ວມ ດ້ານວິຊາການ (JEM) ແລະ ກອງປະຊຸມເຈລະຈາຊ້ອງຫນ້າ (TWG) ໂດຍການເປັນປະທ່ານຮ່ວມ ຂອງ ທ່ານ ປອ ພວງປະຣິສັກ ປຣະວົງວຽງຄໍາ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ແລະ ທ່ານ ໂຣເຮ ຣອດຣິເກັດສ ຮອງຫົວຫນ້າຫນ່ວຍງານ ທັງເປັນຫົວຫນ້າຮັບຜິດຊອບວຽກງານທາງດ້ານສິ່ງແວດລ້ອມ, ຄະນະກໍາມາທິການ ສະຫາພາບເອີຣົບ (EU)

Editor: ກຳປານາດ ລັດຖະເຮົ້າ

{gallery}News/sbd/2018/06/10/sbd-01{/gallery}