ກອງປະຊຸມຄົບຄະນະຂອງຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງວຽງຈັນ ໄດ້ຈັດຂຶ້ນໃນວັນທີ 6 ມິຖຸນາ 2018 ຜ່ານມາ ໂດຍການເປັນປະທານຂອງ ທ່ານ ພັນເອກ ສີນວນ ພົມມະຈັນ ປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງ ກັນຄວາມສະຫງົບສະພາປະຊາຊົນແຂວງວຽງຈັນ, ເປັນກຽດເຂົ້າຮ່ວມ ມີບັນດາສະມາຊິກສະພາປະຊາຊົນແຂວງວຽງຈັນ ຊຸດທີ1 ແລະ ບັນດາພະແນການກ່ຽວຂ້ອງຂອງແຂວງເຂົ້າຮ່ວມ.
ທ່ານ ຈິດຕະວົງ ສີສົງຄາມ ຮອງປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ໄດ້ກ່າວໃນຮ່າງບົດສະຫຼູບການເຄື່ອນໄຫວປະຕິບັດໜ້າທີ່ ຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ປີ 2017 ແລະ ທິດທາງແຜນການ ປີ 2018 ວ່າ: ຜ່ານມາໄດ້ເປັນເຈົ້າການເຄື່ອນໄຫວຕາມພາລະບົດບາດ ໂດຍສະເພາະແມ່ນການຄົ້ນຄ້ວາ,ເກັບກຳຂໍ້ມູນ, ນໍາສະເໜີຄໍາຄິດເຫັນກ່ຽວກັບບັນຫາທີ່ສຳຄັນຕ່າງໆຂອງຊາດ, ຂອງແຂວງ ບັນຫາທີ່ຕິດພັນກັບຂົງເຂດຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ເພຶ່ອພິຈາລະນາ ແລະ ຕົກລົງບັນຫາສຳຄັນທີ່ຖືກຮັບຮອງເອົາໃນກອງປະຊຸມສະພາແຫ່ງຊາດ, ສະພາປະຊາຊົນແຂວງ ແລະ ກອງປະຊຸມຄົບຄະນະປະຈໍາສະພາປະຊາຊົນແຂວງ, ໃນປີ 2017 ໄດ້ຮັບຄຳຮ້ອງຂໍຄວາມເປັນທຳຂອງປະຊາຊົນຈຳນວນ 78 ເລື່ອງ, ໄດ້ພິຈາລະນາ ແລະ ນໍາສົ່ງໃຫ້ພາກສ່ວນກ່ຽວຂ້ອງເປັນຜູ້ແກ້ໄຂໄດ້ 67 ເລື່ອງ, ໃນນັ້ນລາຍງານໃຫ້ສະພາແຫ່ງຊາດ 1 ເລື່ອງ. ບັນຫາທີ່ພົ້ນເດັ່ນກວ່າໝູ່ແມ່ນ ບັນຫາຂໍ້ຂັດແຍ່ງກຳມະສິດທີ່ດິນ ແລະ ບັນຫາໜີ້ສິນ (ສັນຍາກູ້ຢືມເງິນ), ໄດ້ໃຫ້ຄຳປຶກສາທາງດ້ານກົດໝາຍ ແກ່ປະຊາຊົນທີ່ເຂົ້າມາຍື່ນຄຳຮ້ອງ ຫຼື ຄຳສະເໜີໄດ້ 205 ເທື່ອຄົນ, ໄດ້ເຂົ້າຮ່ວມກັບພາກສ່ວນທີ່ກ່ຽວຂ້ອງໃນການຄົ້ນຄວ້າປຶກສາຫາລື ກ່ຽວກັບຄຳຮ້ອງຂໍຄວາມເປັນທຳ ທີ່ມີຄວາມຫຍຸ້ງຍາກສັບສົບໄດ້ 7 ຄັ້ງ, ໄດ້ເປັນເຈົ້າການເປີດກອງປະຊຸມຮ່ວມ 5 ພາກສ່ວນໄດ້ 3 ຄັ້ງ, ໄດ້ເຂົ້າຮ່ວມກອງປະຊຸມປະກອບຄຳຄິດ-ຄຳເຫັນທາບທາມຮ່າງກົດໝາຍທີ່ພາກ ສ່ວນກ່ຽວຂ້ອງໄດ້ເຊີນ ແລະ ສະພາແຫ່ງຊາດຈັດຂຶ້ນຈຳນວນໜຶ່ງ.
ແຫລ່ງຂ່າວ ຈາກແຂວງວຽງຈັນ
Editor: ກຳປານາດ ລັດຖະເຮົ້າ
