ພິທີປະກາດຮັບຮອງເອົາປະຊາຊົນ ຈໍານວນ 364 ຄົນ, ຢູ່ເມືອງວຽງທອງ ແລະ ເມືອງ ຄໍາເກີດ ແຂວງບໍລິຄໍາໄຊ ເຂົ້າເປັນພົນລະເມືອງລາວ. ໄດ້ຈັດຂຶ້ນເມື່ອບໍ່ດົນນີ້, ຢູ່ທີຫ້ອງປະຊຸມ ຫ້ອງວ່າການປົກຄອງເມືອງວຽງທອງ, ພາຍໃຕ້ການເຂົ້າຮ່ວມເປັນປະທານຂອງ ທ່ານ ບຸນສະຫວາດ ບຸບຜາ ຮອງລັດຖະມົນຕີກະຊ່ວງຍຸຕິທໍາ, ທ່ານ ບຸນມາ ບຸຈະເລີນ ຮອງເຈົ້າແຂວງ ບໍລິຄໍາໄຊ, ມີທ່ານ ຫງວຽນ ຢຸຍຈ໋ຽນ ຮອງຫົວໜ້າ ຄະນະກໍາມະການຊາຍແດນແຫ່ງຊາດ, ກະຊວງການຕ່າງປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ. ມີບັນດາຕ່າງໜ້າຂະແໜ່ງການ ທີ່ກ່ຽວຂ້ອງຈາກສູນກາງ ແລະ ທ້ອງຖິ່ນ ສປປ ລາວ - ສສ ຫວຽດນາມ ຕະຫຼອດຮອດປະຊາຊົນ ຜູ້ໄດ້ຮັບອະນຸມັດໃຫ້ເປັນພົນລະເມືອງລາວ ຈາກບ້ານທີກ່ຽວຂ້ອງເຂົ້າຮ່ວມ.
ໂດຍປະຕິບັດຕາມຂໍ້ຕົກລົງຂອງລັດຖະບານ ແຫ່ງ ສປປ ລາວ. ແລະ ລັດຖະບານແຫ່ງ ສສ ຫວຽດນາມ. ວ່າດ້ວຍການແກ້ໄຂບັນຫາຜູ້ຍົກຍ້າຍ ຕັ້ງພູມລໍາເນົາຕາມລໍາພັງໃຈ ແລະ ແຕ່ງດອງບໍ່ຖືກຕ້ອງ ຢູ່ຕາມບໍລິເວນຊາຍແດນລາວ - ຫວຽດນາມ, ທີໄດ້ລົງນາມຮ່ວມກັນໃນວັນທີ 8 ກໍລະກົດ 2013 ທີ່ແຂວງ ເຫງະ ອານ ສສ ຫວຽດນາມ ແລະ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 191 ລົງວັນທີ 6 ກຸມພາ 2018. ກ່ຽວກັບການພິຈາລະນາຮັບຮອງເອົາຜູ້ຍົກຍ້າຍຕັ້ງພູມລໍາເນົາ ຕາມລໍາພັງໃຈ ແລະ ສ້າງຄອບຄົວບໍ່ຖືກຕ້ອງ ຕາມບໍລິເວນຊາຍແດນລາວ - ຫວຽດນາມ ເຂົ້າເປັນພົນລະເມືອງລາວ ແລະ ດ້ວຍຄວາມມຸງຫວັງຂອງພັກ ແລະ ລັດຖະບານ ລາວ ແລະ ຫວຽດນາມ. ທີ່ຢາກສ້າງໃຫ້ຊາຍແດນຂອງສອງປະເທດ ເປັນຊາຍແດນແຫ່ງສັນຕິພາບ, ມິດຕະພາບໝັ້ນຄົງ ແລະ ການຮ່ວມມືກັນຢ່າງຮອບດ້ານ, ເພຶ່ອປະກອບສ່ວນເຂົ້າໃນການປົກປັກຮັກສາຄວາມໝັ້ນຄົງຂອງຊາດ, ປັບປຸງຊີວິດການເປັນຢູ່ຂອງປະຊາຊົນສອງຊາດ ລາວ - ຫວຽດນາມ ທີ່ອາໃສຢູ່ຕາມສອງຝາກຊາຍແດນໃຫ້ຄວາມສະຫງົບສຸກ ແລະ ມີຊີວິດການເປັນຢູ່ທີດີຂຶ້ນ.
ມາຮອດປະຈຸບັນຫ້ອງວ່າການສໍານັກງານນາຍົກລັດຖະມົນຕີ. ແຫ່ງ ສ ປປ ລາວ ໄດ້ຮັບຮອງເອົາຈໍານວນຜູ້ຍົກຍ້າຍຕັ້ງພູມລໍາເນົາຕາມລໍາພັງ ແລະ ສ້າງຄອບຄົວບໍ່ຖືກລະບຽບການ ຕາມບໍລິເວນຊາຍແດນລາວຫວຽດນາມ ເຂົ້າເປັນພົນລະເມືອງລາວ ມີທັງໝົດ ຈໍານວນ 934 ຄົນ. ເຊິ່ງໃນນີ້ໄດ້ສໍາເລັດຈົດຄໍາຮ້ອງ ຂໍທະບຽນສັນຊາດລາວແລ້ວ 760 ຄົນ, ໄດ້ຈັດພິທີມອບ - ຮັບ ໃບທະບຽນສັນຊາດແລ້ວ ມີຈໍນວນ 276 ຄົນ. ຢູ່ເມືອງພູວົງ ແລະ ເມືອງຊານໄຊ, ແຂວງອັດຕະປຶ ຈໍານວນ 36 ຄົນ ແລະ ຢູ່ບ້ານວັງຫີນ, ເມືອງວຽງທອງ, ແຂວງບໍລິຄໍາໄຊ. ຈໍານວນ 240 ຄົນ.
ແຂວງບໍລິຄໍາໄຊ ຍັງໄດ້ຈັດພິທີປະກາດຮັບຮອງເອົາປະຊາຊົນ ຈໍານວນ 364 ຄົນ, ເຂົ້າເປັນພົນລະເມືອງລາວ. ເຊິ່ງໃນນີ້ແມ່ນຢູ່ບ້ານນາວັງໄຄ້ ແລະ ບ້ານອຸດົມໄຊ. ຢູ່ເມືອງວຽງທອງ ຈໍານວນ 112 ຄົນ. ແລະ ບ້ານນໍ້າທີ ແລະ ບ້ານນໍ້າພ້າວ, ເມືອງຄໍາເກີດ ຈໍານວນ 252 ຄົນ. ລວມທັງໝົດ ຈໍານວນທີໄດ້ມອບທະບຽນສັນຊາດແລ້ວມີ 640 ຄົນ. ສ່ວນຈໍານວນທີຍັງບໍ່ທັນມາຈົດທະບຽນມີ 174 ຄົນ. ທີ່ລັດຖະບານໄດ້ຮັບຮອງເອົາເຂົ້າເປັນພົນລະເມືອງລາວແລ້ວ, ເພຶ່ອເຮັດໃຫ້ພໍ່ແມ່ປະຊາຊົນທີ່ໄດ້ຮັບຮອງ ເປັນພົນລະເມືອງລາວ ສຶບຕໍ່ເອົາໃຈໃສ່ ໃນການປະກອບສ່ວນ ສ້າງສາພັດທະນາປະເທດຊາດ ເວົ້າລວມເວົ້າສະເພາະ ກໍ່ແມ່ນການສ້າງສາພັດທະນາເສດຖະກິດຄອບຄົວ ໃຫ້ດີຂຶ້ນເທຶ່ອລະກ້າວ ເພຶ່ອກາຍເປັນຄອບຄົວຕົວແບບໃນການສ້າງສາພັດທະນາ ແລະ ໃຫ້ປະຕິບັດຕາມລະບຽບກົດໝາຍຂອງ ສປປ ລາວ ຢ່າງເຂັ້ມງວດ.
ໃນພິທີອັນມີຄວາມໝາຍສໍາຄັ້ນດັ່ງກ່າວ ບັນດາຄະນະປະທານທີເຂົ້າຮ່ວມ ຍັງໄດ້ຜັດປ່ຽນກັນຂຶ້ນປະກອບຄໍາຄິດເຫັນ ໃຫ້ທິດຊີ້ນໍາຕື່ມອີກ.
ແຫລ່ງໂດຍ ສຸກທະວີ. ຖວທ ແຂວງບໍລິຄໍາໄຊ
Editor: ກຳປານາດ ລັດຖະເຮົ້າ
