ໃນອາທິດຜ່ານມານີ້ ຢູ່ທີ່ເມືອງບົວລະພາ ແຂວງຄຳມ່ວນ ໄດ້ຈັດພິທີປະກາດແຕ່ງຕັ້ງ ລະຫວ່າງ ເຈົ້າເມືອງຜູ້ເກົ່າ ແລະ ຜູ້ໃໜ່ ໂດຍການເປັນປະທານຂອງທ່ານ ພົມມາ ພັນທະລັງສີ ຫົວໜ້າຄະນະຈັດຕັ້ງແຂວງ, ທ່ານ ຄໍາເພົ່າ ທອງເທພາຮັກ ເຈົ້າເມືອງໆບົວລະພາ, ທ່ານ ປອ ແກ້ວອຸດອນ ບຸດສິງຂອນ ເລຂາຄະນະບໍລິຫານງານຊາວໝຸ່ມແຂວງ ພ້ອມດ້ວຍ ຄະນະປະຈໍາພັກເມືອງ, ຄະນະພັກເມືອງ, ຫົວໜ້າ, ຮອງຫົວໜ້າຫ້ອງການ ທຸກຂະແໜງການພາຍໃນເມືອງ ເຂົ້າຮ່ວມ.
ໃນພິທີທ່ານ ຄູນໄຊ ໄຟປັນຍາ ຫົວໜ້າຫ້ອງວ່າການປົກຄອງເມືອງ ໄດ້ຜ່ານມະຕິຕົກລົງ ຂອງຄະ ນະປະຈໍາພັກແຂວງ ແຂວງຄຳມ່ວນ ສະບັບເລກທີ 57/ຄປຈ.ຄມ, ລົງວັນທີ 23 ພຶດສະພາ 2018 ວ່າດ້ວຍການຍົກຍ້າຍ ທ່ານ ຄຳເພົ່າ ທອງເທພາຮັກ ໄປຮັບໜ້າທີ່ໃໝ່ ເປັນຫົວໜ້າພະແນກ ຍຸຕິທຳແຂວງຄຳມ່ວນ, ຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 58/ຄປຈ.ຄມ, ລົງວັນທີ23 ພຶດສະພາ 2018 ວ່າດ້ວຍການບົ່ງຕົວ ແຕ່ງຕັ້ງ ທ່ານ ປອ ແກ້ວອຸດອນ ບຸດສິງຂອນ ໄປຮັບໜ້າທີ່ ເຈົ້າເມືອງບົວລະພາ, ແລະ ຜ່ານ ຂໍ້ຕົກລົງ ຂອງທ່ານ ເຈົ້າແຂວງ ແຂວງຄຳມ່ວນ ສະບັບເລກທີ 162/ຈຂ.ຄມ, ລົງວັນທີ 28 ພຶດສະພາ 2018 ວ່າດ້ວຍການຍົກຍ້າຍ ພະນັກງານນຳພາ-ຄຸ້ມຄອງ ໄປຮັບໃຊ້ໜ້າທີ່ໃໝ່ຢູ່ຂະແໜງການອື່ນ ແລະ ຜ່ານຂໍ້ຕົກລົງ ຂອງທ່ານ ເຈົ້າແຂວງ ແຂວງຄຳມ່ວນ ສະບັບເລກທີ 163/ຈຂ.ຄມ, ລົງວັນທີ 28 ພຶດສະພາ 2018 ວ່າດ້ວຍ ການແຕ່ງຕັ້ງເຈົ້າເມືອງບົວລະພາ ແຂວງຄຳມ່ວນ.
Editor: ນັກຂ່າວເມືອງບົວລະພາ
