ສອງກຳລັງ ປກຊ- ປກສ ແຂວງບໍລິຄຳໄຊ ສປປ ລາວ ແລະ ກອງບັນຊາການທະຫານຊາຍແດນ ແຂວງ ຮ່າຕີ່ງ, ສສ ຫວຽດນາມ ໄດ້ຈັດກອງປະຊຸມພົບປະແລກປ່ຽນບົດຮຽນວຽກງານປ້ອງກັນຊາດ-ປ້ອງກັນຄວາມສະຫງົບ ຂື້ນໃນທ້າຍອາທິດີ່ຜ່ານມາ ຢູ່ທີ່ຫ້ອງປະຊຸມກອງບັນຊາການທະຫານຊາຍແດນ ແຂວງ ຮ່າຕີ່ງ, ຝ່າຍລາວນຳໂດຍທ່ານ ພັນເອກ ທອງໃບ ລໍວັນໄຊ ກຳມະການພັກແຂວງ ເລຂາຄະນະພັກ ຫົວໜ້າກອງບັນຊາການ ປກສ ແຂວງບໍລິຄຳໄຊ ພ້ອມດ້ວຍຄະນະ, ຝ່າຍຫວຽດນາມ ນໍາໂດຍ ພັນເອກ ວໍ້ ຈອງ ຮາຍ ກຳມະການພັກແຂວງ ເລຂາພັກຫົວໜ້າກອງບັນຊາການທະຫານຊາຍແດນ ແຂວງ ຮ່າຕີ່ງ ສສ ຫວຽດນາມ ພ້ອມດ້ວຍ ຜູ້ແທນທັງສອງຝ່າຍເຂົ້າຮ່ວມຢ່າງພ້ອມພຽງ.
ກອງປະຊຸມຄະນະຜູ້ແທນທັງສອງຝ່າຍ ໄດ້ຜັດປ່ຽນກັນຂື້ນລາຍງານສະພາບການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ຢູ່ໃນແຂວງຂອງຕົນ ໄລຍະຜ່ານມາໃຫ້ກັນ ແລະ ກັນໄດ້ຮັບຮູ້, ເຊິ່ງຄະນະຜູ້ແທນທັງສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມື ສາມາດປົກປັກຮັກສາ ຄວາມສະຫງົບ-ຄວາມເປັນລະບຽບຮຽບຮ້ອຍ, ກຳລັງທັງສອງຝ່າຍໄດ້ປະສານສົມທົບກັນຢ່າງໜັກແໜ້ນໃນວຽກງານຄຸ້ມຄອງດ່ານ, ກວດກາລາດຕະເວນຄົນເຂົ້າ-ອອກເມືອງ, ເຂົ້າອອກຜ່ານປະຕູດ່ານຕາມແນວຊາຍແດນ. ໃນປີຜ່ານມາທັງສອງດ່ານສາມາດເກັບກຳຄົນເຂົ້າ-ອອກເມືອງ ຈຳນວນ 559.409 ຄົນ ແລະ ພາຫະນະ 106.693 ຄັນ ສອງຝ່າຍຍັງໄດ້ກຳສະພາບຫຼັກໝາຍຊາຍແດນລະຫວ່າງ ສອງປະເທດເວົ້າລວມເວົ້າສະເພາະ ບໍລິຄຳໄຊ-ຮ່າຕີ່ງ ຈຳນວນ 44 ຫຼັກໝາຍ, ຍັງໄດ້ປະສານສົມທົບ ມ້າງ 3 ລາຍຄະດີໃຫຍ່ກ່ຽວກັບຢາເສບຕິດ ຈັບຜູ້ຖຶກຫາໄດ້ 12 ຄົນ ມີຂອງກາງ ເຮໂລອິນ 137 ແທ່ງ, ກັນຊາອັດແທ່ງ 1000 ກ້ອນອັດແທ່ງ, ຢາມ້າ 210.000 ເມັດ ແລະ ລົດໃຫຍ່ຈໍານວນ 6 ຄັນ ບົນພື້ນຖານສາຍພົວພັນສາມັກຄີມິດຕະພາບພິເສດ. ແຕ່ລະປີຍັງໄດ້ພັດປ່ຽນກັນເປັນເຈົ້າພາບຈັດກອງປະຊຸມໃນແຕ່ລະປີ. ບັນດາດ່ານຊາຍແດນແມ່ນ 06 ເດືອນຈັດກອງປະຊຸມແລກປ່ຽນໂດຍພັດປ່ຽນກັນເປັນເຈົ້າພາບ. ຜູ້ແທນທັງສອງຝ່າຍຍັງໄດ້ພັດປ່ຽນກັນມີຄຳເຫັນສົນທະນາຮ່ວມກັນ ເພື່ອຄວາມເປັນເອກະພາບກັນໃນການປະສານສົມທົບດ້ານວຽກງານວິຊາສະເພາະ ຕ້ານ ແລະ ສະກັດກັ້ນກຸ່ມຄົນບໍ່ດີເຄື່ອນໄຫວກະທຳຜິດ ຄ້າ-ຂາຍເຖື່ອນ, ລັກເຂົ້າ-ອອກເມືອງຜິດກົດໝາຍ.
ຕອນທ້າຍຜູ້ແທນທັງສອງຝ່າຍຍັງໄດ້ລົງນາມເຊັນບົດບັນທຶກຊ່ວຍຈຳຮ່ວມກັນ ແລະ ຕອນບ່າຍຂອງວັນດຽວກັນກໍ່ໄດ້ຈັດພິທີມອບໃບຍ້ອງຍໍ ແລະ ປະດັບຫຼຽນໄຊແຮງງານຊັ້ນ II ແລະ ຊັ້ນ III ຝ່າຍຫວຽດນາມ ຍັງໄດ້ມອບໃບຍ້ອງຍໍຂັ້ນກະຊວງປ້ອງກັນປະເທດ ສສ ຫວຽດນາມ ໃຫ້ກຳລັງ ປກສ ແຂວງບໍລິຄຳໄຊ ຈຳນວນ 1 ສະຫາຍ, ໃບຍ້ອງຍໍຂັ້ນສະພາປະຊາຊົນແຂວງ ຈຳນວນ 1 ກົມກອງ ແລະ 4 ສະຫາຍ, ຝ່າຍລາວກໍ່ໄດ້ມອບຫຼຽນໄຊແຮງງານຊັ້ນ II ໃຫ້ທະຫານຊາຍແດນ ຈໍານວນ 12 ສະຫາຍ ແລະ ຫຼຽນໄຊແຮງງານຊັ້ນ III ຈຳນວນ 13 ສະຫາຍ.
ຈາກນັ້ນ ຄະນະຜູ້ແທນທັງສອງຝ່າຍກໍ່ໄດ້ປຶກສາຫາລື ເພື່ອສືບຕໍ່ພົວພັນຮ່ວມມືວຽກງານປົກປັກຮັກສາຄວາມສະຫງົບ ໂດຍໄດ້ມີຄວາມເປັນເອກະພາບກັນ ເພີ່ມທະວິຮັດແໜ້ນສາຍພົວພັນແລກປ່ຽນບົດຮຽນປະສານສົມທົບຂໍ້ມູນ-ຂ່າວສານ ເພື່ອຈັດຕັ້ງຜັນຂະຫຍາຍສາຍພົວພັນແບບພິເສດຂອງສອງພັກ-ສອງລັດ ເຂົ້າໃນການຮ່ວມມື ເພື່ອປ້ອງກັນ ແລະ ສະກັດກັ້ນສະພາບຕ່າງໆທີ່ອາດຈະເກີດຂືຶ້ນໃນຂອບເຂດຊາຍແດນຂອງສອງປະເທດ, ເພີ່ມທະວິວຽກງານໂຄສະນາສຶກສາອົບຮົມໃຫ້ພົນລະເມືອງຂອງສອງປະເທດ ທີ່ຢູ່ລຽບຕາມຊາຍແດນໃຫ້ເຄົາລົບປະຕິບັດລະບຽບກົດໝາຍ ແລະ ຮິດຄອງປະເພນີຂອງແຕ່ລະປະເທດ ໂດຍສະເພາະປະຕິບັດການເຂົ້າ-ອອກເມືອງໃຫ້ຖຶກຕ້ອງຕາມລະບຽບກົດໝາຍຂອງສອງປະເທດທີ່ໄດ້ກຳນົດໄວ້ຢ່າງເຂັ້ມງວດ ເພື່ອຮັບປະກັນໃຫ້ທັງສອງປະເທດມີຄວາມສະຫງົບ ຄວາມເປັນລະບຽບຮຽບຮ້ອຍຢູ່ລຽບຕາມຊາຍແດນ ເພື່ອເຮັດໃຫ້ແຂວງບໍລິຄຳໄຊ ສປປ ລາວ ແລະ ແຂວງ ຮ່າຕີ່ງ ສສ ຫວຽດນາມ ກາຍເປັນຊາຍແດນສັນຕິພາບ-ມິດຕະພາບໝັ້ນຄົງຕະຫຼອດໄປ.
Editor: ປກສ ບໍລິຄຳໄຊ
