ກາງເດືອນມີຖຸນາ 2018 ຜ່ານມາ, ຢູ່ຫ້ອງປະຊຸມຫ້ອງການແຮງງານ ແລະ ສະຫວັດດີການ-ສັງຄົມເມືອງເຊໂປນ ໄດ້ຈັດກອງປະຊຸມແຕ່ງຕັ້ງຄະນະຮັບຜິດຊອບໂຄງການສ້າງຍຸດທະສາດແຫ່ງຊາດ ແລະ ສົ່ງເສີມການການຈ້າງງານຢູ່ຊົນນະບົດໃນ ສປປ.ລາວ ເພື່ອສ້າງໂອກາດມີວຽກເຮັດງານທຳທີ່ມີຄຸນຄ່າ ແລະ ມີຜະລິດຕະພາບຢູ່ຂັ້ນເມືອງ, ໂດຍການເຂົ້າຮ່ວມຂອງ ທ່ານ ບຸນລົບ ໂຄດລັກຄໍາ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງສະຫວັນນະເຂດ, ທ່ານ ຄໍາຫຼ້າ ພົມມີໄຊ ຮອງເຈົ້າເມືອງເຊໂປນ, ທ່ານ ໂລເລັນ ລີເຊັດ ຊ່ຽວຊານອົງການແຮງງານສາກົນ ປະຈໍາແຂວງສະຫວັນນະເຂດ, ມີບັນດາຫົວໜ້າ, ຄະນະຫ້ອງການອອ້ມຂ້າງເມືອງທີ່ກ່ຽວຂ່ອງພ້ອມດ້ວຍພະນັກ ງານວິຊາການໂຄງການດັ່ງກ່າວເຂົ້າຮ່ວມ. ຈຸດປະສົງກໍ່ເພື່ອແຕ່ງຕັ້ງຄະນະຮັບຜິດຊອບໂຄງການ ແລະ ຄັດເລືອກບ້ານເປົ້າໝາຍຂອງໂຄງການສ້າງຍຸດທະສາດແຫ່ງຊາດ ສົ່ງເສີມການສ້າງງານຢູ່ຊົນນະບົດໃນ ສປປ.ລາວ, ເພື່ອສ້າງໂອກາດມີວຽກເຮັດທີ່ມີຄຸນຄ່າ ແລະ ມີສະມັດຖະພາບໃນຊົນນະບົດ

ໃນພິທີ ທ່ານ ບຸນລົບ ໂຄດລັກຄຳ ຫົວໜ້າພະແນກແຮງງານ ແລະ ສະຫວັດດີການສັງຄົມ ກໍ່ໄດ້ໃຫ້ກຽດມີຄຳເຫັນ ແລະ ກ່າວເປີດກອງປະຊຸມຢ່າງເປັນທາງການ ຫຼັ້ງຈາກນັ້ນ, ທ່ານ ບຸນທະວີ ບຸນມີ ຜູ້ປະສານງານອົງການແຮງງານສາກົນ ປະຈຳແຂວງສະຫວັນນະເຂດ ໄດ້ລາຍງານໂດຍຫຍໍ້ກ່ຽວກັບຈຸດປະສົງຂອງໂຄງການ ແລະ ຜົນເກັບກຳຂໍ້ມູນໃນຜ່ານມາພ້ອມນຳສະເໜີແຜນທີ່ຈັດຕັ້ງປະຕິບັດໃນຕໍ່ໜ້າໃຫ້ບັນດາແຂກເຂົ້າຮ່ວມໄດ້ຮັບຟັງ ແລະ ໄດ້ປະກອບຄຳຄິດຄຳເຫັນ ສະເໜີບ້ານທີ່ຈະຄັດເລືອກເປັນເປົ້າໝາຍຂອງໂຄງການ,ຫຼັງຈາກປຶກສາຫາລື ແລະ ປະກອບຄຳຄິດຄຳເຫັນແລ້ວກໍ່ໄດ້ປະຊາມະຕິຕົກລົງເອົາ 07 ບ້ານເປັນບ້ານເປົ້າໝາຍຂອງໂຄງການ ຄື: ບ້ານຫ້ວຍຈັງ, ບ້ານປະງາ, ບ້ານແກ້ງ ( ວັງສະຫຼໍ), ບ້ານອາໄລ ( ດົງນ້ອຍ), ບ້ານຜະໂລ (ວັງບິງ) ແລະ ບ້ານນໍ້າໂທນ ແລະເປັນເອກະພາບກັນແຕ່ງຕັ້ງຄະນະຮັບຜິດຊອບຂັ້ນເມືອງ ແມ່ນຫ້ອງການແຮງງານສະຫວັດດີການສັງຄົມເມືອງ ເປັນຫຼັກສູນລວມຂໍ້ມູນໃນປະສານງານໃນ 07 ບ້ານເປົ້າໝາຍຂອງໂຄງການສ້າງຍຸດທະສາດແຫ່ງຊາດ ແລະ ສົ່ງເສີມການຈ້າງງານຢູ່ຊົນນະບົດໃນ ສປປ ລາວ, ເພື່ອສ້າງໂອກາດມີວຽກເຮັດງານທຳທີ່ມີຄຸນຄ່າ ແລະ ມີສະມັດຖະພາບໃນຊົນນະບົດຢູ່ຂັ້ນເມືອງ.ສຸດທ້າຍ ທ່ານ ບຸນລົບ ໂຄດລັກຄຳ ກໍ່ໄດ້ມີຄຳເຫັນ ແລະ ຮຽກຮ້ອງໃຫ້ເລຂາຮ່າງເປັນບົດບັນທຶກ ແລະ ສະເໜີທ່ານເຈົ້າເມືອງ ເຮັດຂໍ້ຕົກລົງສ້າງບ້ານເປົ້າໝາຍ, ສະເໜີລົງປະຕິບັດບ້ານເປົ້າໝາຍ, ຮຽກຮ້ອງໃຫ້ບັນດາທ່ານທີ່ຖືກແຕ່ງຕັ້ງຮັບຜິບຊອບຈົ່ງນຳເອົາເນື້ອໃນຈິດໃຈ ແລະ ການປືກສາຫາລືປະກອບຄຳຄິດຄຳເຫັນໃນຄັ້ງນີ້ພ້ອມກັນນຳໄປຈັດຕັ້ງປະຕິບັດ ໃຫ້ເກີດດອກອອກຜົນຕາມຈຸດປະສົງ ແລະ ເປົ້າໝາຍທີ່ວາງໄວ້ໃຫ້ສຳເລັດ100 ສ່ວນຮ້ອຍ

Editor: ກຳປານາດ ລັດຖະເຮົ້າ