ຫ້ອງການໄອຍະການປະຊາຊົນ ເຂດ 3 ປະຈໍາເມືອງເຊໂປນ ໄດ້ຈັດພິທີປະກາດການຈັດຕັ້ງຂື້ນຢ່າງເປັນທາງການ, ໂດຍການເປັນປະທານຂອງ ທ່ານ ຄຳແພງ ເພັດທຸມພອນ ກຳມະການພັກແຂວງ, ເລຂາໜ່ວຍພັກ, ຫົວໜ້າອົງການໄອຍະການ ປະຊາຊົນແຂວງສະຫວັນນະເຂດ ພ້ອມຄະນະ, ມີບັນດາທ່ານຫົົວໜ້າຫ້ອງການໄອຍະການປະຊາຊົນ 3 ເມືອງອອ້ມຂ້າງ ຄື: ເມືອງພີນ, ວິລະບູລີ ແລະ ເມືອງນອງ, ເຂົ້າຮ່ວມ.

ໃນພິທີກໍ່ໄດ້ຜ່ານຂໍ້ຕົກລົງຂອງໄອຍະການປະຊາຊົນສູງສຸດ ເລກທີ 213/ອອປສ ນະຄອນ ຫຼວງວຽງຈັນ, ລົງວັນທີ 02 ພຶດສະພາ 2018 ວ່າດ້ວຍການຍົກຍ້າຍ, ຊັບຊ້ອນ ແລະ ແຕ່ງຕັ້ງພະນັກງານເຂົ້າໃສ່ໂຄງປະກອບການຈັດຕັ້ງ ຂອງອົງການໄອຍະການປະຊາຊົນແຂວງສະຫວັນນະເຂດ, ມະຕິຕົກລົງສະພາປະຊາຊົນແຂວງສະຫວັນນະເຂດ ຄະນະປະຈໍາເລກທີ27/ຄປຈຂ ລົງວັນທີ 20 ເມສາ 2018 ຂອງຄະນະປະຈໍາສະພາປະຊາຊົນແຂວງສະຫວັນນະເຂດ ວ່າດ້ວຍການພິຈາລະນາ ຮັບຮອງການສະເໜີຍົກຍ້າຍ ແລະ ແຕ່ງຕັ້ງຫົວໜ້າອົງການໄອຍະການປະຊາຊົນເຂດ 3 ເມືອງເຊໂປນ ແລະ ເຂດ 4 ອາດສະພັງທອງ ແລະ ຄະນະປະຈຳສະພາປະຊາຊົນແຂວງສະຫວັນນະເຂດ ຕົກລົງ ແລະ ພິຈາລະນາຮັບຮອງເອົາການສະເໜີຍົກຍ້າຍ ທ່ານ ສີສົມບັດ ພະພິທັກ ຫົວ ໜ້າອົງການໄອຍະການປະຊາຊົນເຂດ 3 ເມືອງເຊໂປນ ຍົກຍ້າຍໄປປະປະຈໍາການບ່ອນໃໝ່ເປັນຫົວໜ້າອົງການໄອຍະການປະຊາຊົນເຂດ 4 ເມືອງອາດສະພັງທອງ ແລະ ແຕ່ງຕັ້ງ ທ່ານ ພູວັນທອງ ເທບພະວົງ ຮອງຫົວໜ້າໄອຍະການປະຊາຊົນເຂດ 3 ຂື້ນເປັນຫົວໜ້າຫ້ອງການໄອຍະການເຂດ 3 ເມືອງເຊໂປນ.

ຫຼັງຈາກນັ້ັ້ນ ກໍ່ໄດ້ເຊັນມອບ-ຮັບວຽກໃຫ້ລະຫວ່າງຜູ້ເກົ່າ ແລະ ໃໝ່, ສຸດທ້າຍທ່ານ ຄໍາແພງ ເພັດທຸມພອນ ຫົວໜ້າອົງການໄອຍະການປະຊາຊົນ ແຂວງສະຫວັນນະເຂດ ກໍ່ໄດ້ໃຫ້ກຽດມີຄຳເຫັນ ແລະ ໃຫ້ທິດເຍືອງທາງຜູ້ເກົ່າ ແລະ ຜູ້ໃໝ່ ແລະ ບັນດາພະນັກງານທີ່ຖືກຍົກຍ້າຍ, ສັບຊ້ອນທຸກພາກສ່ວນຮັບຮູ້ ແລະ ພ້ອມກັນຈັດຕັ້ງປະຕິບັດໜ້າທີ່ຮັບຜິດຊອບຂອງໃຜລາວຢ່າງເຂັ້ມງວດ,ຮຽກຮ້ອງໃຫ້ເພີ່ມທະວີການສຶກສາອົບຮົມການເມືອງແນວຄິດ ໃຫ້ພະນັກງານລັດຖະກອນພາຍໃນຫ້ອງການ ແລະ ເຂດຂອງຕົນ, ເພີ່ມທະວີຮັກສາຄວາມສາມັກຄີພາຍໃນ ແລະ ພາຍນອກຂອງຕົນ ແລະ ຄອບຄົວ, ເພີ່ມທະວີຍົກສູງການບໍລິຫານການປະຕິບັດໜ້າທີ່ວຽກງານ, ມີການຕິດຕາມກວດກາ,ສະຫຼຸບລາຍງານສ້າງເປັນແຜນອັນລະອຽດ, ໂຄສະນາ, ເຜີຍແຜ່ກົດໝາຍໃຫ້ປະຊາຊົນໃຫ້ເຂົ້າໃຈຢ່າງລະອຽດ, ສ້າງແລະປັບປຸງວິທີເຮັດວຽກ, ຍຶດໝັ້ນຫຼັກລວມສູນແບບປະຊາທິປະໄຕ, ເພີ່ມທະວີໃນການກວດກາໃນການສ່ອງແສງໜ່ວຍພັກຂອງຕົນໃນແຕ່ລະເດືອນ, ສະນັ້ນຈຶ່ງຮຽກຮ້ອງໃຫ້ຜູ້ທີ່ຖືກແຕ່ງຕັ້ງໃໝ່ ແລະ ຖືກສັບຊ້ອນໃນຄັ້ງນີ້ ຈົ່ງພ້ອມກັນນຳໄປຈັດຕັ້ງປະຕິບັດໃຫ້ປະກົດຜົນເປັນຈິງ.

 ແຫລ່ງຂ່າວ ທີມຂ່າວ ເມືອງເຊໂປນ

Editor: ກຳປານາດ ລັດຖະເຮົ້າ