ພິທີວາງສິລາລຶກ ກໍ່ສ້ງອະນຸສາວະລີ ພະເຈົ້າໄຊຍະເຊດຖາທິຣາດ ທີ່ແຂວງອັດຕະປື ໄດ້ຈັດຂື້ນ ໃນວັນທີ 21 ມີຖຸນາ 2018 ທີ່ຜ່ານມາ ຢູ່ເມືອງໄຊເຊດຖາ ແຂວງອັດຕະປື ໃນເນື້ອທີ່ການກໍ່ສ້າງທັງໝົດ 1,8 ເຮັກຕາ. ໂດຍໃຫ້ກຽດເຂົ້າຮ່ວມຂອງ ທ່ານ ຈູມມາລີ ໄຊຍະສອນ ອະດິດເລຂາທິການໃຫຍ່, ອະດິດປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ, ມີ ທ່ານ ເລັດ ໄຊຍະພອນ ເລຂາພັກແຂວງ, ເຈົ້າແຂວງອັດຕະປື, ພ້ອມນີ້ ຍັງມີເຈົ້າແຂວງເຊກອງ, ສາລະວັນ, ການນໍາກະຊວງ ຈາກສູນກາງ ເຂົ້າຮ່ວມ ຢ່າງພ້ອມພຽງ.
ໂຄງການນີ້ ແມ່ນຈະໃຊ້ເນື້ອທີ່ການກໍ່ສ້າງທັງໝົດ 1,8 ເຮັກຕາ ລັກສະນະຮູບປັນຫລໍ່ອະນຸສາວະລີ ຂອງພະເຈົ້າໄຊຍະເຊດຖາທິຣາດ ແມ່ນມີລັກສະນະຂີ່ຊ້າງຂ້າເສິກ ແລະ ນັ່ງສະຫງ່າ ຢູ່ເທິງຫລັງຊ້າງ, ຫັນຫນ້າໄປທາງທິດຕາເວັນອອກ, ມີຂະຫນາດ 14 ຄູນ 22,8 ແມັດ, ມູນຄ່າການກໍ່ສ້າງທັງໝົດ 25 ຕື້ກວ່າກີບ. ຈະໃຊ້ໄລຍະເວລາ 18 ເດືອນ ໂດຍແມ່ນບໍລິສັດ ວັງຕັດ ຂຸດຄົ້ນບໍ່ແຮ່ ເປັນຜູ້ຮັບເໝົາກໍ່ສ້າງ. ໃນບໍລິເວນສວນ ຍັງປະກອບມີຫໍມູນເຊື້ອ, ສວນນໍ້າພຸ ເພື່ອນັ່ງພັກຜ່ອນ, ເປັນບ່ອນຈັດກິດຈະກໍາພາຍໃນແຂວງ ແລະ ເມືອງ, ເຊີ່ງຕັ້ງຢູ່ຈຸດສາມແຍກບ້ານຫາດຊາຍຂາວ ເຂດພະເມືອງ, ເມືອງໄຊເຊດຖາ ແຂວງອັດຕະປື.
ການສ້າງອະນຸສາວະລີ ພະເຈົ້າໄຊຍະເຊດຖາທິຣາດ ຂື້ນ ເພື່ອສະແດງຄວາມຮູ້ບຸນຄຸນ ຕໍ່ບັນພະບູລຸດ ກໍຄືພະເຈົ້າໄຊຍະເຊດຖາ ທິຣາດ ທີ່ພະອົງໄດ້ປົກປັກຮັກສາ ແລະ ພັດທະນາອານາຈັກລາວລ້ານຊ້າງ ໃຫ້ເຂັ້ມແຂວງຮຸ່ງເຮືອງ ໃນຊຸມປີ 1548-1572 ພ້ອມກັນນີ້ ຍັງເປັນການເສີມຂະຫຍາຍມູນເຊື້ອຮັກຊາດ, ການຕໍ່ສູ້ພິລະອາດຫານຂອງພະອົງ ກາຍເປັນມໍລະດົກອັນລໍ້າຄ່າ ປະໄວໃຫ້ລູກຫລານສຶບທອດ ສຶກສາຄົ້ນຄວ້າຮໍ່າຮຽນ, ເປັນການເສີມສ້າງວັດທະນະທໍາ ໃຫ້ກາຍເປັນປູສະນີຍະສະຖານ, ເປັນແຫລ່ງທ່ອງທ່ຽວ ແລະ ກາຍເປັນຈຸດເຕົ້າໂຮມຄວາມສາມັກຄີ ຂອງປວງຊົນລາວບັນດາເຜົ່າໃນທົ່ວປະເທດ. ໄດ້ພ້ອມກັນປົກປັກຮັກສາ ແລະ ພັດທະນາໃຫ້ຮຸ່ງເຮືອງ.
Editor: ກຳປານາດ ລັດຖະເຮົ້າ
