ກອງປະຊຸມສະຫຼຸບການຈັດຕັ້ງປະຕິບັດວຽກງານພາຍໃນໄລຍະ 5 ປີ ຜ່ານມາ ແລະ ທິດທາງແຜນການ 5 ປີໃນຕໍ່ໜ້າ, ວິໄສທັດຮອດປີ 2030 ແລະ ແຜນຍຸດທະສາດຮອດປີ 2025 ຂອງເມືອງຫົງສາ ໄດ້ຈັດຂຶ້ນທີ່ຫໍປະຊຸມໃຫຍ່ຂອງເມືອງ, ໂດຍການເປັນກຽດເຂົ້າຮ່ວມຂອງ ທ່ານ ຄຳແພງ ຕັດສະຫວັດ ກຳມະການພັກແຂວງ ຫົວໜ້າພະແນກພາຍໃນແຂວງໄຊຍະບູລີ, ມີ ທ່ານ ສົມສີ ພົມມະຈັນ ຮອງເລຂາພັກເມືອງ ປະທານກວດກາພັກ-ລັດເມືອງ, ມີ ທ່ານ ນາງຈັນທີ ຄໍາພູວົງ ກຳມະການພັກເມືອງ ຫົວໜ້າຫ້ອງການພາຍໃນເມືອງ, ມີຄະນະປະຈໍາພັກເມືອງ, ກໍາມະການພັກເມືອງຫົວໜ້າຫ້ອງການ, ກົມກອງ, ນາຍບ້ານ, ຜູ້ຮັບຜິດຊອບວຽກງານພາຍໃນຂັ້ນບ້ານ ແລະ ຂັ້ນເມືອງເຂົ້າຮ່ວມຢ່າງພ້ອມພຽງ.
ໃນກອງປະຊຸມຜູ້ເຂົ້າຮ່ວມໄດ້ຮັບຟັງບົດສະຫຼຸບການຈັດຕັ້ງປະຕິບັດວຽກງານພາຍໃນ ໄລຍະ 5 ປີ ຜ່ານມາ ແລະ ທິດທາງແຜນການ 5 ປີໃນຕໍ່ໜ້າ, ວິໄສທັດຮອດປີ 2030 ແລະ ແຜນຍຸດທະສາດ ຮອດປີ 2025, ໄດ້ຍົກໃຫ້ເຫັນເຖິງຜົນງານດ້ານດີ, ດ້ານອ່ອນ, ຂໍ້ຄົງຄ້າງທີ່ຈະໄດ້ພ້ອມກັນແກ້ໄຂໃນຕໍ່ໜ້າ, ເຊິ່ງໃນໄລຍະ 5 ປີຜ່ານມາຄະນະຫ້ອງການພາຍໃນກໍ່ໄດ້ຖືເອົາວຽກງານສຶກສາອົບຮົມການເມືອງແນວຄິດເປັນວຽກງານສຳຄັນ ເປັນຕົ້ນແມ່ນໄດ້ຊຸກຍູ້ພະນັກງານ-ລັດຖະກອນ ເອົາໃຈໃສ່ເຂົ້າຮ່ວມເຊື່ອມຊຶມຮ່ຳຮຽນບັນດາມະຕິ, ຄຳສັ່ງ, ຂໍ້ກຳນົດ, ລະບຽບກົດໝາຍ, ມູນເຊື້ອຂອງຊາດ - ຂອງພັກ, ຄຸນສົມບັດຂອງທ່ານຜູ້ນໍາ ໄດ້ເຮັດໃຫ້ພະນັກງານມີແນວຄິດອຸ່ນອ່ຽງທຸ່ນທ່ຽງເຊື່ອໝັ້ນຕໍ່ການນຳພາຂອງພັກ-ລັດ, ຕ້ານທຸກປະກົດການຫຍໍ້ທໍ້ຕ່າງ, ມີສະຕິເຄົາລົບລະບຽບກົດໝາຍ ແລະ ພ້ອມກັນປະຕິບັດໜ້າທີ່ວຽກງານຕາມພາລະບົດບາດຂອງຕົນຈົນໄດ້ຮັບຜົນສຳເລັດເປັນຢ່າງດີ, ພ້ອມນັ້ນ ຜູ້ເຂົ້າຮ່ວມຍັງໄດ້ຮັບຟັງແຈ້ງການສະບັບເລກທີ 14/ ພນ.ຊຍ, ລົງວັນທີ 13 ມີນາ 2018 ວ່າດ້ວຍການສ້າງຕັ້ງວຽກງານບໍລິການຜ່ານປະຕູດຽວ, ຮັບຟັງຂໍ້ຕົກລົງເລກທີ 188/ພນ, ລົງວັນທີ 4 ມິຖຸນາ 2018 ວ່າດ້ວຍການສ້າງຕັ້ງກອງທຶນຊ່ວຍເຫຼືອກັນຂອງພະນັກງານທີ່ບໍ່ແມ່ນລັດຖະກອນສັງກັດລັດໃນຂອບເຂດທົ່ວແຂວງໄຊຍະບູລີ, ກອງປະຊຸມຄັ້ງນີ້ຜູ້ເຂົ້າຮ່ວມຍັງໄດ້ພ້ອມກັນປະກອບຄໍາຄິດຄໍາເຫັນເພື່ອເປັນການຊຸກຍູ້ວຽກງານດັ່ງກ່າວນີ້ໃຫ້ດີຂຶ້ນໃນຕໍ່ໜ້າ, ໃນໂອກາດນີ້ຍັງໄດ້ມອບຫຼຽນກາແຮງງານ, ໃບຍ້ອງຍໍ, ໃບຊົມເຊີຍ ໃຫ້ກົມກອງ ແລະ ບຸກຄົນທີ່ມີຜົນງານດີເດັ່ນໃນການປະກອບສ່ວນເຂົ້າໃນຂະບວນການພັດທະນາວຽກງານທາງດ້ານວິຊາສະເພາະ ແລະ ດ້ານວິຊາການ ຕໍ່ກັບຂົງເຂດວຽກງານພາຍໃນເມືອງ ນັບແຕ່ການສ້າງຕັ້ງໄລຍະປີ 2012-2017 ຈໍານວນ 01 ກົມກອງ, 34 ບ້ານ ແລະ 11 ທ່ານ, ໃນນັ້ນ ບຸກຄົນໄດ້ຮັບຫຼຽນກາແຮງງານ 02 ທ່ານ, ຮັບໃບຍ້ອງຍໍຂັ້ນລັດຖະບານ 02 ທ່ານ, ຮັບໃບຍ້ອງຍໍຂັ້ນພະແນກພາຍໃນແຂວງ 07 ທ່ານ, ກົມກອງໄດ້ຮັັບໃບຍ້ອງຍໍຂັ້ນລັດຖະບານ 01 ກົມກອງ, ບ້ານໄດ້ຮັບໃບຍ້ອງຍໍຂັ້ນເມືອງ 14 ບ້ານ ແລະ ຮັບໃບຊົມເຊີຍຂັ້ນເມືອງ ຈໍານວນ 20 ບ້ານ.
ໃນຕອນທ້າຍຂອງກອງປະຊຸມຍັງໄດ້ຮັບຟັງການມີຄໍາຄິດຄໍາເຫັນ ໂອ້ລົມໃຫ້ທິດຊີ້ນໍາໃນການຈັດຕັ້ງ ປະຕິບັດວຽກງານໃນຕໍ່ໜ້າຈາກ ທ່ານ ຄຳແພງ ຕັດສະຫວັດ ກຳມະການພັກແຂວງ ຫົວໜ້າພະແນກພາຍໃນແຂວງໄຊຍະບູລີ ຕື່ມອີກ.
ແຫລ່ງຂ່າວເມືອງຫົງສາ
Editor: ກຳປານາດ ລັດຖະເຮົ້າ
