ຫວ່າງມໍ່ໆຜ່ານມານີ້, ກອງບັນຊາການທະຫານເມືອງໄຊພູທອງ ແຂວງສະຫວັນນະເຂດ ໄດ້ຈັດພິທີປະກາດຮັບ ຮອງເອົາ 14 ບ້ານ ເປັນບ້ານປ້ອງກັນຊາດເຂັ້ມແຂງ ຄື: ບ້ານນາພານ, ບ້ານພູມມະເຈດີ, ບ້ານໂພນທາດ,ບ້ານນາໜ້າກເກືອ, ບ້ານສີສະຫວ່າງເໜືອ, ບ້ານດົງໂພສີ, ບ້ານຄໍາແຮ້ງ, ບ້ານນາລະໂອງ, ບ້ານນາຄໍາ, ບ້ານນາຈານ, ບ້ານນາໂມງ, ບ້ານດົງດອກໄມ້, ບ້ານເຮືອນຫີນ ແລະ ບ້ານເຫຼົ່າໝາກຫູດ ຂອງເມືອງໄຊພູທອງປະຈໍາປີ 2018,ເປັນບ້ານປ້ອງກັນຊາດເຂັ້ມແຂງ ເຊິ່ງໄດ້ຈັດຂື້ນທີ່ສະໂມສອນຂອງຫ້ອງວ່າການປົກຄອງເມືອງໄຊພູທອງ ແຂວງສະຫວັນນະເຂດ ໂດຍການເຂົ້າຮ່ວມເປັນປະທານຂອງ ທ່ານ ຄໍາວິໃສ ຜຸຍຍະວົງ ກໍາມະການພັກແຂວງ ເລຂາພັກເມືອງ ເຈົ້າເມືອງໄຊພູທອງ , ພ້ອມດ້ວຍຄະນະພັກ-ຄະນະບັນຊາການທະຫານເມືອງໄຊພູທອງ ຕະຫຼອດຮອດເລຂານາຍບ້ານທັງ 14 ບ້ານເຂົ້າຮ່ວມຢ່າງພ້ອມພຽງ.
ໂອກາດດຽວກັນນີ້, ທ່ານ ຄໍາແກ້ວ ແດງນະພາ ເລຂານາຍບ້ານ ພູມມະເຈດີ ໄດ້ຕ່າງໜ້າຜ່ານບົດສະຫຼຸບໃນການສ້າງຄອບຄົວບ້ານປ້ອງກັນຊາດເຂັ້ມແຂງຈໍານວນ 14 ບ້ານປະກອບມີ ພົນລະເມືອງທັງໝົ້ດ 16,959 ຄົນ, ຍິງ8737 ຄົນ, ປະກອບມີ 3,184 ຄອບຄົວ, ຮັບຮອງໄດ້ 2,927 ຄອບຄົວ ເທົ່າກັບ 91,92% ປະຊາຊົນສ່ວນໃຫຍ່ລ້ວນແຕ່ເຊື່ອໝັ້ນຕໍ່ການນໍາພາຂອງພັກ-ລັດ ອາຊີບຫຼັກແມ່ນເຮັດນາປູກເຂົ້າເປັນຕົ້ນຕໍຄ້າຂາຍ, ປູກພຶດລົ້ມລຸກ ແລະ ລ້ຽງສັດເປັນອາຊີບສໍາຮອງ,ໃນຈໍານວນ 14 ບ້ານດັ່ງກ່າວ ແມ່ນເປັນບ້ານທີ່ມີຄວາມເຂັ້ມແຂງທາງດ້ານການເມືອງ, ເສດຖະກິດ,ວັດທະນະທໍາ-ສັງຄົມ ແລະ ປ້ອງກັນຊາດ-ປ້ອງກັນຄວາມສະຫງົບ ປະຊາຊົນທຸກຄົນໃນຄອບຄົວມີແນວຄິດຈິດໃຈຮັກຊາດ, ຮັກລະບອບໃໝ່, ຮັກບ້ານເກີດເມືອງນອນຂອງຕົນເປັນເຈົ້າການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ໜັ້ນຄົງພາຍໃນບ້ານໄດ້ຮັບການປັບປຸງ ແລະ ພັດທະນາເຂັ້ມແຂງຮອບດ້ານ ຄື: ລະບົບການເມືອງແມ່ນມີຄວາມໜັກແໜ້ນໜ່ວຍພັກເຂັ້ມແຂງຮູ້ນໍາພາຮອບດ້ານ, ອໍານາດການປົກຄອງມີຄວາມເຂັ້ມແຂງຄຸ້ມຄອງບໍລິຫານໄດ້ດີ. ເຊິ່ງມັນໄດ້ສະແດງອອກບ່ອນວ່າເຂົາເຈົ້າໄດ້ເປັນຫູເປັນຕາສອດຊ່ອງ ບຸກຄົນທີ່ບໍດີເຄື່ອນໄຫວພາຍໃນບ້ານ.
ຈາກນັ້ນໃນພິທີໄດ້ຜ່ານຂໍ້ຕົກລົງຂອງກອງບັນຊາການທະຫານແຂວງສະຫວັນນເຂດ ວ່າດ້ວຍການອະນຸມັດຮັບຮອງຈໍານວນ 14 ບ້ານຂອງເມືອງໄຊພູທອງ ແລະ ຂໍ້ຕົກລົງຂອງທ່ານເຈົ້າເມືອງໄຊພູທອງ ວ່າດ້ວຍການຮັບຮອງເອົາການປະເມີນຄອບຄົວ ແລະ ບ້ານປ້ອງກັນຊາດເຂັ້ມ ແຂງປີ 2017 ຈໍານວນ 2,927 ຄອບຄົວ, ພ້ອມນັ້ນກໍ່ໄດ້ມີການມອບ-ຮັບໃບຢັ້ງຢືນໃຫ້ຄອບຄົວ ແລະ ບ້ານ ຈໍານວນ 14 ຄອບຄົວຢ່າງສົມກຽດ ໂດຍໃຫ້ກຽດມອບໃບຢັ້ງຢືນຂອງ ທ່ານ ພັນໂທ ຄໍາໃໝ ເທບທອງແສນ ຫົວໜ້າການເມືອງກອງບັນຊາການທະຫານເມືອງໄຊພູທອງ.
ທີມຂ່າວເມືອງໄຊພູທອງ
Editor: ກຳປານາດ ລັດຖະເຮົ້າ
