ນັກສຶກສາຈາກສະຖາບັນການເມືອງໂຮຽນການເມືອງການປົກຄອງແຫ່ງຊາດ ຊັ້ນສູງ ຫຼັກສູດ 5 ເດືອນລຸ້ນທີ 22 ໄດ້ລົງມາເຄື່ອນໄຫວທັດສະນະສຶກສາຢູ່ເມືອງໄຊພູທອງ ຢູ່ 2 ຈຸດຄື: ຫ້ອງວ່າການປົກຄອງເມືອງ ແລະ ຢູ່ບ້ານທ່າໂພ ນໍາໂດຍ ທ່ານນາງ ປອ ໄກສອນ ຈັນສີນາ ຮັກສາການຫົວໜ້າກົມວິຊາການ ຂອງສະຖາບັນການເມືອງ-ການປົກຄອງແຫ່ງຊາດ ໂດຍການໃຫ້ກຽດຕ້ອນຮັບຂອງ ທ່ານ ຄໍາວິໃສ ຜຸຍຍະວົງ ກໍາມະການພັກແຂວງ ເລຂາພັກເມືອງ-ເຈົ້າເມືອງໄຊ ພູທອງ ພ້ອມດ້ວຍບັນດາຫົວໜ້າຫ້ອງການ-ຄະນະຫ້ອງການ ຕະຫຼອດຮອດເລຂາ-ນາຍບ້ານທ່າໂພປະຊາຊົນເຂົ້າຮ່ວມຢ່າງພ້ອມພຽງ.
ໂອກາດດຽວກັນນີ້, ຄະນະນັກສຶກສາສະຖາບັນການເມືອງ-ການປົກຄອງແຫ່ງຊາດຊັ້ນສູງຫຼັກສູດ 5 ເດືອນ ລຸ້ນທີ 22 ໄດ້ຮັບຟັງບົດລາຍງານການຮັບຮອງເອົາບ້ານໃຫຍ່ຄ້າຍຄືຕົວເມືອງນ້ອຍໃນຊົນນະບົດຂອງບ້ານທ່າໂພ ຈາກ ທ່ານ ບຸນຢູ ເທບພະນົມໄຊ ເລຂາ-ນາຍບ້ານທ່າໂພ, ເຊິ່ງທ່ານກໍ່ໄດ້ຍົກໃຫ້ເຫັນສະພາບຈຸດພິເສດ ບ້ານທ່າໂພ ແມ່ນບ້ານໜຶ່ງທີ່ນອນຢູ່ໃນກຸ່ມບ້ານທີ 2 ຂອງເມືອງໄຊພູທອງ, ຕັ້ງຢູ່ທາງທິດເໝຶອຂອງເມືອງ ປະມານ 12 ກິໂລແມັດ, ບ້ານທ່າໂພ ແມ່ນມີເນື້ອທີ່ທັງ ໝົດ 2,161,929 ກວ່າເຮັກຕາ, ປະກອບມີ 639 ຫຼັງຄາ, ມີ 721 ຄອບຄົວ, ຍິງ1.433 ຄົນ,ປະຊາຊົນສວນໃຫຍ່ແມ່ນຖືອາຊີບເຮັດນາ ເປັນຕົ້ນຕໍ, ນອກນັ້ນປະຊາຊົນແຕ່ລະຄອບຄົວໄດ້ກິນນໍ້າສະອາດ 100%, ພາຍໃນບ້ານໄດ້ຊົມໃຊ້ໄຟຟ້າ100%, ອາຊີຄ້າຂາຍ ເປັນສໍາຮອງ, ມີ 2 ໜ່ວຍພັກຄື: ໜ່ວຍພັກປົກຄອງບ້ານ ແລະ ໜ່ວຍພັກສຶກສາ ເຊິ່ງມີຄະນະພັກ 6 ສະຫາຍ,ຍິງ 2 ສະຫາຍ, ມີສະມາຊິກພັກທັງໝົດ 44 ສະຫາຍ.
ນອກນັ້ນຍັງມີຄະນະບ້ານລວມ 15 ສະຫາຍ, ຍິງ 2 ສະຫາຍ ພ້ອມດ້ວຍຂະແໜງການອອ້ມຂ້າງຄົບຊຸດ, ພ້ອມນັ້ນທ່ານຍັງໄດ້ຍົກໃຫ້ເຫັນການພັດທະນາບ້ານໃຫຍ່ຄ້າຍຄືຕົວເມືອງນ້ອຍໃນຊົນນະບົດ. ບ້ານທ່າໂພ ແມ່ນບ້ານໜຶ່ງທີ່ມີລະບົບການຈັດຕັ້ງໜັກແໜ້ນເຂັ້ມແຂວງສາມາດຮັບຮອງ ໜ່ວຍພັກເເຂງ-ຮູ້ນໍາພາຮອບດ້ານ 5 ສະໄໝຕິດຕໍ່ກັນ, ເຫັນໄດ້ວ່າປະຊາຊົນມີຄວາມຕື່ນຕົວທາງດ້ານການເມືອງໜັກແໜ້ນ ແລະ ປະຕິບັດລະບຽບກົດໝາຍຂອງບ້ານເມືອງໄດ້ດີມີຄວາມຮັກແພງຊ່ວຍເຫຼືອເຊິ່ງກັນ ແລະ ກັນຢ່າງແໜ້ນແຟ້ນ. ຄຽງຄູ່ກັນນີ້ບ້ານທ່າໂພເປັນຄອບຄົວພັດທະນາເຊິ່ງກວມເອົາ 95% ຂອງຈໍານວນຄອບຄົວທັງໝົດພາຍໃນບ້ານ, ບ້ານຍັງມີຕະຫຼາດນັດ 1 ແຫ່ງ, ນອກນັ້ນຄະນະປົກຄອງບ້ານຍັງໄດ້ນໍາພາປະຊາຊົນສ້າງທາງເບຕົງເສີມເຫຼັກກວ້າງ 5 ແມັດ, ສູງ 15 ຊັງຕີແມັດ ໄດ້ທັງໝົດ 1.563 ແມັດ, ມູນຄ່າ 676 ລ້ານກວ່າກີບ ທຶນປະກອບສ່ວນຂອງປະຊາຊົນ100% ແລະ ນໍາພາປະຊາຊົນສ້າງທາງເບຕົງເສີມເຫຼັກ ພາຍໃນວັດອອ້ມສາລາໂຮງທໍາ ແລະ ພັດທະສິມມາ ມີຄວາມຍາວ 183 ແມັດ, ກວ້າງ 6 ແມັດ, ມູນຄ່າ 63 ລ້ານກວ່າກີບ.
ຈາກນັ້ນຄະນະນັກສຶກສາຈາກສະຖາບັນການເມືອງໂຮຽນການເມືອງການປົກຄອງແຫ່ງຊາດຊັ້ນສູງ ຍັງໄດ້ເດີນທາງໄປກາບໄຫວສາກາລະບູຊາພະທາດໂຜນ ທີ່ສັກສິດຄູ່ບ້ານຄູ່ເມືອງຂອງຊາວເມືອງໄຊພູທອງ ແຂວງສະຫວັນນະເຂດ ຕື່ມອີກ
Editor: ກຳປານາດ ລັດຖະເຮົ້າ
