ງານສະເຫຼີມສະຫຼອງສາຍພົວພັນຮ່ວມມືມິດຕະພາບ ລະຫວ່າງ ແຂວງວຽງຈັນ ແລະ ແຂວງອຽນບ້າຍ ຄົບຮອບ 10 ປີ, ໂດຍໄດ້ເລີ່ມຈາກການວາງກະຕ່າດອກໄມ້ ຢູ່ອານຸສອນສະຖານ ປະທານໄກສອນ ພົມວິຫານ ແລະ ຈູດທູບ ນົບໄຫວ້ ທີ່ຫໍສີລາຈາລຶກສຳພັນສູ້ຮົບ ລາວ-ຫວຽດນາມ ຢູ່ທີ່ບ້ານໂພນແຮ່, ເມືອງທຸລະຄົມ, ແຂວງວຽງຈັນ ໃນຕອນເຊົ້າຂອງວັນທີ 04 ກໍລະກົດ 2018 ທີ່ຜ່ານມາ ເຊີ່ງນຳພາໂດຍ ທ່ານ ວິດົງ ໄຊຍະສອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ, ທ່ານ ໂດ້ ດຶກ ຊຸຍ ຮອງເລຂາພັກແຂວງ, ເຈົ້າແຂວງໆອຽນບ້າຍ ສສ ຫວຽດນາມ ພ້ອມທັງການນຳພັກ-ລັດທັງສອງແຂວງ ເຂົ້າຮ່ວມ,
ເພຶ່ອສະແດງຄວາມເຄົາລົບຮັກຮູ້ບຸນຄຸນ ແລະ ຜົນງານອັນໃຫຍ່ຫຼວງຂອງປະທານ ໄກສອນ ພົມວິຫານ ແລະ ບັນດາທະຫານປະສົມລາວ-ຫວຽດນາມ ທີ່ໄດ້ສະຫຼະຊີວິດເພຶ່ອປະເທດຊາດ. ຫຼັງຈາກນັ້ນການນຳທັງສອງແຂວງວຽງຈັນ-ອຽນບ້າຍ ໄດ້ຈັດພິທີພົບປະເຈລະຈາ ແລະ ລົງນາມເຊັນບົດບັນທຶກການຮ່ວມມືຮ່ວມກັນ, ໃນບົດບັນທຶກໄດ້ລະບຸວ່າ: ໃນປີ 2018 ນີ້, ແຂວງອຽນບ້າຍ ສສ ຫວຽດນາມ ຈະສືບຕໍ່ກໍ່ສ້າງນ້ອງນັກຮຽນຂອງແຂວງວຽງຈັນ ຈຳນວນ 30 ນ້ອງ ທີ່ກຳລັງສຶກສາຮ່ຳຮຽນຢູ່ແຂວງອຽນບ້າຍ ແລະ ສືບຕໍ່ຮັບເອົານ້ອງນັກຮຽນຂອງແຂວງວຽງຈັນ ຊຸດໃໝ່ ຈຳນວນ 15 ນ້ອງ ໄປຮຽນພາສາຫວຽດນາມ ໄລຍະ 1 ປີ, ຈາກນັ້ນສືບຕໍ່ຮຽນວິຊາສະເພາະຢູ່ແຂວງອຽນບ້າຍ, ທັງສອງແຂວງຈະພັດປ່ຽນກັນໄປມາຢ້ຽມຢາມ, ແລກປ່ຽນບົດຮຽນ ແລະ ປຶກສາຫາລືກໍານົດທິທາງແຜນການຮ່ວມມືມິດຕະພາບໃນປີຕໍ່ໜ້າ, ຊ່ວຍແຂວງວຽງຈັນ ສ້າງປື້ມ,ແຜນພັບ ແລະ ຄລິບວີດີໂອ ກ່ຽວກັບເງື່ອນໄຂທ່າແຮງບົ່ມຊ້ອນ ແລະ ກາລະໂອກາດກ່ຽວກັບການລົງທຶນໃນແຂວງວຽງຈັນ ເພຶ່ອນຳໄປໂຄສະນາ, ແນະນໍາ ແລະ ຊຸກຍູ້ສົ່ງເສີມຮຽກຮ້ອງເອົາການລົງທຶນມາສູ່ແຂວງວຽງຈັນ, ພ້ອມນີ້ແຂວງອຽນບ້າຍ ຍັງມອບຄອມພິວເຕີຕັ້ງໂຕະ ຈຳນວນ 20 ເຄື່ອງ ໃຫ້ໂຮງຮຽນມັດທະຍົມຕອນປາຍແຫ່ງໃດ ໜຶ່ງຂອງແຂວງວຽງຈັນ, ແຂວງອຽນບ້າຍ ກໍ່ຍັງຈະຈັດຕັ້ງຄະນະວິຊາການຂະແໜງສາທາລະນະສຸກ ມາຢ້ຽມຢາມ ແລະ ກວດສຸຂະພາບໂດຍບໍ່ເສຍຄ່າໃຊ້ຈ່າຍໃຫ້ປະຊາຊົນຢູ່ບ້ານທຸກຍາກຈຳນວນໜຶ່ງຂອງແຂວງວຽງຈັນ ແລະ ໃນດ້ານອື່ນໆອີກ.
ໃນຕອນບ່າຍຂອງວັນດຽວກັນ ຢູ່ທີ່ສະໂມສອນໃຫຍ່ຂອງແຂວງ ໄດ້ມີງານໂຮມຊຸມນຸມສະເຫຼີມສະຫຼອງສາຍພົວພັນຮ່ວມມືມິດຕະພາບ ລະຫວ່າງ ແຂວງວຽງຈັນ ແລະ ແຂວງອຽນບ້າຍ ຄົບຮອບ 10 ປີ, ໂດຍມີມວນຊົນຈໍານວນຫຼວງຫຼາຍທີ່ເປັນພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ເພຶ່ອຮັບຟັງການປາໄສ ຂອງ ທ່ານ ວິດົງ ໄຊຍະສອນ ກຳມະການສູນກາງພັກ,ເລຂາພັກແຂວງ, ເຈົ້າແຂວງໆວຽງຈັນ ແລະ ທ່ານ ໂດ້ ດຶກ ຊຸຍ ຮອງເລຂາພັກແຂວງ, ເຈົ້າແຂວງໆອຽນບ້າຍ, ໄດ້ພັດປ່ຽນກັນຂຶ້ນກ່າວຄໍາປາໄສໃນງານໂຮມຊຸມນຸມຄັ້ງນີ້ວ່າ: ປະຊາຊົນສອງຊາດລາວ-ຫວຽດນາມ ມີມູນເຊື້ອສາມັກຄີຊ່ວຍເຫຼືອເຊິ່ງກັນ ແລະ ກັນ, ໃນການກໍ່ສ້າງ, ປົກປັກຮັກສາປະເທດຊາດຂອງໃຜລາວມາໄດ້ຫຼາຍພັນປີແລ້ວ. ພິເສດໃນໄລຍະດຳເນີນການຕໍ່ສູ້ປະຕິວັດ ເພຶ່ອຄວາມເປັນເອກະລາດແຫ່ງຊາດ ເປັນເວລາກວ່າເຄິ່ງສັດຕະວັດຜ່ານມານັ້ນ, ພາຍໃຕການນໍາພາຂອງພັກກອມມູນິດອິນດູຈີນ ໃນເມື່ອກ່ອນ, ຕໍ່ມາແມ່ນພັກປະຊາຊົນປະຕິວັດລາວ ແລະ ພັກຄອມມູນິດຫວຽດນາມ, ຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ທີ່ເປັນມູນເຊື້ອອັນດີງາມນັ້ນຍິ່ງໄດ້ຮັບຄວາມເອົາໃຈໃສ່ທະນຸບຳລຸງເຊີດຊູ ໃຫ້ແໜ້ນແຟ້ນເຕີບໃຫຍ່ຂະຫຍາຍຕົວ ຈົນກາຍເປັນຄວາມສາມັກຄີແບບພິເສດການຮ່ວມມືຮອບດ້ານ ແລະ ເລິກເຊິ່ງກວ່າເວລາໃດໝົດ, ເຊິ່ງແມ່ນປະທານ ໂຮ່ຈິມິນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ເປັນຜູ້ລິເລີ່ມ. ເຊີ່ງມັນໄດ້ກາຍເປັນປັດໃຈຕັດສິນແຫ່ງໄຊຊະນະແຫ່ງການປະຕິວັດຂອງສອງຊາດເຮົາ. ມາຮອດທຸກມື້ນີ້ການນຳແຕ່ລະລຸ້ນຂອງສອງພັກ-ສອງລັດ ກໍ່ລ້ວນແຕ່ໄດ້ເອົາໃຈໃສ່ປັບປຸງເສີມຂະຫຍາຍໃຫ້ກາຍເປັນການພົວພັນສາມັກຄີອັນບໍລິສຸດຜຸດຜ່ອງ ທີ່ຫາຍາກໃນການພົວພັນຮ່ວມມືສາກົນ ແລະ ໄດ້ກາຍເປັນມໍລະດົກອັນລ້ຳຄ່າຂອງສອງຊາດລາວ-ຫວຽດນາມ.
ແລະ ໃນຕອນຄ່ຳຂອງວັນດຽວກັນນີ້ ກໍ່ໄດ້ຈັດໃຫ້ມີງານລ້ຽງຊົມເຊີຍຜົນສຳເລັດ ພິທີສະເຫຼີມສະຫຼອງສາຍພົວພັນຮ່ວມມືມິດຕະພາບ ລະຫວ່າງ ແຂວງວຽງຈັນ ແລະ ແຂວງອຽນບ້າຍ ຄົບຮອບ 10 ປີ, ມີພິທີບາສີສູ່ຂວັນຢູ່ທີສະໂມສອນກອງບັນຊາການທະຫານແຂວງວຽງຈັນ ອີກດ້ວຍ
Editor: ກຳປານາດ ລັດຖະເຮົ້າ
