ຊຸດຮຽນ ທິດສະດີການເມືອງ-ການປົກຄອງ ຊັ້ນກາງ ລະບົບ 15 ເດືອນ ຮຸ່ນທີ 9 ຂອງໂຮງຮຽນການເມືອງການປົກຄອງ ແຂວງເຊກອງ ໄດ້ປິດລົງ ຢ່າງເປັນທາງການ ເມື່ອບໍ່ດົນມານີ້, ເຊີ່ງ ທ່ານ ບຸນທັນ ຈູມຈັນທະວົງ ຫົວໜ້າໂຮງຮຽນການເມືອງການປົກຄອງແຂວງເຊກອງ ໄດ້ລາຍງານການເຄື່ອນໄຫວຈັດຕັ້ງປະຕິບັດຫຼັກສູດການຮຽນ-ການສອນ ທິດສະດີ-ການເມືອງ ຮຸ່ນທີ 9 ສົກຮຽນ 2017-2018 ໃຫ້ຮູ້ວ່າ: ໂຮງຮຽນ ໄດ້ຍົກສູງຄວາມເປັນເຈົ້າການ ແລະ ມີຄວາມຮັບຜິດຊອບສູງໃນການຊີ້ນໍາ-ນໍາພາ, ບໍລິຫານ-ຄຸ້ມຄອງການຮຽນ-ການສອນ ໃຫ້ໄປຕາມໂຄງການຫຼັກສູດຢ່າງເຂັ້ມງວດ ແລະ ມີຄຸນນະພາບດີ, ເຊິ່ງຄູ-ອາຈານ ທີ່ສິດສອນຢູ່ໂຮງຮຽນໃນລະບົບຮຽນດັ່ງກ່າວ ແມ່ນມາຈາກ 3 ພາກສ່ວນຫຼັກໆ ຄື: ຄູ-ອາຈານປະຈໍາໂຮງຮຽນ, ອາຈານຮັບເຊີນພາຍໃນແຂວງ ແລະ ມາຈາກສະຖາບັນການເມືອງ-ການປົກຄອງແຫ່ງຊາດ ແລະ ມີນັກສຶກສາທີ່ມາຈາກຫຼາຍພາກສ່ວນ, ຫຼາຍຂົງເຂດຂອງກົງຈັກການຈັດຕັ້ງພັກ-ລັດ ພາຍໃນແຂວງ ແລະ 4 ເມືອງ; ເຊິ່ງ ຊຸດຮຽນຮຸ່ນນີ້ໄດ້ດໍາເນີນມາແຕ່ເດືອນມັງກອນ 2017 ແລະ ມາຮອດ ທ້າຍເດືອນມີຖຸນາ 2018 ຈິ່ງໄດ້ສໍາເລັດ ຫຼັກສູດການຮຽນຢ່າງສົມບູນ,
ໃນໂອກາດນີ້ ທ່ານນາງ ຈັນຫອມ ມະຫາໄຊ ກໍາມະການປະຈໍາພັກແຂວງ, ປະທານກວດກາພັກ-ລັດແຂວງ ໄດ້ໂອ້ລົມ ແລະ ໃຫ້ທິດຊີ້ນໍາໃຫ້ແກ່ຄູ-ອາຈານ ສືບຕໍ່ເອົາໃຈໃສ່ຄົ້ນຄ້ວາຊອກວິທີການ ແບບແຜນ-ທິດທາງ ເພື່ອປັບປຸງລະບົບຫຼັກສູດການຮຽນ-ການສອນ ໃຫ້ມີຄວາມເໝາະສົມກັບສິພາບຕົວຈິງ ແລະ ມີຄຸນນະພາບດີຂຶ້ນກວ່າເກົ່າ ພ້ອມນີ້ຍັງໄດ້ຮຽກຮ້ອງໃຫ້ຂະແໜງການທີ່ກ່ຽວຂ້ອງ ບັນຈຸ-ສັບຊ້ອນ ໜ້າທີ່ຮັບຜິດຊອບໃຫ້ແກ່ນັກສຶກສາທີ່ຮຽນຈົບໄປນີ້ ໃຫ້ຖືກຕ້ອງສອດຄ່ອງ ເພື່ອຮັບປະກັນໃຫ້ແກ່ການກໍ່ສ້າງ ພະນັກງານສືບທອດ-ປ່ຽນແທນ ໃຫ້ມີຄຸນນະພາບ.
Editor: ກຳປານາດ ລັດຖະເຮົ້າ
