ໃນວັນ ທີ 5 ກໍລະກົດ 2018 ຜ່ານມາ, ທ່ານນາງ ຂັນຄໍາ ແສງປະທຸມມາ ຮອງຫົວໜ້າກົມກວດກາ ກະຊວງພາຍໃນ ພ້ອມທິງານ ໄດ້ເຄື່ອນໄຫວຕິດຕາມຊຸກຍູ້ ການປະຕິບັດວຽກງານກວດກາລັດ ຂອງຫ້ອງການພາຍໃນ ເມືອງທ່າແຕງ, ເພື່ອເກັບກໍາຂໍ້ມູນການຈັດຕັ້ງປະຕິບັດນິຕິກໍາ ຕິດພັນກັບການປະຕິບັດພາລະບົດບາດ, ເພື່ອຊຸກຍູ້ສົ່ງເສີມ ບັນດາຜົນສໍາເລັດໃນໄລຍະຜ່ານມາ ແລະ ຮັບຮູ້ບັນດາປະກົດການຫຍໍ້ທໍ້ຕ່າງໆ ເພື່ອພ້ອມກັນແກ້ໄຂ ໃຫ້ທັນການ. ເຂົ້າຮ່ວມໃນການຕິດຕາມຄັ້ງນີ້ ໂດຍ ທ່ານ ຄໍາຊໍ ບຸດດາເຟ້ ຮອງຫົວໜ້າພະແນກພາຍໃນ ແຂວງເຊກອງ, ມີຫົວໜ້າຫ້ອງການພາຍໃນ ເມືອງທ່າແຕງ ພ້ອມພະນັກງານວິຊາການເຂົ້າຮ່ວມ.
ໂອກາດດັ່ງກ່າວ ທ່ານ ສຸກສະໄໝ ວົງສະນຸພິດ ຫົວໜ້າຫ້ອງການພາຍໃນ ເມືອງທ່າແຕງ ໄດ້ລາຍງານການຈັດຕັ້ງປະຕິບັດວຽກງານຂອງຂະແໜງພາຍໃນເມືອງ ໃຫ້ຮັບຊາບ. ໂດຍຜ່ານມາ ໄດ້ຈັດຕັ້ງປະຕິບັດ ຕາມພາລະບົດບາດ ເປັນເສນາທິການ ເຮັດວຽກການຄຸ້ມຄອງບໍລິຫານລັດໃຫ້ຄະນະປະຈໍາພັກເມືອງ, ໄດ້ນໍາເອົາມະຕິຄໍາສັ່ງ, ນິຕິກໍາຕ່າງໆຂອງຂັ້ນເທິງ ມາຜັນຂະຫຍາຍຢ່າງກວ້າງຂວາງ ເຮັດໃຫ້ພະນັກງາານກໍາແໜ້ນນະໂຍບາຍຂອງພັກ, ລະບຽບກົດໝາຍຂອງລັດກວ້າງຂວາງຂຶ້ນກວ່າເກົ່າ, ພ້ອມນັ້ນ, ກໍ່ໄດ້ປະຕິບັດຕາມຂໍ້ຕົກລົງຂອງນາຍົກລັດຖະມົນຕີ ເລກທີ 21/ນຍ, ເລກທີ 57/ນຍ ແລະ ເລກທີ 83/ນຍ ໃນການສັບຊ້ອນບາງວຽກງາຂອງລັດຖະບານ, ໂດຍສະເພາະ ສັບຊ້ອນວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ໄປຂຶ້ນກັບຫ້ອງການກະສິກໍາ ແລະ ປ່າໄມ້, ສັບຊ້ອນວຽກງານກໍ່ສ້າງຮາກຖານການເມືອງ ໄປຂຶ້ນກັບຫ້ອງວ່າການປົກຄອງເມືອງ ແລະ ວຽກງານອື່ນໆອີກ.
ອັນພົ້ນເດັ່ນ ແມ່ນໄດ້ຮັບໂອນວຽກງານສາມສ້າງ ເພື່ອເປັນຈຸດປະສານງານ ວຽກງານສາມສ້າງຂັ້ນເມືອງ. ພ້ອມທັງເຜີຍແຜ່ ວຽກງານສາມສ້າງ ໃຫ້ພະນັກງານຫລັກແຫຼ່ງໃນຂອບເຂດທົ່ວເມືອງຮັບຮູ້ເຂົ້າໃຈ ຢ່າງເລິກເຊິ່ງ. ພາຍຫຼັງທີ່ຮັບຟັງການລາຍງານສະພາບການແລ້ວ, ທ່ານຮອງຫົວໜ້າກົມກວດກາ ກະຊວງພາຍໃນ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດດັ່ງກ່າວ. ພ້ອມທັງຊຸກຍູ້ສົ່ງເສີມ ໃຫ້ຫ້ອງການພາຍໃນເມືອງທ່າແຕງ ຕ້ອງພ້ອມກັນຈັດຕັ້ງປະຕິບັດພາລະບົດບາດຂອງຕົນ ໃຫ້ເປັນປົກກະຕິ ແລະ ຕໍ່ເນື່ອງ, ເພີ່ມທະວີຄວາມສາມັກຄີ ແລະ ຜັນຂະຫຍາຍມະຕິຄໍາສັ່ງ ຂອງຂັ້ນເທິງໃຫ້ກວ້າງຂວາງກວ່າເກົ່າ, ສືບຕໍ່ປັບປຸງກົງຈັກການຈັດຕັ້ງໃຫ້ໜັກແໜ້ນ ແລະ ເຂັ້ມແຂງ.
ແຫລ່ງຂ່າວທີມຂ່າວ ເມືອງທ່າແຕງ, ແຂວງເຊກອງ
Editor: ກຳປານາດ ລັດຖະເຮົ້າ
