ກອງປະຊຸມໃຫ່ຍຄັ້ງທີ່ 8 ຂອງຜູ້ແທນຊາວໜຸ່ມ ທົ່ວເມືອງຊະນະສົມບູນ ແຂວງຈຳປາສັກ ໄດ້ເປີດຂື້ນຢ່າງເປັນທາງການ. ໃນວັນທີ 11 ກໍລະກົດ 2018 ຜ່ານມານີ້,ຢູ່ທີ່ສະໂມສອນປົກຄອງເມືອງດັ່ງກ່າວ, ໂດຍພາຍໃຕ້ການເປັນປະທານເຂົ້າຮ່ວມຂອງ ສະຫາຍ ສົມບູນ ເຮືອງວົງສາ ກໍາມະການພັກແຂວງ ເລຂາພັກເມືອງ ເຈົ້າເມືອງໆຊະນະສົມບູນ, ມີ ສະຫາຍ ອຸດົມສັກ ດິວິໄຊ ກໍາມະການສູນກາງຊາວໜຸ່ມ ປະຊາຊົນປະຕິວັດລາວ, ກໍາມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງຈຳປາສັກ, ພ້ອມນີ້ຍັງມີບັນດາສະຫາຍຫົວໜ້າຫ້ອງການຢູ່ໃນຂົງເຂດອົງການຈັດຕັ້ງມະຫາຊົນຂັ້ນເມືອງ, ມີປະທານອົງການພຣະພຸດທະສາດສະໜາສໍາພັນລາວ ປະຈໍາເມືອງ, ພະນັກງານອາວຸໂສບຳນານ, ເລຂາຄະນະບໍລິຫານງານຊາວຈາກ 3 ຕົວເມືອງ 1 ນະຄອນ ພາຍໃນແຂວງ ແລະ ຕ່າງແຂວງ ຕະຫຼອດຮອດຄະນະບໍລິຫານງານຊາວໜຸ່ມ, ສະມາຊິກຊາວໜຸ່ມປະຊາຊົນປະຕິວັດລາວ ແຕ່ລະກົມກອງ, ຫ້ອງການ,ພື້ນຖານກຸ່ມ-ບ້ານທົ່ວເມືອງເຂົ້າຮ່ວມຢ່າງຫຼວງຫຼາຍ.
ໂອກາດທີ່ເຕັມໄປດ້ວຍຄວມໝາຍຄວາມສໍາຄັນ ສະຫາຍ ນາງ ມອນວິໄລ ຊຸຍມະນີວົງ ກຳມະການຊາວໜຸ່ມ ປະຊາຊົນປະຕິວັດລາວ ແຂວງຈຳປາສັກ, ເລຂາຄະນະບໍລິຫານງານ ຊາວໜຸ່ມເມືອງຊະນະສົມບູນ ໃຫ້ກຽດຂື້ນຜ່ານບົດລາຍງານການເມືອງຕີລາຄາ ການຈັດຕັ້ງປະຕິບັດມະຕິຜົນສຳເລັດກອງປະຊຸມໃຫ່ຍຜູ້ແທນຊາວໜຸ່ມ ທົ່ວເມືອງຊະນະສົມບູນຄັ້ງທີ 7 ແລະ ກໍານົດທິດທາງແຜນການ 5 ປີຕໍ່ໜ້າ, ເຊີ່ງຍົກໃຫ້ເຫັນຕະຫຼອດໄລຍະຜ່ານມາຄະນະບໍລິຫານງານຊາວໜຸ່ມເມືອງແມ່ນໄດ້ຖືເອົາວຽກງານການສຶກສາອົບຮົບດ້ານການເມືອງແນວຄິດ ລົງເຜີຍແຜ່ເອກະສານສຳຄັນຕ່າງໆຂອງພັກ-ຂອງຊາດ. ໂດຍສະເພາະລະບຽບກົດໝາຍຂອງສູນກາງຊາວໜຸ່ມ ປະຊາຊົນປະຕິວັດລາວທີ່ກຳນົດໄວ້ ເພື່ອແນ່ໃສເຮັດໃຫ້ບັນດາສະຫາຍສະມາຊິກຊາວໜຸ່ມ, ເຍົາວະຊົນທົ່ວເມືອງກໍາ ແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ. ຄຽງຄູ່ໄປພ້ອມການຈັດຕັ້ງຜັນຂະຫຍາຍເນື້ອໃນຫົວຂໍ້ແຂ່ງຂັນ 4 ບຸກ, ຄໍາສອນ 9 ປະການຂອງທ່ານຜູ້ນຳ ແລະ ເນື້ອໃນຂໍ້ແຂ່ງຂັນ 3 ດີ 4 ຮູ້, ສອດຄອງກັບແຜນພັດທະນາເສດຖະກິດ - ສັງຄົມ. ປະຈຸບັນໃນທົ່ວເມືອງປະກອບ ມີ 3 ຮາກຖານ, ມີ 86 ໜ່ວຍ, ມີຄະນະໜ່ວຍຊາວໜຸ່ມທັງ ໝົດ 334 ສະຫາຍ, ຍິງ 122 ສະຫາຍ, ໄວໜຸ່ມໃນເກນອາຍຸ 15-35 ທັງໝົດ 8,527 ຄົນ, ຍິງ 4,340 ຄົນ, ໃນນັ້ນສະມາຊິກຊາວໜຸ່ມ ປະຊາຊົນປະຕິວັດລາວ ທັງໝົດ 3,457 ສະຫາຍ, ຍິງ 1,833 ສະຫາຍ, ທຽບໃສປີ 2014 ເພີ່ມຂື້ນ 62 ສ່ວນຮ້ອຍ.
ໃນຕ້ອນທ້າຍ ກອງປະຊຸມ ບັນດາສະຫາຍຜູ້ແທນຊາວໜຸ່ມ ປະຊາຊົນປະຕິວັດລາວ ທີ່ເຂົ້າຮ່ວມຍັງໄດ້ພ້ອມກັນໃຊ້ສິດປະຊາທິປະໄຕ ປ່ອນບັດເລືອກເອົາ ຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ເມືອງຊະນະສົມບູນຊຸດທີ 8 ເຊີ່ງມີຜູ້ສະໝັກ 27 ສະຫາຍ, ຍິງ 4 ສະຫາຍ,ເລືອກໄດ້ 23 ສະຫາຍ. ຍິງ 4 ສະຫາຍ, ໃນນັ້ນກອງປະຊຸມຂັ້ນປະຖົມມະລຶກໄດ້ຕົກລົງເຫັນດີເປັນເອກະພາບເລືອກເອົາ ສະຫາຍ ສຸຂີ ພຸດທະວົງ ເປັນເລຂາຄະນະບໍລິຫານງານຊາວໜຸ່ມເມືອງ,ສະຫາຍ ສິດສະຫວັດ ວໍລະຈິດ ເປັນຮອງເລຂາ ແລະ ສະຫາຍ ນາງ ທິດດາວັນ ສິງສົມບູນ ເປັນຮອງເລຂາ, ທັງເປັນປະທານກວດກາຊາວໜຸ່ມເມືອງ
ໂດຍທີມຂ່າວ: ຫ້ອງການຖວທ ເມືອງຊະນະສົມບູນ
Editor: ກຳປານາດ ລັດຖະເຮົ້າ
