ເມື່ອບໍ່ດົນມານີ້, ທີ່ໂຮງແຮມຈໍາປາສັກແກຣນ ນະຄອນປາກເຊ, ແຂວງຈໍາປາສັກ ຄະນະກໍາມະການຮ່ວມມື ຕວາມສະຫງົບ-ຄວາມເປັນລະບຽບຮຽບຮ້ອຍຕາມຊາຍແດນ ລາວ-ໄທ ໄດ້ຈັດກອງປະຊຸມ ດັ່ງກ່າວຂື້ນ ເພື່ອເປັນການປຶກສາຫາລື ວຽກງານຕ່າງໆ ຮ່ວມກັນ. ກອງປະຊຸມດັ່ງກ່າວ ໂດຍການເປັນປະທານຮ່ວມ ຂອງ ທ່ານ ບຸນຖອງ ດີວີໄຊ ເຈົ້າແຂວງຈໍາປາສັກ, ທ່ານ ສະຫລິດ ວິທູນ ຜູ້ວ່າການແຂວງອຸບົນ ຣາດຊະທານີ ປະເທດໄທ ພ້ອມດ້ວຍການນໍາທັງ 2 ຝ່າຍ ເຂົ້າຮ່ວມ.
ກອງປະຊຸມ ຄັ້ງນີ້ ທັງ 2 ຝ່າຍ ໄດ້ຄົ້ນຄົວ້າຫາລື ປະກອບຄໍາຄິດຄໍາເຫັນ ແລະ ທົບທວນຄືນການຈັດຕັ້ງປະຕິບັດ ບົດບັນທຶກກອງປະຊຸມຄະນະກໍາມະການຮ່ວມມື ຮັກສາຄວາມສະຫງົບ-ຄວາມເປັນລະບຽບຮຽບຮ້ອຍຕາມຊາຍແດນ ລາວ-ໄທ ລະຫວ່າງ ແຂວງຈໍາປາສັກ ແລະ ແຂວງອຸບົນຣາດຊະທານີີ ຄັ້ງທີ 11 ທີ່ຜ່ານມາ, ເຊີ່ງທັງ 2 ຝ່າຍ ເຫັນວ່າກົນໄກການຮ່ວມມືຮັກສາຄວາມສະຫງົບ-ຄວາມເປັນລະບຽບຮຽບຮ້ອຍຕາມຊາຍແດນ ເປັນສັນຍາລັກການຮ່ວມມື ທີ່ໃກ້ຊິດຕິດແພ້ນ, ຕິດພັນກັບຄວາມພະຍາຍາມໃນການແກ້ໄຊບັນຫາຕ່າງໆ ທີ່ເກີດຂື້ນຕາມຊາຍແດນ, ເຮັດໃຫ້ໄດ້ຮັບຜົນປະໂຫຍດຮ່ວມກັນ ທັງ 2 ຝ່າຍ.
ກອງປະຊຸມ ຄັ້ງທີ 12 ນີ້, ທັງ 2 ຝ່າຍ ຍັງໄດ້ເຫັນດີສຶບຕໍ່ສາຍພົວພັນດ້ານຕ່າງໆໆ ເຊັ່ນ: ສຶບຕໍ່ຖອດຖອນບົດຮຽນຂອງຄະນະກໍາມະການຂັ້ນສູງ ຮັກສາຄວາມສະຫງົບ-ຄວາມເປັນລະບຽບຮຽບຮ້ອຍ ຕາມຊາຍແດນ, ທັງ 2 ຝ່າຍ ເພື່ອຄວາມໄວ້ເນື້ອເຊື່ອໃຈເຊີ່ງກັນ ແລະ ກັນ, ເຮັດໃຫ້ຊາຍແດນລະຫວ່າງປະເທດ ເປັນຊາຍແດນແຫ່ງມິດຕະພາບ ແລະ ພັດທະນາຮ່ວມມືກັນ ໃນຄວາມສະຫງົບ-ຄວາມຫມັ້ນຄົງ. ພ້ອມກັນນັ້ນ ທັງ 2 ຝ່າຍ ຍັງສຶບຕໍ່ສໍາຫລວດປັກຫລັກຫມາຍຊາຍແດນ ລາວ-ໄທ ທາງບົກ ໃຫ້ສໍາເລັດ ໃນປີ 2020 ແລະ ເລັ່ງລັດດໍາເນີນການຖ່າຍທອດເສັ້ນຊາຍແດນ ລົງໃນແຜນທີ່ແມ່ນນໍ້າຂອງສະບັບໃຫມ່ ເພື່ອນໍາໄປສໍາຫລວດ ແລະ ປັກຫລັກຫມາຍຊາຍແດນທາງນໍ້າໃຫ້ສໍາເລັດ ໃນປີ 2021 ນອກນັ້ນ ຍັງສຶບຕໍ່ແກ້ໄຂບັນຫາການຄ້າຂາຍ-ຢາເສບຕິດຂ້າມຊາດຕາມຊາຍແດນ, ສະກັດກັ້ນການຄ້າມະນຸດ, ສົ່ງເສີມພັດທະນາສີມືແຮງງານ, ການຮ່ວມມືພັດທະນາເສດຖະກິດ-ສັງຄົມ, ການສົ່ງເສີມການທ່ອງທ່ຽວ ແລະ ວຽກງານອື່ນໆ. ທີ່ກໍ່ໃຫ້ເກີດຜົນປະໂຫຍດທັງ ສອງປະເທດ ກໍ່ຄືແຂວງຈໍາປາສັກ ແລະ ແຂວງອຸບົນຣາດຊະທານີ.
ໂອກາດດັ່ງກ່າວ ການນໍາທັງ 2 ແຂວງ ຍັງໄດ້ຮ່ວມກັນລົງນາມຮ່ວມມື ເຊີ່ງກັນ ແລະ ກັນ ລະຫວ່າງ ທ່ານ ບຸນຖອງ ດີວີໄຊ ເຈົ້າແຂວງຈໍາປາສັກ ແລະ ທ່ານ ສະຫລິດ ວິທູນ ຜູ້ວ່າການ ແຂວງອຸບົນລາດຊະທານີ ປະເທດໄທ.
Editor: ກຳປານາດ ລັດຖະເຮົ້າ
