ກອງປະຊຸມຄົບຄະນະບໍລິຫານງານພັກເມືອງ ທ່າແຕງ ຄັ້ງທີ 8 ສະໄໝທີ 5 ໄຂຂື້ນໃນກາງເດືອນ ກໍລະກົດ 2018 ນີ້, ທີ່ສະໂມສອນປົກຄອງເມືອງ, ກອງປະຊຸມໄດ້ຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 8 ໃນໄລຍະ 6 ເດືອນຕົ້ນປີ 2018 ແລະ ວາງທິດທາງສູ້ຊົນ 6 ເດືອນທ້າຍປີ 2018 ຂອງອົງຄະນະພັກເມືອງ ທ່າແຕງ. ໂດຍການເຂົ້າຮ່ວມເປັນປະທານຂອງ ທ່ານ ຄໍາສອນ ກອນເຍີ ເລຂາພັກເມືອງ-ເຈົ້າເມືອງ-ເມືອງ ທ່າແຕງ, ມີ ທ່ານ ແກດ ດາລາແພງ ສະມາຊິກສະພາປະຊາຊົນ ແຂວງເຊກອງ ປະທານກໍາມະທິການເສດຖະກິດແຜນການແລະການລົງທືນ, ຜູ້ຕາງໜ້າຄະນະໂຄສະນາອົບຮົມແຂວງ, ຫ້ອງວ່າການປົກຄອງແຂວງເຊກອງ, ຄະນະປະຈໍາພັກເມືອງ, ກໍາມະການພັກເມືອງ ພ້ອມດ້ວຍຄະນະຫ້ອງການ, ເຂດຈຸດສຸ່ມພັດທະນາ 6 ເຂດ ແລະ ເລຂາພັກບ້ານພາຍໃນເມືອງເຂົ້າຮ່ວມ.
ໃນໂອກາດກ່າວເປີດກອງປະຊຸມຄັ້ງນີ້ ທ່ານ ຄໍາສອນ ກອນເຍີ ເຈົ້າເມືອງ-ເມືອງ ທ່າແຕງ ໃຫ້ຮູ້ວ່າ: ຄະນະພັກເມືອງພວກເຮົາໄດ້ເອົາໃຈໃສ່ຊຸກຍູ້ບັນດາທຸກວຽກງານທີ່ປິ່ນອ້ອມພາຍໃນເມືອງຢ່າງແຂງແຮງ ຕໍ່ກັບການພັດທະນາເສດຖະກິດເປັນໃຈກາງ,ສູ້ຊົນຂຸດຄົ້ນທ່າແຮງບົ່ມຊ້ອນ ໂດຍເອົາການສົ່ງເສີມການຄ້າຂາຍບໍລິການ ຕິດພັນກັບການປຸ່ງແຕ່ງຜະລິດຕະພັນເປັນສິນຄ້າ, ເສີມຂະຫຍາຍແນວຄິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັມແຂງດ້ວຍຕົນເອງ, ຫັນເອົາພະນັກງານວິຊາການລົງຊ່ວຍວຽກກຸ້ມບ້ານ-ບ້ານຈຸດສຸມ ສ້າງເປັນໂຄງການ,ສູ້ຊົນພັດທະນາເສດຖະກິດໃນແຕ່ລະຂະແໜງການໃຫ້ມີ ການຂະຫຍາຍຕົວໄປພ້ອມໆກັນ, ການເຕີບໂຕທາງດ້ານເສດຖະກິດບັນລຸ 9,14 ສ່ວຍຮ້ອຍ, ມາໃນປະຈຸບັນ ລວມຍອດຜະລິດຕະພັນພາຍໃນ ( GDP ) ໄດ້ 746.943 ລ້ານກີບ, ສະເລ່ຍໃສ່ຫົວຄົນໄດ້ 17 ລ້ານ 7 ແສນກວ່າກີບ, ເທົ່າກັບ 2.216 ໂດລາສະຫະລັດ/ຄົນ/ປີ, ໃນນັ້ນຂະແໜ່ງກະສິກຳ ແລະ ປ່າໄມ້ ເພີ່ມຂື້ນ 15,66 ສ່ວນຮ້ອຍ, ກວມເອົາ 39,85 ສ່ວນຮ້ອຍ ຂອງ GDP, ຂະແໜ່ງອຸດສະຫະກໍາເພີ່ມຂື້ນ 2,35 ສ່ວນຮ້ອຍ, ກວມເອົາ 29,02 ສ່ວນຮ້ອຍ ຂອງ GDP ,ຂະແໜ່ງການບໍລິການເພີ່ມຂື້ນ 8,02 ສ່ວນຮ້້ອຍ, ກວມເອົາ 31,13 ສ່ວນຮ້ອຍ ຂອງ GDP. ບົນພື້ນຖານປັບປຸງຕາໜ່າງ ປ້ອງກັນຊາດ-ປ້ອງກັນຄວາມສະຫງົບ ຢູ່ຮາກຖານຢ່າງໜັກແໜ້ນ, ເຂັ້ມແຂງ, ເສີ່ມຂະຫຍາຍທາດແທ້ມູນເຊື້ອຂອງປະຊາຊົນບັນດາເຜົ່າຢ່າງຕັ້ງໜ້າ.
ພ້ອມກັນນີ້, ຕ້ອງໄດ້ຖືສໍາຄັນຕໍ່ການພັດທະນາເສດຖະກິດ-ສັງຄົມ, ຊີວິດການເປັນຢູ່ຂອງປະຊາຊົນບັນດາເຜົ່າ ແລະ ຖືເອົາການພັດທະນາພື້ນຖານໂຄງລ່າງເປັນໃຈກາງ ໂດຍນຳໃຊ້ທ່າແຮງທີ່ບົ່ມຊ້ອນຂອງເມືອງ ໂດຍສະເພາະ ການປູກຝັງ, ລ້ຽງສັດປະເພດຕ່າງໆສົມທົບກໍາລັງແຮງຈາກພາຍນອກເຂົ້າໃນການພັດທະນາ, ເຊິ່ງປັດຈຸບັນທົ່ວເມືອງທ່າແຕງ ສາມາດແກ້ໄຂຄວາມທຸກຍາກຂອງປະຊາຊົນຈາກ 291 ຄອບຄົວ ໃນປີ 2017 ຍັງເຫຼືອ 289 ຄອບຄົວ, ໃນ 6 ເດືອນຕົ້ນປີ 2018, ທົ່ວເມືອງທ່າແຕງ ມີ 8.108 ຄອບຄົວ, ມີພົນລະເມືອງ 41.306 ຄົນ, ຍິງ 20.880 ຄົນ, ທຽບໃສ່ປີ 2017 ເພີ່ມຂື້ນ 2,63 ສ່ວນຮ້ອຍ, ກວມເອົາ 33,92 ສ່ວນຮ້ອຍ, ຂອງພົນລະເມືອງທົ່ວແຂວງ ເຊກອງ 121.754 ຄົນ.
Editor: ກຳປານາດ ລັດຖະເຮົ້າ
