ໂດຍປະຕິບັດຕາມກົດໝາຍວ່າດ້ວຍ ສະພາປະຊາຊົນຂັ້ນແຂວງ ແລະ ເພື່ອເຮັດໃຫ້ການກະກຽມເລືອກຕັ້ງສະມາຊິກສະພາ ປະຊາຊົນຂັ້ນແຂວງຫົວພັນ ຊຸດທີ 2 ທີ່ຈະເລືອກຕັ້ງໃນໝໍ່ໆນີ້ ໃຫ້ໄດ້ບຸກຄະລາກອນທີ່ມີເງື່ອນໄຂມາດຖານຄົບຖ້ວນ ແລະ ແທດເໝາະກັບສະພາບຄວາມເປັນຈິງ ຢູ່ທ້ອງຖີ່ນນັ້ນ. ເມື່ອບໍ່ດົນມານີ້, ຢູ່ທີ່ສະໂມສອນ ຂອງຫ້ອງການສຶກສາທິການ ແລະ ກິລາ ເມືອງຊໍາໃຕ້, ແຂວງຫົວພັນ ໄດ້ຈັດກອງປະຊຸມການກໍານົດພະນັກງານນໍາພາ-ຄຸ້ມຄອງສະພາປະຊາຊົນ ຂັ້ນແຂວງ ຂື້ນຢ່າງເປັນທາງການ. ໂດຍພາຍໃຕ້ການເປັນປະທານຮ່ວມຂອງ ທ່ານ ຄຳຜິວ ວົງສະຫວັນ ຮອງເລຂາພັກແຂວງ ປະທານແນວລາວສ້າງຊາດແຂວງຫົວພັນ ແລະ ທ່ານ ຮິນທອງ ດວງຈັນສຸກ ກຳມະການພັກແຂວງ ເລຂາພັກເມືອງ, ເຈົ້າເມືອງຊໍາໃຕ້, ເປັນກຽດເຂົ້າຮ່ວມຂອງ ທ່ານ ພອນຈັນ ຂະທຸມພົມ ຮອງເລຂາ ຮອງເຈົ້າເມືອງ, ມີພະແນກທີ່ກ່ຽວຂ້ອງຂອງແຂວງ, ການນໍາຂອງເມືອງ, ເລຂາ,ຄະນະໜ່ວຍພັກອ້ອມຂ້າງ, ຕະຫຼອດຮອດ ຫົວໜ້າ ຮອງຫົວໜ້າຫ້ອງການ ແລະ ພະນັກງານອາວຸໂສບຳນານເຂົ້າຮ່ວມທັງໝົດ 85 ທ່ານ ຍິງ 17 ທ່ານ.
ໃນກອງປະຊຸມທີ່ມີຄວາມໝາຍຄວາມສຳຄັນນີ້ ທ່ານ ຄຳຜິວ ວົງສະຫວັນ ຮອງເລຂາພັກແຂວງ ປະທານແນວລາວສ້າງຊາດແຂວງ ໄດ້ມີຄໍາເຫັນຊີ້ນໍາຕໍ່ກອງປະຊຸມ ແລະ ຜ່ານມະຕິຂອງກົມການເມືອງສູນກາງພັກ ສະບັບເລກທີ 030/ກມສພ ລົງວັນທີ 03 ມັງກອນ 2018 ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ, ແຈ້ງການຂອງສະພາແຫ່ງຊາດ ສະບັບເລກທີ 0192/ຄລສ,ຈງ ລົງວັນທີ 21 ພຶດສະພາ 2018 ວ່າດ້ວຍການຂື້ນແຜນກໍານົດພະນັກງານນຳພາ-ຄຸ້ມຄອງ ຢູ່ສະພາປະຊາຊົນແຂວງ ແລະ ມາດຖານຂອງຜູ້ຈະສະມັກເລືອກຕັ້ງເປັນສະມາຊິກສະພາປະຊາຊົນແຂວງຫົວພັນ ຊຸດທີ 2. ຫຼັງຈາກນັ້ນ ທ່ານ ເພັດ ມະນີພອນ ຮັກສາການຫົວໜ້າພະແນກພາຍໃນແຂວງ ໄດ້ຂື້ນອະທິບາຍບັດທາບທາມການສ້າງແຜນພະນັກງານນໍາພາ-ຄຸ້ມຄອງຂັ້ນແຂວງ ປະຈໍາເຂດເລືອກຕັ້ງເມືອງຊຳໃຕ້. ນອກນີ້ຜູ້ເຂົ້າຮ່ວມຍັງໄດ້ສັກຖາມບັນຫາຂໍ້ຂ້ອງໃຈ ເພື່ອເປັນເອກະພາບ ບໍ່ໃຫ້ມີບັດຕາຍ ແລະ ສາມາດຄັດເລືອກເອົາຜູ້ທີ່ມີເງື່ອນໄຂເໝາະສົມ. ໄປພ້ອມພ້ອມດຽວກັນນີ້ ຜູ້ແທນຂອງກອງປະຊຸມ ຍັງໄດ້ລົງຄະແນນສຽງເພື່ອກຳນົດເປົ້າໝາຍຜູ້ທີ່ຈະເຂົ້າສະມັກເລືອກຕັ້ງເປັນສະມາຊິກສະພາປະຊາຊົນຂັ້ນແຂວງຊຸດທີ 2 ທີ່ຈະເລືອກຕັ້ງຂື້ນໃນຕໍ່ໜ້ານີ້ຕື່ມອີກ.
ສົມສຸກ ໄຊຍະວົງ ນັກຂ່າວ ເມືອງຊຳໃຕ້ ແຂວງຫົວພັນ
Editor: ກຳປານາດ ລັດຖະເຮົ້າ
