ກາງເດືອນກໍລະກົດ 2018 ນີ້, ຢູ່ທີ່ຫ້ອງປະຊຸມຫ້ອງວ່າການເມືອງປາກະດິງ ແຂວງບໍລິຄໍາໄຊ ໄດ້ຈັດພິທີ ມອບ-ຮັບ ໃບຢັ້ງຢືນກົດໜາຍໄລຍະສັ້ນ 45 ວັນ, ຂື້ນ ໂດຍພາຍໃຕ້ການເປັນປະທານຂອງ ທ່ານ ໂຄດສະຈານ ແສນທະວີໄຊ ຮອງເລຂາພັກເມືອງ, ຮອງເຈົ້າເມືອງປາກກະດິງ ແລະ ມີ ທ່ານ ສະພັງທອງ ພົມມະຈັກ ຄະນະພັກ, ຫົວໜ້າຂະແໝງຈັດຕັ້ງພະນັກງານພະແນກຍຸຕິທຳ ແຂວງບໍລິຄໍາໄຊ, ມີບັນດາຫົວໜ້າຫ້ອງການ, ກົມກອງອ້ອມຂ້າງເມືອງເຂົ້າຮ່ວມ.
ໃນພິທີ ທ່ານ ວືທາວ ເພຍຫຼວງ ຫົວໜ້າຫ້ອງການຍຸຕິທຳເມືອງ ປາກກະດິງ ໄດ້ຜ່ານເນື້ອໃນຜົນສຳເລັດທີ່ໄດ້ຈັດຕັ້ງປະຕິບັດຜ່ານມາ. ມີຜູ້ທີ່ໄດ້ຮັບໃບຢັ້ງຢືນຈຳນວນ 45 ທ່ານ, ຍິງ 4 ທ່ານ, ໃນນີ້ ມາຈາກ 14 ບ້ານ ຈຳນວນ 15 ທ່ານ, ຍິງ 1 ທ່ານ. ມາຈາກກົມກອງ ແລະ ຫ້ອງການອ້ອມຂ້າງເມືອງ 30 ທ່ານ, ຍິງ 3 ທ່ານ. ຈາກນັ້ນ, ທ່ານປະທານກອງປະຊຸມ ໄດ້ໃຫ້ກຽດມອບໃບຢັ້ງຢືນ ແລະ ໃບຍ້ອງຍໍ ໃຫ້ແກ່ຜູ້ທີ່ມີຜົນງານດີ ແລະ ໄດ້ປະກອບສ່ວນເຂົ້າໃນການຮຽນ-ການສອນ ພ້ອມທັງມີຄຳເຫັນໂອ້ລົມຕໍ່ພິທີດັ່ງກ່າວ.
Editor: ກຳປານາດ ລັດຖະເຮົ້າ
