ທິດຜ່ານມາ ເມືອງວັງວຽງ ໄດ້ຈັດກອງປະຊຸມວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ວຽກງານ 3 ສ້າງເມືອງວັງວຽງ ຢູ່ທີ່ສະໂມສອນຂອງເມືອງວັງວຽງ ແຂວງວຽງຈັນ. ໂດຍພາຍໃຕ້ການເປັນປະທານຂອງ ສະຫາຍ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ ເຂົ້າຮ່ວມ ມີບັນດາທ່ານຄະນະປະຈໍາ, ກຳມະການພັກເມືອງ, ບັນດາການນຳຂອງເມືອງ, ຫົວຫນ້າຫ້ອງການ, ອົງການ, ກົມກອງ ແລະ ພະນັກງານຮາກຖານ ເຂົ້າຮ່ວມ.
ກອງປະຊຸມໄດ້ພ້ອມກັນຮັບຟັງການເຜີຍແຜ່, ເຊື່ອມຊຶມເອກະສານ, ມະຕິຕົກລົງຂອງທ່ານເຈົ້າເມືອງ ເລກທີ 306/ຈມ.ວວ ລົງວັນທີ 09/07/2018 ວ່າດ້ວຍການແຕ່ງຕັ້ງຄະນະກຳມະການໃສ່ແຕ່ລະກຸ່ມວຽກໃນການຈັດຕັ້ງປະຕິບັດ ວຽກງານກໍ່ສ້າງຮາກຖານການເມືອງ ແລະ ວຽກງານ 3 ສ້າງຢູ່ເມືອງວັງວຽງ, ຄຳແນະນຳເລກທີ 004/ຈມ.ວວ ລົງວັນທີ 08/03/2018 ກ່ຽວກັບການຈັດຕັ້ງປະຕິບັດວຽກງານ 3 ສ້າງຢູ່ເມືອງວັງວຽງ, ເນື້ອໃນວິທີການເກັບກໍາຂໍ້ມູນການເຮັດວຽກງານ 3 ສ້າງ ແລະ ບ້ານເປົ້າໝາຍ ສະບັບເລກທີ 008/ຈມ.ວວ ລົງວັນທີ 08/03/2018 ແລະ ຍັງໄດ້ຜ່ານມະຕິຕົກລົງຂອງຄະນະປະຈຳພັກເມືອງ ວ່າດ້ວຍ: ການແຕ່ງຕັ້ງພະນັກງານຮາກຖານແລະບ້ານ 3 ສ້າງ.
ຈຸດປະສົງ ຂອງການຈັດກອງປະຊຸມຂຶ້ນໃນຄັ້ງນີ້ກໍ່ເພື່ອເປັນການເຮັດໃຫ້ວຽກງານຢູ່ຮາກຖານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນມີບາດກ້າວຂະຫຍາຍຕົວໃໝ່ ເພື່ອຍົກລະດັບຄຸນນະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.
ຕອນທ້າຍພິທີ ສະຫາຍ ຄໍາຜອງ ດວງວິໄລ ກໍາມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ ກໍ່ຍັງມີຄຳເຫັນໂອ້ລົມຕື່ມອີກ
ແຫລ່ງຂ່າວ ຈາກທີມຂ່າວ ເມືອງວັງວຽງ
Editor: ກຳປານາດ ລັດຖະເຮົ້າ
