ໃນທ້າຍອາທິດຜ່ານມານີ້ ລັດວິສາຫະກິດໄຟຟ້າລາວ ສາຂາແຂວງຄຳມ່ວນ ໄດ້ຈັດກອງປະຊຸມໃຫຍ່ ຄັ້ງທີ V ຂອງຮາກຖານຊາວໜຸ່ມຂຶ້ນຢ່າງເປັນທາງການ ໂດຍການເຂົ້າຮ່ວມຂອງ ທ່ານ ນາງ ວົງພະຈັນ ສີບຸນເຮືອງ ເລຂາຄະນະບໍລິຫານງານຊາວໜຸ່ມແຂວງຄຳມ່ວນ, ທ່ານ ປອ ເພັດສະໜອນ ພອນວິໄລສັກ ຫົວໜ້າລັດວິສາຫະກິດໄຟຟ້າລາວ ສາຂາແຂວງຄຳມ່ວນ, ມີບັນດາທ່ານຄະນະຮາກຖານຊາວໜຸ່ມ ມາຈາກພະແນກການອ້ອມຂ້າງແຂວງ; ສະມາຊິກຊາວໜຸ່ມເຂົ້າຮ່ວມທັງໝົດ 77 ສະຫາຍ; ຍິງ 37 ສະຫາຍ.
ທ່ານ ອານຸສອນ ຈຸນລະບຸດດີ ຮອງເລຂາຮາກຖານຊາວໜຸ່ມລັດວິສາຫະກິດໄຟຟ້າລາວ ສາຂາແຂວງຄຳມ່ວນ ໄດ້ຜ່ານບົດລາຍງານການເມືອງທັງພາກ I ແລະ ພາກ II ເຊິ່ງໃນບົດລາຍງານຍັງໄດ້ຍົກໃຫ້ເຫັນເຖິງຜົນງານທີ່ພົ້ນເດັ່ນໃນການເຄື່ອນໄຫວວຽກງານຊາວໜຸ່ມຕະຫຼອດໄລຍະ 5 ປີ 2013-2017 ທີ່ຜ່ານມາ ເຊິ່ງຄະນະຮາກຖານຊາວໜຸ່ມໄດ້ຖືເອົາວຽກງານການສຶກສາອົບຮົມການເມືອງ-ແນວຄິດເປັນຫຼັກ ດ້ວຍການນຳເອົາເອກະສານທີ່ສຳຄັນ ຂອງຊາດ ຂອງພັກ ແລະ ຂອງຊາວໜຸ່ມ ຈັດຕັ້ງເຜີຍແຜ່ເຊື່ອມຊຶມໃຫ້ບັນດາສະຫາຍສະມາຊິກຊາວໜຸ່ມຢ່າງເປັນປົກກະຕິ, ຕິດພັນກັບການປະຕິບັດໜ້າທີ່ວຽກງານວິຊາສະເພາະຢ່າງເປັນລະບົບ ແລະ ຕໍ່ເນື່ອງຄຽງຄູ່ກັບການປະຕິບັດເນື້ອໃນຂໍ້ແຂ່ງຂັນ 4 ບຸກ ຂອງຊາວໜຸ່ມລາວ ເຊິ່ງມັນສະແດງອອກໃຫ້ເຫັນຢູ່ບ່ອນວ່າ ຮາກຖານຊາວໜຸ່ມລັດວິສາຫະກິດໄຟຟ້າລາວ ສາຂາແຂວງຄຳມ່ວນ ສາມາດກາຍເປັນຮາກຖານຊາວໜຸ່ມ 4 ບຸກ, ພ້ອມນັ້ນ ບັນດາສະຫາຍສະມາຊິກຊາວໜຸ່ມພາຍໃນຮາກຖານ ຍັງໄດ້ເຫັນດີຮັບຮອງເອົາທິດທາງແຜນການທີ່ຈະຈັດຕັ້ງປະຕິບັດໃນອີກ 5 ປີຕໍ່ໜ້າ.
ຈາກນັ້ນ ຄະນະຮາກຖານຊາວໜຸ່ມຊຸດເກົ່າ ກໍ່ໄດ້ຜ່ານບົດສຳຫຼວດການນຳພາລວມໃນໄລຍະ 5 ປີຜ່ານມາ ພ້ອມທັງກ່າວລາໜ້າທີ່ ແລະ ໃນພິທີຍັງໄດ້ມີການມອບໃບຍ້ອງຍໍຂອງຄະນະບໍລິຫານງານຊາວໜຸ່ມແຂວງ ໃຫ້ຜູ້ທີ່ມີຜົນງານດີເດັ່ນໃນໄລຍະຜ່ານມາ ຈຳນວນ 8 ສະຫາຍ ເຊິ່ງມອບໂດຍ ທ່ານ ນາງ ວົງພະຈັນ ສີບຸນເຮືອງ. ບັນດາສະຫາຍສະມາຊິກຊາວໜຸ່ມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະຮາກຖານຊາວໜຸ່ມຊຸດໃໝ່ ເຊິ່ງມີຜູ້ສະໝັກທັງໝົດ 9 ສະຫາຍ ໃນນັ້ນເລືອກເອົາ 7 ສະຫາຍ, ຜົນຂອງການປ່ອນບັດຄັດເລືອກ ແລະ ເລືອກໄດ້ຄື: ສະຫາຍ ອານຸສອນ ຈຸນລະບຸດດີ ເປັນເລຂາຮາກຖານຊາວໜຸ່ມລັດວິສາຫະກິດໄຟຟ້າ ສາຂາແຂວງຄຳມ່ວນ, ສະຫາຍ ອັກຄະລະ ໄຊປັນຍາ ເປັນຮອງເລຂາຮາກຖານຊາວໜຸ່ມ ທັງເປັນປະທານກວດກາ. ສະຫາຍ ນາງ ທິບພາພອນ ວົງໄຊ ເປັນຮອງເລຂາຮາກຖານ, ສະຫາຍ ພິທັກສິນ ໄຊຍະສານ ເປັນຄະນະຮາກຖານ, ສະຫາຍ ເມກດາລາ ຄຳປະດິດ ເປັນຄະນະຮາກຖານ, ສະຫາຍ ນາງ ອະທິດາ ຄຳສຸກຖາວົງ, ເປັນຄະນະຮາກຖານ, ສະຫາຍ ຄໍາຮຸ່ງ ພົມມະໄຊ ເປັນຄະນະຮາກຖານ.
ໃນຕອນທ້າຍພິທີທ່ານ ນາງ ວົງພະຈັນ ສີບຸນເຮືອງ ເຊິ່ງທ່ານກໍ່ໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ພ້ອມກັນນັ້ນ ທ່ານກໍ່ຍັງໄດ້ເໜັ້ນໜັກໃຫ້ຄະນະຊາວໜຸ່ມຊຸດໃໝ່ ຈົ່ງເອົາໃຈໃສ່ວຽກງານສຶກສາອົບຮົມການເມືອງ-ແນວຄິດເປັນຫຼັກໃຫ້ແກ່ບັນດາສະຫາຍສະມາຊິກຊາວໜຸ່ມ, ສືບຕໍ່ປັບປຸງຂະຫຍາຍການຈັດຕັ້ງໃຫ້ເປັນປົກກະຕິ ພ້ອມທັງ ປັບປຸງແຜນວິທີເຮັດວຽກໃຫ້ມັນສອດຄ່ອງກັບການປະຕິບັດໜ້າທີ່ວຽກງານວິຊາສະເພາະໄປຄຽງຄູ່ກັບການປະຕິບັດເນື້ອໃນຂໍ້ແຂ່ງຂັນ 4 ບຸກຂອງຊາວໜຸ່ມໃຫ້ປະກົດຜົນເປັນຈິງເທື່ອລະກ້າວ.
Editor: ນັກຂ່າວຊາວໜຸ່ມແຂວງຄຳມ່ວນ
