ໃນທ້າຍເດືອນມິຖຸນາ 2018 ນີ້. ກອງບັນຊາການ ປກສ ແຂວງບໍ່ແກ້ວ ໄດ້ເປີດກອງປະຊຸມສະຫຼຸບວຽກງານໃນການຈັດຕັ້ງວຽກງານພັກ-ວຽກງານການເມືອງ ຄັ້ງທີ I ໃນໄລຍະ 5 ປີທີ່ຜ່ານມາ ( 2011-2015 ) ແລະທິດທາງແຜນການ 5 ປີໃນຕໍ່ໜ້າ ( 2016-2020 ). ຢູ່ທີ່ຫ້ອງປະຊຸມກອງບັນຊາການ ປກສ ແຂວງບໍ່ແກ້ວ, ໂດຍການເປັນປະທານຂອງສະຫາຍ ພັນເອກ ປອ ຖາວອນ ອິນທະວົງ ເລຂາຄະນະພັກ ຫົວໜ້າກອງບັນຊາການ ປກສ ແຂວງບໍ່ແກ້ວ, ໃຫ້ກຽດເຂົ້າຮ່ວມຂອງ ທ່ານ ແສງເພັດ ແກ້ວສິງທອງ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ, ມີບັນດາຫົວໜ້າກອງ ປກສ ເມືອງ 5 ເມືອງ 1 ເຂດ ແລະ ບັນດາຫົວໜ້າຫ້ອງ, ຮອງຫ້ອງ, ຫົວໜ້າພະແນກ, ຮອງພະແນກ ພ້ອມດ້ວຍແຂກຖືກເຊີນ ເຂົ້າຮ່ວມ.
ໃນກອງປະຊຸມສະຫາຍ ພັນຕີ ວຽງໄຊ ພົງສຸວັນ ຮອງຫ້ອງການເມືອງ ກໍ່ໄດ້ຂື້ນຜ່ານມະຕິຕົກລົງຂອງຄະນະປະຈໍາພັກກອງບັນຊາການ ປກສ ແຂວງ ວ່າດ້ວຍການອານຸມັດເປີດກອງປະຊຸມວຽກງານພັກ-ວຽກງານການເມືອງທົ່ວອົງຄະນະພັກກອງບັນຊາການ ປກສ ແຂວງ ຄັ້ງທີ I ປີ 2018 ສະບັບເລກທີ 229/ປກສ.ບກ ລົງວັນທີ 22 ມິຖຸນາ 2018. ຈາກນັ້ນ, ສະຫາຍ ພັນໂທ ວຽງແກ້ວ ພົມມະໃຈ ເລຂາໜ່ວຍພັກຮາກຖານ ຫົວໜ້າຫ້ອງການເມືອງ ປກສ ແຂວງ ກໍ່ໄດ້ຂື້ນຜ່ານບົດສະຫຼຸບການຈັດຕັ້ງວຽກງານພັກ-ວຽກງານການເມືອງ ຄັ້ງທີ I ໃນໄລຍະ 5 ປີທີ່ຜ່ານມາ ( 2011-2015 ) ແລະ ທິດທາງແຜນການ 5 ປີໃນຕໍ່ໜ້າ ( 2016-2020 ). ຜ່ານມາໄດ້ເອົາໃຈໃສ່ປັບປຸງກົງຈັກການຈັດຕັ້ງ ຢູ່ຂັ້ນອົງຄະນະພັກລົງຮອດຮາກຖານພັກ-ໜ່ວຍພັກໃຫ້ສອດຄ່ອງກັບພາລະບົດບາດ, ສິດໜ້າທີ່ຂອງຄະນະພັກແຕ່ລະຂັ້ນໃຫ້ຖືກຕ້ອງ, ເປີດຮຽນສະນັບສະໜູນພັກ ແລະ ລະບຽບພັກ 7 ຄັ້ງ ມີມະຫາຊົນເຂົ້າຮ່ວມທັງໝົດ 470 ສະຫາຍ, ຍິງ 85 ສະຫາຍ, ຂະຫຍາຍມະຫາຊົນຜູ້ກ້າວໜ້າເຂົ້າພັກສຳຮອງ 129 ສະຫາຍ, ເລື່ອນສະມາຊິກພັກສໍາຮອງຂື້ນສົມບູນ 107 ສະຫາຍ, ຍິງ 31 ສະຫາຍ, ໄດ້ຮັບຮອງແຜນການສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ 6 ໜ່ວຍ, ວຽງານການເມືອງ-ນໍາພາແນວຄິດໄດ້ເອົາໃຈໃສ່ສຶກສາອົບຮົມພະນັກງານ-ນັກຮົບພາຍໃນກົມກອງເປັນປົກກະຕິ, ເອົາໃຈໃສ່ເຜີຍແຜ່ໂຄສະນາວຽກງານການເມືອງຜ່ານທາງພາຫະນະມວນຊົນ ເຊັ່ນ: ອອກລາຍການວິທະຍຸກະຈາຍສຽງ 192 ຄັ້ງ, ສົ່ງຂ່າວທາງໂທລະພາບ 465 ຄັ້ງ, ເລື່ອນຊັ້ນໃຫ້ພະນັກງານ-ນັກຮົບໄດ້ 1.750 ສະຫາຍ, ຍິງ 172 ສະຫາຍ, ຍົກລະດັບພະນັກງານໄປຮຽນທັງພາຍໃນ ແລະຕ່າງປະເທດ ຈໍານວນ 288 ສະຫາຍ, ຍິງ 58 ສະຫາຍ, ໄດ້ຮັບການຍ້ອງຍໍຫຼຽນໄຊ-ຫຼຽນກາ, ຫຼຽນອິດສະຫຼະບຸກຄົນ ແລະ ກົມກອງ 744 ໜ່ວຍ, ຍ້ອງຍໍຂັ້ນຕ່າງໆ 1.966 ໃບ. ໄດ້ປັບປຸງກົງຈັກການຈັດຕັ້ງພັກຢູ່ຂັ້ນອົງຄະນະພັກກອງບັນຊາການ. ໃນນີ້, ໄດ້ແຕ່ງຕັ້ງພະນັກງານນໍາພາ-ບັນຊາຫົວໜ້າກອງບັນຊາການ 2 ສະຫາຍ, ຮອງຫົວໜ້າກອງບັນຊາການ 2 ສະຫາຍ, ຫົວໜ້າຫ້ອງ 2 ສະຫາຍ, ຮອງຫ້ອງ 10 ສະຫາຍ, ຮອງກອງບັນຊາການ ປກສ ເມືອງ 9 ສະຫາຍ, ຫົວໜ້າພະແນກ 95 ສະຫາຍ, ຍິງ 5 ສະຫາຍ, ຮອງພະແນກ 134 ສະຫາຍ, ຍິງ 16 ສະຫາຍ, ຫົວໜ້າໜ່ວຍງານ 345 ສະຫາຍ, ຍິງ 87 ສະຫາຍ.
ໃນກອງປະຊຸມກໍ່ໄດ້ມີການປະກອບຄໍາຄິດເຫັນຂອງບັນດາຫ້ອງອ້ອມຂ້າງກອງບັນຊາການ ປກສ ແຂວງ ແລະ ຕາງໜ້າ ປກສ ເມືອງ 5 ເມືອງ 1 ເຂດ ເພື່ອເຕີ່ມໃສ່ຮ່າງບົດສະຫຼຸບໃຫ້ຄົບຖ້ວນສົມບູນຍິ່ງຂື້ນ. ທິດທາງແຜນການໃນຕໍ່ໜ້າແມ່ນຈະສືບຕໍ່ເສີມຂະຫຍາຍທາດແທ້ມູນເຊື້ອຂອງກໍາລັງປ້ອງກັນຄວາມສະຫງົບ ປຸກລະດົມທົ່ວປວງຊົນເຂົ້າຮ່ວມແນວທາງ ປກຊ-ປກສ ຢ່າງຕັ້ງໜ້າ, ສ້າງພັກໃຫ້ມີຄວາມປອດໃສໜັກແໜ້ນເຂັ້ມແຂງທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ ແລະ ແບບແຜນວິທີນໍາພາ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ່ X ຂອງພັກ, ຄັ້ງທີ IV ຂອງອົງຄະນະພັກກະຊວງ, ຄັ້ງທີ V ຂອງອົງຄະນະພັກແຂວງ ແລະຄັ້ງທີ II ຂອງອົງຄະນະພັກກອງບັນຊາການ ປກສ ແຂວງໃຫ້ປະກົດຜົນເປັນຈິງ.
Editor: ປກສແຂວງບໍ່ແກ້ວ
