ຕອນບ່າຍ ວັນທີ 5 ກໍລະກົດ 2018 ນີ້ ຢູ່ທີ່ກອງບັນຊາການ ປກສ ແຂວງ ບໍລິຄໍາໄຊ ໄດ້ຈັດພິທີ ຈັດຕັ້ງເຊື່ອມຊຶມ ມະຕິຂອງຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ວ່າດ້ວຍການຍົກສູງປະສິດທິພາບຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍຂື້ນ, ໂດຍການເປັນປະທານຂອງ ທ່ານ ພັນເອກ ທອງໃບ ລໍວັນໄຊ ເລຂາຄະນະພັກ, ຫົວໜ້າກອງບັນຊາການ ປກສ ແຂວງ, ມີ ທ່ານ ພັນໂທ ທອງໄຫຼ ໄຊຍະລາດ ຄະນະພັກ, ຮອງຫົວໜ້າກອງບັນຊາການ ປກສ ແຂວງ, ມີບັນດາຫ້ອງ, ກອງ, ເມືອງ, ຄ້າຍຄຸມຂັງ-ດັດສ້າງ, ໂຮງຮຽນ ປກສ ຊັ້ນຕົ້ນເລກ 4, ພະນັກງານສະມາຊິກພັກ-ພະນັກງານນັກຮົບເຂົ້າຮ່ວມຮັບຟັງ.
ທ່ານ ພັນໂທ ທອງໄຫຼ ໄຊຍະລາດ ໄດ້ກ່າວວ່າ: ການຍົກສູງປະສິດທິພາບການຄຸ້ມຄອງລັດ-ຄຸ້ມຄອງສັງຄົມ ຜົນໃນການບໍລິຫານຂອງລັດ, ຮັບປະກັນເສີມຂະຫຍາຍ ແລະ ປະຕິບັດສິດເປັນເຈົ້າ ຂອງປະຊາຊົນບັນດາເຜົ່າ, ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ເປັນພື້ນຖານຂອງການສ້າງລັດທີ່ປົກຄອງດ້ວຍກົດໝາຍ ເຊິ່ງແມ່ນຂະບວນການວິວັດໜຶ່ງຂອງການບູລະນະ ປະຊາທິປະໄຕ ປະຊາຊົນ ທີ່ຕ້ອງດໍາເນີນເປັນແຕ່ລະບາດກ້າວຢ່າງຮອບຄອບ ແລະ ໜັກແໜ້ນ ສູ້ຈຸດໝາຍສັງຄົມນິຍົມ, ນັບແຕ່ໄດ້ດໍາເນີນແນວທາງປ່ຽນແປງໃຫມ່ຢ່າງຮອບດ້ານ ແລະ ມີຫຼັກການ, ພັກໄດ້ນໍາພາສ້າງ, ນໍາໃຊ້ ແລະ ປັບປຸງລັດຖະທໍາມະນູນ, ກົດໝາຍ, ນິຕິກໍາພາຍໃຕ້ກົດໝາຍ ໃຫ້ເປັນເຄື່ອງມືຄຸ້ມຄອງລັດ-ຄຸ້ມຄອງສັງຄົມ, ປົກປ້ອງສິດຜົນປະໂຫຍດອັນຊອບທໍາຂອງປະຊາຊົນບັນດາເຜົ່າ, ຂອງລັດ ແລະ ລວມຫມູ່, ຮັບປະກັນການປົກປັກຮັກສາລະບອບປະຊາທິປະໄຕ ປະຊາຊົນໄດ້ຢ່າງໝັ້ນຄົງ, ທັດສະນະແນວທາງ ທີ່ຈະຕ້ອງສຸມໃສ່ນໍາພາ ຕ້ອງຮັບປະກັນພັກນໍາພາ ແລະ ກໍາອໍານາດດ້ວຍກົດໝາຍຢ່າງພາວະວິໄສ, ຮັບປະກັນຄວາມໝັ້ນຄົງໃຫ້ແກ່ລັດປະຊາທິປະໄຕປະຊາຊົນທີ່ປົກຄອງດ້ວຍກົດໝາຍ, ເພີ່ມນິຕິທໍາໃນການປົກຄອງ ແລະ ຮັບປະກັນຄວາມຍຸດຕິທໍາຢູ່ໃນສັງຄົມ ພ້ອມທັງສິດເປັນເຈົ້າ ຂອງປະຊາຊົນຕາມກົດໝາຍ, ການຄຸ້ມຄອງລວມສູນເປັນເອກະພາບຂອງບັນດາອົງການອໍານາດລັດ, ເອົາໃຈໃສ່ສ້າງ ແລະ ປັບປຸງກົດໝາຍຕ້ອງໃຫ້ສອດຄ້ອງກັບແນວທາງປ່ຽນແປງໃຫມ່ຮອບດ້ານທີ່ມີຫຼັກການຂອງພັກ, ຍົກສູງປະສິດທິພາບການປະຕິບັດກົດໝາຍຂອງບັນດາອົງການອໍານາດລັດ, ປະສິດທິພາບການຕ້ານ, ສະກັດກັ້ນພະຍາດອາຍາດສິດ, ການສໍ້ລາດບັງຫຼວງ, ເສີມຂະຫຍາຍສິດເປັນເຈົ້າ ຂອງປະຊາຊົນໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ແລະ ຫັນການຄຸ້ມຄອງໃຫ້ມີລັກສະນະວິທະຍາສາດ ແລະ ທັນສະໄຫມເທື່ອລະກ້າວ, ເພີມທະວີການພົວພັນຮ່ວມມືສາກົນກັບບັນດາປະເທດຕ່າງໆໃນພາກພື້ນ ແລະ ໃນໂລກ ໂດຍສະເພາະເພື່ອນມິດຍຸດທະສາດ ເພື່ອຊອກຮູ້ປະສົບການບົດຮຽນໃນການຍົກສູງປະສິດທິພາບການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ຕັ້ງໜ້າເຂົ້າຮ່ວມປະຕິບັດສິດ ແລະ ພັນທະຂອງຕົນຕາມສົນທິສັນຍາສາກົນ ທີ ສປປ ລາວ ເປັນພາຄີ. ໃນພິທີຍັງໄດ້ມີການປະກາດວິໄນຕໍ່ພະນັກງານ-ນັກຮົບຜູ້ທີ່ເຮັດຜິດຕໍ່ກົດລະບຽບຂອງກໍາລັງປ້ອງກັນຄວາມສະຫງົບ ຈໍານວນ 5 ສະຫາຍ, ໃນນີ້ຖືກວິໄນໄລ່ອອກຈາກກໍາລັງປ້ອງກັນຄວາມສະຫງົບ 1 ສະຫາຍ, ຕອນທ້າຍຍັງໄດ້ຮັບຟັງຄໍາເຫັນໂອ້ລົມຈາກປະທານຕື່ມອີກ.

Editor: ປກສ ບໍລິຄຳໄຊ