ສູນກາງແນວລາວສ້າງຊາດ ຈະຈັດກອງປະຊຸມ ພົບປະຜູ້ຊົງຄຸນວຸດທິ ບັນດາຊົນເຜົ່າທົ່ວປະເທດ ຄັ້ງທີ 3 ປະຈໍາປີ 2018 ໃນລະຫວ່າງ ວັນທີ 10-14 ສິງຫາ ທີ່ຈະມາເຖິງນີ້ ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ພາຍໃຕ້ຫົວຂໍ້ “ເສີມຂະຫຍາຍ ບົດບາດຂອງຜູ້ຊົງຄຸນວຸດທິ ບັນດາຊົນເຜົ່າທົ່ວປະເທດ ໃນການເຕົ້າໂຮມຄວາມສາມັກຄີປອງດອງປະຊາຊົນບັນເຜົ່າ ເຂົ້າຮ່ວມພາລະກິດປົກປັກຮັກສາ ແລະ ພັດທະນາປະເທດຊາດ’’ ເຊິ່ງພິທີເປີດກອງປະຊຸມຢ່າງເປັນທາງການ ຈະໄດ້ຈັດຂຶ້ນໃນວັນທີ 13 ສິງຫາ ກົງກັບວັນສ້າງຕັ້ງສູນກາງແນວລາວສ້າງຊາດ ແລະ ວັນສ້າງຕັ້ງສື່ມວນຊົນ ຄົບຮອບ 68 ປີ (13/8/1950-13/8/2018).
ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ ໄດ້ຖະແຫລງຂ່າວຕໍ່ສື່ມວນຊົນ ໃນວັນທີ 6 ກໍລະກົດ ທີ່ຜ່ານມາ ທີ່ສູນຝຶກອົບຮົມແນວລາວສ້າງຊາດ ວ່າ: ກອງປະຊຸມໃນຄັ້ງນີ້ ຈະໄດ້ພ້ອມກັນປຶກສາຫາລື ໃນຫລາຍບັນຫາທີ່ພົ້ນເດັ່ນ ໂດຍສະເພາະ ຈະໄດ້ຕີລາຄາການຈັດຕັ້ງປະຕິບັດມະຕິກອງປະຊຸມພົບປະຜູ້ຊົງຄຸນວຸດທິບັນດາເຜົ່າທົ່ວປະເທດ ຄັ້ງທີ 2 ປີ 2015 (2015-2018) ແລະ ທິດທາງ, ໜ້າວຽກຈຸດສຸມ ໃນແຕ່ປີ 2018-2020; ບົດປະກອບຄຳເຫັນຂອງສະພາແຫ່ງຊາດ, ບົດປະກອບຄຳເຫັນຂອງລັດຖະບານ, ສຽງແຄນເຊື້ອຊາດລາວ ມໍລະດົກໂລກ, ບົດບາດຂອງນັກທຸລະກິດ ຕໍ່ການແກ້ໄຂຄວາມທຸກຍາກຂອງປະຊາຊົນ ທີ່ບ້ານຄຳປາແໜ, ເມືອງຈຳພອນ ແຂວງສະຫວັນນະເຂດ ບົດບາດຂອງຜູ້ຊົງຄຸນວຸດທິ ຕໍ່ການຈັດສັນຍົກຍ້າຍພູມລຳເນົາ ແລະ ອາຊີບຂອງບັນດາເຜົ່າ ຕິດພັນກັບການແກ້ໄຂຄວາມທຸກຍາກ; ບົດບາດສາສະໜາຕ່າງໆ ໃນການເຜີຍແຜ່ສິນລະທຳຄຳສອນ ແລະ ການປະກອບສ່ວນຊ່ວຍເຫລືອສັງຄົມ, ການສ້າງບ້ານສາມັກຄີ ຕິດພັນກັບການສ້າງບ້ານພັດທະນາ ແລະ ການແກ້ໄຂຄວາມທຸກຍາກ, ຄູ່ກັບການພັດທະນາການສຶກສາ, ການຢອດຢາ ແລະ ສັກຢາກັນພະຍາດ, ໂພຊະນາການ, ການປ້ອງກັນພະຍາດ ແລະ ການປິ່ນປົວພະຍາດລະບາດ ຍັງເປັນສິ່ງທ້າທ້າຍໃນປັດຈຸບັນ, ຄົນເຊື້ອຊາດລາວ ທີ່ຢູ່ຕ່າງປະເທດຕໍ່ກັບການພັດທະນາປະເທດຊາດ, ການອະນຸລັກ ແລະ ສົ່ງເສີມວັດທະນະທຳຂອງຊາດລາວ ເປັນຕົ້ນ.
Editor: ດາວໄຊ ສີວິໄລ
