ໃນອາທິດທີ່ຜ່ານມານີ້ ຄະນະບໍລິຫານງານຊາວໜຸ່ມແຂວງຄໍາມ່ວນ ໄດ້ຈັດກອງປະຊຸມເຜີຍແຜ່ນິຕິກຳຕ່າງໆ ກ່ຽວກັບວຽກງານຊາວໜຸ່ມ-ເຍົາວະຊົນຂຶ້ນ ຢູ່ທີ່ສະໂມສອນຫ້ອງວ່າການປົກຄອງເມືອງທ່າແຂກ ໂດຍການເຂົ້າຮ່ວມຂອງທ່ານ ນາງ ວົງພະຈັນ ສີບຸນເຮືອງ ເລຂາຄະນະບໍລິຫານງານຊາວໜຸ່ມແຂວງຄຳມ່ວນ; ທ່ານ ບຸນເກີດ ດາລາສຸກ ປະທານກວດກາ ຜູ້ຊີ້ນໍາວຽກງານອົງການຈັດຕັ້ງມະຫາຊົນຂັ້ນເມືອງ; ມີບັນດາຄະນະບໍລິຫານງານຊາວໜຸ່ມເມືອງ, ຄະນະໜ່ວຍຊາວໜຸ່ມອ້ອມຂ້າງເມືອງເຂົ້າຮ່ວມ.
ສຳລັບ ການເຜີຍແຜ່ນິຕິກໍາໃນຄັ້ງນີ້ ທ່ານ ນາງ ວົງພະຈັນ ສີບຸນເຮືອງ ເລຂາຄະນະບໍລິຫານງານຊາວໜຸ່ມແຂວງ ກໍ່ໄດ້ນຳເອົາບັນດາເອກະສານທີ່ສຳຄັນມາເຜີຍແຜ່ ເປັນຕົ້ນແມ່ນ: ກົດໝາຍວ່າດ້ວຍ ຄະນະຊາວໜຸ່ມ ປະຊາຊົນ ປະຕິວັດລາວ. ເອກະສານບົດແນະນຳ ຂອງຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ສະບັບເລກທີ 630/ລຂ, ລົງວັນທີ 26 ຕຸລາ 2017 ກ່ຽວກັບການດຳເນີນກອງປະຊຸມໃຫຍ່ຊາວໜຸ່ມແຕ່ລະຂັ້ນ. ເອກະສານບົດແນະນຳ ສະບັບເລກທີ 421/ລຂ, ລົງວັນທີ 28 ກໍລະກົດ 2016 ວ່າດ້ວຍການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມລາວ. ເອກະສານ ຂໍ້ກຳນົດ ສະບັບເລກທີ 449/ລຂ, ລົງວັນທີ 7 ສິງຫາ 2012 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ຄະນະຊາວໜຸ່ມ ປະຊາຊົນ ປະຕິວັດລາວ ຂັ້ນເມືອງ-ເທດສະບານ. ເອກະສານ ຂໍ້ກຳນົດ ສະບັບເລກທີ 450/ລຂ, ລົງວັນທີ 7 ສິງຫາ 2012 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ຄະນະຊາວໜຸ່ມ ປະຊາຊົນ ປະຕິວັດລາວ ຂັ້ນບ້ານ.
ທັງນີ້, ເພື່ອເປັນການກະກຽມໃຫ້ແກ່ການດໍາເນີນກອງປະຊຸມໃຫຍ່ຜູ້ແທນຊາວໜຸ່ມທົ່ວເມືອງທ່າແຂກ ຄັ້ງທີ VIII ແລະ ຂັ້ນຮາກຖານ, ໜ່ວຍຊາວໜຸ່ມໃນທົ່ວເມືອງທ່າແຂກ, ໂດຍປະຕິບັດຢ່າງຖືກຕ້ອງຕາມກົດໝາຍ ແລະ ກົດລະບຽບຂອງຄະນະຊາວໜຸ່ມ ປະຊາຊົນ ປະຕິວັດລາວ, ເພື່ອໃຫ້ທ່ວງທັນກັບເວລາ ແລະ ຕິດພັນກັບການປັບປຸງການຈັດຕັ້ງຄະນະບໍລິຫານງານຊາວໜຸ່ມແຕ່ລະຂັ້ນໃຫ້ມີຄວາມໜັກແໜ້ນ, ເຂັ້ມແຂງຮັບປະກັນໃນການນຳພາກຳລັງແຮງຂອງຊາວໜຸ່ມເຂົ້າຮ່ວມໃນຂະບວນການ, ການຈັດຕັ້ງປະຕິບັດແນວທາງນະໂຍບາຍຂອງພັກຢ່າງຕໍ່ເນື່ອງ ເພື່ອສ້າງເງື່ອນໄຂໃຫ້ແກ່ການດຳເນີນກອງປະຊຸມໃຫຍ່ຂອງອົງຄະນະພັກຂັ້ນຕ່າງໆ ກໍ່ຄືການກະກຽມໃຫ້ແກ່ກອງປະຊຸມໃຫຍ່ຜູ້ແທນຊາວໜຸ່ມທົ່ວແຂວງຄຳມ່ວນ ຄັ້ງທີ VIII.
Editor: ນັກຂ່າວເມືອງຊາວໜຸ່ມແຂວງ
