ຕອນເຊົ້າ ຂອງວັນທີ 4 ກໍລະກົດ 2018 ຜ່ານມານີ້ ຢູ່ທີ່ ວັດບ້ານນາມອຍ ທີ່ຂື້ນກັບກຸ່ມບ້ານ ແສນຈະເລີນ ເມືອງຊະນະຄາມ ແຂວງວຽງຈັນ ໄດ້ຈັດພິທີ່ປ່ອຍປາ ລົງແມ່ນໍ້າມີ້ ແລະ ປູກຕົ້ນໄມ້ ພ້ອມທັງບວດວັງສະຫງວນຂອງປາ ໂດຍການເປັນກຽດເຂົ້າຮ່ວມຂອງທ່ານ ສະໝານ ວິເສດຍັງພົງ, ເລຂາພັກເມືອງ ເຈົ້າເມືອງ ເມືອງຊະນະຄາມ, ມີ ພຣະອາຈານ ຫຸມພັນ ສຸຂະທັມໂມ ປະທານ ອພສ ເມືອຊະນະຄາມ, ມີຄະນະປະຈຳພັກເມືອງ,ກຳມະການພັກເມືອງ, ຫົວໜ້າຫ້ອງການ ພະນັກງານ, ທະຫານ, ຕໍ່າຫຼວດ ອໍານາດການປົກຄອງບ້ານ ພຣະສົງສໍາມະເນນ ແລະ ປະຊາຊົນບ້ານນາມອຍ ກໍ່ເປັນກຽດເຂົ້າຮ່ວມຢ່າງພ້ອມພຽງ.
ໃນພິທິດັ່ງກ່າວ ໄດ້ຈັດພິທີກໍາທາງດ້ານສາສະໜາ ເພື່ອບວດເປັນວັງສະຫງວນຂອງປາ ພາຍຫຼັງສໍາເລັດແລ້ວ ກໍ່ໄດ້ຈັດໃຫ້ມີກິດຈະກຳປ່ອຍປາ ຈຳນວນ 10¬¬9 ຖົງ ມີປາ ທັງໜົດ 10.900 ໂຕ ປະກອບມີ: ປາເອີນ, ປາດຸກ, ປາຕະພຽນ, ປາເກັດແລບ, ປາອີ່ສົບ, ປາໄນ ພ້ອມນີ້ ກໍ່ໄດ້ກຳນົດເອົາຈຸດເຂດດັ່ງກ່າວເປັນເຂດວັງສະຫງວນຂອງປາ ໂດຍກໍານົດໃຫ້ບ້ານດັ່ງກ່າວເປັນຜູ້ຄຸ້ມຄອງໂດຍມີຄວາມຍາວແຕ່ຈຸດເໜືອຫາຈຸດໃຕ້ ມີທັງໜົດ 1.500 ແມັດ,ຄວາມກ້ວາງຂອງວັງສະຫງວນທັງສອງຟາກຝັງ 40 ແມັດ, ລວມເນື້ອທີ່ວັງສະຫງວນມີທັງໜົດ 75,000 ຕາແມັດ ນອກຈາກນີ້ ໃນພິທີຍັງໄດ້ ມີກິດຈະກຳປູກຕົ້ນໄມ້ ຕາມແຄມແມ່ນໍ້າມີ້ ໃນຈຸດບໍລິເວນວັງສະຫງວນຂອງປາ ເຊັ່ນຕົ້ນດູ່ລາຍ, ຕົ້ນແຕ້ຂ່າ ຈຳນວນ 100 ກ່ວາຕົ້ນ.
ຈຸດປະສົງ ໃນການປ່ອຍປາ ປູກຕົ້ນໄມ້ ແລະ ການບວດວັງສະຫງວນປາ ໃນຄັ້ງນີ້ ເພື່ອເປັນການຕ້ອນຮັບວັນອະນຸລັກສັດນ້ຳສັດປ່າແຫ່ງຊາດ ທີ່ຈະມາເຖິງ ແລະ ເພື່ອອານຸລັກຮັກສາ ປ່າໄມ້ ລະບົບນິເວນໃຫ້ມີຄວາມສົມດູນ ແລະ ຊະນິດພັນປາ ສັດນໍ້າຊະນະນິດອື່ນໆ ໃຫ້ຍຶນຍົງຢູ່ກັບແຫຼ່ງນໍ້າທຳມະຊາດຕະຫຼອດໄປ ເພື່ອຮັບປະກັນໃຫ້ແກ່ການຄຸ້ມຄອງແຫຼ່ງທີ່ຢູ່ອາໃສ ບ່ອນວາງໄຂ່ ແລະ ບ່ອນແຜ່ພັນຂອງປາຊະນິດພັນປາ ລວມທັງສັດນໍ້າຊະນິດອື່ນ ໄດ້ຢ່າງມີປະສິດທິຜົນ, ເພື່ອຢຸດຕິການໃຊ້ເຄື່ອງມືຫາປາແບບດັບສູນ ເຊັ່ນ: ການນໍາໃຊ້ໄຟຟ້າຊ໊ອດປາ, ການນຳໃຊ້ລະເບີດ ແລະ ວັດຖຸອື່ນໆ ເພື່ອບັນລຸຄາດໝາຍ ໃຫ້ແກ່ການວາງໄຂ່ ຂອງຊະນິດພັນປາ ທີ່ຂື້ນມາປະສົມພັນ ແລະ ວາງໄຂ່ໃຫ້ມີຜົນສຳເລັດຫຼາຍຂື້ນ.
Editor: ນັກຂ່າວເມືອງຊາວໜຸ່ມແຂວງ
