ໃນທ້າຍອາທິດຜ່ານມານີ້ ຢູ່ທີ່ເມືອງບົວລະພາ ແຂວງຄໍາມ່ວນ ໜ່ວຍພັກຈັດຕັ້ງເມືອງບົວລະພາ ໄດ້ຈັດກອງປະຊຸມດຳເນີນຊີວິດການເມືອງປັບປຸງພາຍໃນໜ່ວຍຂຶ້ນ ໂດຍການເປັນປະທານຂອງສະຫາຍ ສະຫວັດດີ ຄຳລ້ອມ ຫົວໜ້າຄະນະໂຄສະນາອົບຮົມເມືອງ ເລຂາໜ່ວຍພັກຈັດຕັ້ງ, ເຂົ້າຮ່ວມມີສະຫາຍ ທອງສຸກ ຫັດຕະນາກ, ປະທານກວດກາພັກ-ລັດເມືອງ ພ້ອມດ້ວຍບັນດາສະຫາຍ ເລຂາ-ຮອງເລຂາໜ່ວຍພັກ ແລະ ສະມາຊິກພັກພາຍໃນໜ່ວຍ ເຂົ້າຮ່ວມ.
ໃນພິທີສະຫາຍ ສະຫວັດດີ ຄໍາລ້ອມ, ຫົວໜ້າຄະນະໂຄສະນາອົບຮົມເມືອງ ເລຂາໜ່ວຍພັກຈັດຕັ້ງເມືອງ ກໍ່ໄດ້ກ່າວເປີດພິທີ ແລະ ໄດ້ຜ່ານເອກກະສານປັບປຸງຄຸນທາດການເມືອງ, ສິນທຳປະຕິວັດ ໃຫ້ໄດ້ຮັບຮູ້ ແລະ ເຊື່ອມຊຶມ ຈາກນັ້ນ ສະຫາຍ ທອງສຸກ ຫັດຕະນາກ ປະທານກວດກາພັກ-ລັດເມືອງ ກໍ່ໄດ້ຜ່ານເອກະສານ ຄຳສັ່ງຂອງກົມການເມືອງ ສູນກາງພັກ ສະບັບເລກທີ 01/ກມສພ, ລົງວັນທີ 3 ມັງກອນ 2018 ວ່າດ້ວຍການເພີ່ມທະວີ ການກໍ່ສ້າງໜ່ວຍພັກປອດໃສ ເຂັ້ມແຂງ, ໜັກແໜ້ນ ແລະ ເອກະສານ ແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 291/ຄຈສພ, ລົງວັນທີ 26 ເມສາ 2018 ວ່າດ້ວຍການເພີ່ມທະວີວຽກງານ ກໍ່ສ້າງໜ່ວຍພັກປອດໃສ ເຂັ້ມແຂງ, ໜັກແໜ້ນ. ໃນໂອກາດດຽວກັນສະຫາຍ ພົງສະຫວັນ ສີສະຫວາດ ຮອງປະທານກວດກາພັກ-ລັດເມືອງ ກໍ່ໄດ້ຜ່ານບົດສໍາຫຼວດການຊີ້ນຳ-ນຳພາລວມຂອງໜ່ວຍພັກ ໃນໄລຍະຜ່ານມາ ຈົນເຖິງປັດຈຸບັນ. ຈາກນັ້ນ ສະມາຊິກພັກແຕ່ລະສະຫາຍພາຍໃນໜ່ວຍ ກໍ່ໄດ້ພ້ອມກັນຄົ້ນຄ້ວາປະກອບຄຳຄິດເຫັນພາຍໃນໜ່ວຍພັກ ພ້ອມທັງທາບທາມລົງຄະແນນສຽງຄວາມເຊື່ອໝັ້ນໄວ້ວາງໃຈຕໍ່ບຸກຄົນ, ຄະນະພັກ ແລະ ສະມາຊິກພັກ ເພື່ອເຮັດໃຫ້ບົດສຳຫຼວດດັ່ງກ່າວໄດ້ມີເນື້ອໃນ ແລະ ຄວາມໝາຍທີ່ໜັກແໜ້ນ.
ໃນຕອນທ້າຍຂອງກອງປະຊຸມສະຫາຍ ທອງສຸກ ຫັດຕະນາກ ກໍ່ໄດ້ໂອ້ລົມ ເຫັນດີເປັນເອກະພາບ ຕໍ່ກັບ ບົດສະຫລຸບ ແລະ ການປະກອບຄຳຄິດເຫັນ ເພື່ອກໍ່ສ້າງປັບປຸງ ປົວແປງ ພາຍໃນໜ່ວຍພັກຈັດຕັ້ງ ໃຫ້ເປັນໜ່ວຍພັກແຂງຮູ້ນຳພາ ແລະ ສະຫາຍ ຍັງໄດ້ຮຽກຮ້ອງໃຫ້ບັນດາສະມາຊິກພັກ ພາຍໃນໜ່ວຍພັກຈັດຕັ້ງແຕ່ລະຫ້ອງການໃຫ້ມີຄວາມຮັບຜິດຊອບໃນວຽກງານວິຊາສະເພາະຂອງຕົນເອງ ແລະ ເພີ່ມຄວາມເປັນເຈົ້າການໃນການປະຕິບັດ ໜ້າທີ່ວຽກງານໃນແຕ່ລະຂົງເຂດ, ເໜັ້ນໜັກປະຕິບັດລະບອບຮ່ວມຊີວິດພັກຂອງໜ່ວຍພັກ, ການເສຍເງິນສະຕິບໍາລຸງພັກປະຈໍາເດືອນໃຫ້ເປັນປົກກະຕິ ແລະ ຕ້ອງມີບົດສະຫຼຸບຂອງໜ່ວຍພັກທຸກໆເດືອນ.

Editor: ນັກຂ່າວເມືອງບົວລະພາ