ເມືອງປາກລາຍ, ແຂວງໄຊຍະບູລີ ຈັດພິທີປ່ອຍປາ ເນື່ອງໃນໂອກາດວັນອານຸລັກສັດນ້ຳ-ສັດປ່າແຫ່ງຊາດ ເຊີ່ງໄດ້ຈັດຂື້ນໃນຕອນເຊົ້າຂອງວັນທີ່ 13 ກໍລະກົດ 2018 ທີ່ເດີ່ນທ່າເຮືອໃຫຍ່ຂອງເມືອງ ໂດຍການໃຫ້ກຽດເຂົ້າຮ່ວມຂອງທ່ານ ບຸນລັບ ແສງອາພອນ, ກໍາມະການພັກແຂວງ ເລຂາພັກເມືອງ ເຈົ້າເມືອງໆປາກລາຍ, ມີບັນດາຫົວໜ້າຮອງຫົວໜ້າຫ້ອງການ, ນັກທຸລະກິດຜູ້ປະກອບການ, ອຳນາດການປົກຄອງບ້ານ, ພະນັກງານ, ທະຫານ-ຕຳຫຼວດ ພໍ່ແມ່ປະຊາຊົນເຂົ້າຮ່ວມ.
ການຈັດພິທີປ່ອຍປາໃນຄັ້ງນີ້ ເພື່ອເປັນການອານຸລັກປົກປັກຮັກສາສັດນ້ໍາ-ສັດປ່າ ບໍ່ໃຫ້ສູນພັນ ເຮັດໃຫ້ສັດນ້ຳ-ສັດປ່ານາໆຊະນິດ ມີການຂະຫຍາຍຕົວ ທັງປົກຮັກສາສະພາບແວດລ້ອມຂອງແມ່ນ້ຳ ແລະ ປ່າໄມ້ ໃຫ້ມີຄວາມອຸດົມສົມບູນ ສະເພາະຢູ່ເມືອງປາກລາຍ ນຳປາມາປ່ອຍໃນປີນີ້ມີ ທັງໝົດ 137.500 ໂຕ. ເຊີ່ງຈະແບ່ງໃຫ້ບັນດາເຂດກຸ່ມບ້ານປອ່ຍຕາມເຂດວັງສະຫງວນ, ອ່າງຊົນລະປະທານ, ຫວຍນໍ້າຕ່າງໆພາຍໃນຂອບເຂດທົ່ວເມືອງ ສະເພາະ ປາ ທີ່ນໍາມາປ່ອຍລົງນ້ໍາຂອງ ຈຸດທ່າເຮືອເມືອງປາກລາຍຄັ້ງນີ້ ມີທັງໝົດ 50.000 ໂຕເຊີ່ງປະກອບມີ:ປານີນ, ປາໄນ, ປາກີນຫຍ້າ, ປາເກດແລບ ແລະ ປາອິນເດຍ ນອກຈາກນີ້ ຍັງໄດ້ປອຍນົກຈຳນວນໜື່ງ.
ໂອກາດດັ່ງກ່າວທ່ານ ບຸນລັບ ແສງອາພອນ ເຈົ້າເມືອງໆປາກລາຍ ກໍ່ໄດ້ຮຽກຮ້ອງມາຍັງພະນັກງານ ທະຫານ ຕໍາຫຼວດ ພໍ່ຄ້າຊາວຂາຍ ນັກທຸລະກິດຕະຫຼອດເຖິງອໍານາດການປົກຄອງ ພໍ່ແມ່ປະຊາຊົນບັນດາເຜົ່າພາຍໃນເມືອງ ຈົ່ງພ້ອມກັນຮັບຮູ້ຜົນເສຍຫາຍຈາກການປຽ່ນແປງທໍາມະຊາດໃນໄລຍະຜ່ານມາ ສໍາລັບໃນໄລຍະຕໍ່ໜ້ານີ້ ຈົ່ງພ້ອມກັນເປັນເອກະພາບທາງດ້ານທັດສະນະ ທາງດ້ານແນວຄິດເອກະພາບກັນທາງດ້ານຂໍ້ກໍານົດລະບຽບກົດໝາຍ ແລະ ນິຕິກໍາຕ່າງໆທີ່ພັກ ແລະ ລັດໄດ້ກໍານົດອອກ ຈົ່ງພ້ອມກັນມີສະຕິເຄົາລົບ ທັງເຮັດໜ້າທີ່ໂຄສະນາເຜີຍແຜ່ສືກສາອົບຮົມ ປຸກລະດົມຂົນຂວາຍ ໃຫ້ທຸກພາກສ່ວນ ຕ້ອງເປັນເຈົ້າການປະຕິບັດການປົກປັກຮັກສາສະພາບແວດລ້ອມ ປົກປັກຮັກສາສັດນໍ້າ-ສັດປ່ານາໆພັນ ໃຫ້ນັບມື້ນັບຂະຫຍາຍຕົວ ແນໃສ່ຄວາມອຸດົມສົມບູນ ແລະ ຮັ່ງມີທາງດ້ານທໍາມະຊາດຊີວະນານາໆພັນໄວໃຫ້ເຊັ່ນລູກເຊັ່ນຫຼານສືບຕໍ່ໄປ ເພາະວ່າວຽກງານປົກປັກຮັກສາສະພາບແວດລ້ອມ ແລະ ປົກປັກຮັກສາສັດນໍ້າ-ສັດປ່ານາໆພັນແມ່ນວຽກງານຂອງທົ່ວປວງຊົນ ພ້ອມດຽວກັນນີ້ ກໍ່ຕ້ອງພ້ອມກັນເປັນເຈົ້າການໃນການສະກັດກັ້ນການລ່າສັດນໍ້າ-ສັດປ່າແບບດັບສູນ ເປັນຕົ້ນ: ໃຊ້ໝໍ້ຊ໋ອດປາ, ລະເບີດ ແລະ ອາວຸດລາເນື້ອແບບດັບສູນຕ່າງໆຢ່າງເດັດຂາດ ທັງນີ້ ເພື່ອຮັບປະກັນການຕອບສະໜອງທາງດ້ານຄຸນປະໂຫຍດຕໍ່ມວນມະນຸດຂອງພວກເຮົາ ເຊິ່ງມີຄວາມຕ້ອງການບັນຫາຊີ້ນປາ ໃນແຕ່ລະວັນ ໃຫ້ມີຄວາມອຸດົມສົມບູນຕະຫຼອດໄປ.
ຈາກນັ້ນ ບັນດາຜູ້ເຂົ້າຮ່ວມກໍ່ໄດ້ພ້ອມກັນຕັດແຜບຜ່າ ລັ່ນຄ້ອງ 9 ບາດ ພ້ອມທັງປ່ອຍປາ ແລະ ນົກຄືນສູ່ທໍາມະຊາດຢ່າງເປັນຂະບວນຟົດຟື້ນ
Editor: ນັກຂ່າວຊາວໜຸ່ມນະຄອນໄກສອນ
