ອາທິດຜ່ານມານີ້; ຢູ່ທີ່ເມືອງ ອາດສະພັງທອງ ແຂວງສະຫວັນນະເຂດ ໄດ້ຈັດກອງປະຊຸມຝຶກອົບຮົມກ່ຽວກັບວຽກງານຫາງສຽງສັງຄົມ ພາຍໃນເມືອງ. ໂດຍການເຂົ້າຮ່ວມເປັນປະທານຂອງທ່ານ ບຸນແກດ ຫອມພະມາໄລ ປະທານແນວລາວສ້າງຊາດ ທັງເປັນປະທານຊີ້ນໍາວຽກງານຕິດຕາມຫາງສຽງສັງຄົມຂັ້ນເມືອງ, ທ່ານ ແກ້ວອຸດອນ ແກ້ວດວງດີ ຮອງຫົວໜ້າຄະນະໂຄສະນາອົບຮົມແຂວງສະຫວັນນະເຂດ, ມີຫົວໜ້າ, ຮອງຫົວໜ້າຫ້ອງການ, ທະຫານ, ຕໍ່ຫຼວດ, ເລຂາຄະນະພັກຮາກຖານ, ເລຂາພັກບ້ານ, ນາຍບ້ານໃນເທດສະບານເມືອງເຂົ້າຮ່ວມ.
ໃນພິທີໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນ ແລະ ຄວາມແຕກຕ່າງກັນຂອງວຽກງານຫາງສຽງສັງຄົມ, ບົດບາດຂອງຫາງສຽງສັງຄົມ ແລະ ການນໍາໃຊ້ຫາງສຽງສັງຄົມຮັບໃຊ້ໃນວຽກງານການເມືອງ-ແນວຄິດ, ວຽກງານຫາງສຽງສັງຄົມ ແມ່ນການສັງເກດຕີລາຄາ ແລະ ການປະເມີນຜົນບັນດາເຫດການ ປະກົດການທີ່ເກີດຂຶ້ນໃນສັງຄົມທັງພາຍໃນ ແລະ ຕ່າງປະເທດ ທີ່ພົວພັນເຖິງຜົນປະໂຫຍດອັນລວມ ແລະ ອັນສະເພາະໃດໜຶ່ງ, ຫາງສຽງສັງຄົມ ອາດຈະປະກອບດ້ວຍຫຼາຍຄໍາຄິດເຫັນທີ່ຄ້າຍຄືກັນ, ແຕກຕ່າງກັນ, ກົງກັນຂ້າມກັນ ແລະ ສົ່ງຜົນກະທົບໃນຂອບເຂດວົງກວ້າງແຄບແຕກຕ່າງກັນ. ການເກັບກໍາຫາງສຽງສັງຄົມຄວນເອົາໃຈໃສ່ຫາງສຽງທີ່ສົ່ງຜົນກະທົບຕໍ່ແນວທາງຂອງພັກ, ແຜນພັດທະນາເສດຖະກິດ-ສັງຄົມຂອງລັດ ແລະ ຕໍ່ຜົນປະໂຫຍດລວມຂອງປະຊາຊົນ, ຫາງສຽງສັງຄົມແຍກຕາມຄູ່ມາດຕາເກນແມ່ນກ່ຽວກັບບ້ານເມືອງ, ບັນຫາສາດສະໜາ ແລະ ເຜົ່າຊົນ ບັນຫາສິ່ງແວດລ້ອມການດໍາລົງຊີວິດ, ບັນຫາເສດຖະກິດ-ສັງຄົມ ແລະ ບັນຫາສາກົນອື່ນໆ.
ນອກຈາກນັ້ນ; ໃນພິທີ ທ່ານ ແກ້ວອຸດອນ ແກ້ວດວງດີ ຮອງຫົວໜ້າຄະນະໂຄສະນາອົບຮົມແຂວງສະຫວັນນະເຂດ ກໍ່ໄດ້ເຜີຍແຜ່ຄໍາແນະນໍາຂອງຄະນະໂຄສະນາອົບຮົມສູນກາງພັກ ກ່ຽວກັບການເພີ່ມທະວີວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມໃນໄລຍະໃໝ່ຕື່ມອີກດ້ວຍ.

Editor: ນັກຂ່າວເມືອງອາດສະພັງທອງ