ເພື່ອເປັນການຕິດຕາມ, ກວດກາ ແລະ ປະເມີນຜົນ ຂອງການຈັດຕັ້ງປະຕິບັດວຽກງານຊາວໜຸ່ມ-ເຍົາວະຊົນ ທົ່ວເມືອງ ໃນໄລຍະ 5 ປີຜ່ານມາ ເພື່ອໃຫ້ໄດ້ຕາມຄາດໝາຍສູ້ຊົນຕາມໂຄງການດຳເນີນງານ ຂອງຄະນະບໍລິຫານງານຊາວໜຸ່ມແຂວງ ແລະ ຄະນະບໍລິຫານງານຊາວໜຸ່ມເມືອງໄດ້ວາງໄວ້. ດັ່ງນັ້ນ ໃນເມື່ອບໍ່ດົນນີ້, ຢູ່ທີ່ເມືອງເຊບັ້ງໄຟ ແຂວງຄໍາມ່ວນ ຄະນະບໍລິຫານງານຊາວໜຸ່ມແຂວງ ໄດ້ລົງເຄື່ອນໄຫວຈັດກອງປະຊຸມເຜີຍແຜ່ບາງນິຕິກຳຕ່າງໆ ກໍ່ຄືການລົງຊຸກຍູ້, ຕິດຕາມ ແລະ ຕີລາຄາໝາກຜົນຂອງວຽກງານ ໂດຍການນໍາພາຂອງ ສະຫາຍ ນາງ ວົງພະຈັນ ສີບຸນເຮືອງ ເລຂາຄະນະບໍລິຫານງານຊາວໜຸ່ມແຂວງ, ເຂົ້າຮ່ວມມີຄະນະປະຈຳພັກເມືອງ, ຄະນະບໍລິຫານງານຊາວໜຸ່ມເມືອງ ພ້ອມດ້ວຍເລຂາໜ່ວຍຊາວໜຸ່ມອ້ອມຂ້າງເມືອງເຂົ້າຮ່ວມ.
ທ່ານ ອືງສິດ ນິມິດບັນຊາ ເລຂາຄະນະບໍລິຫານງານຊາວໜຸ່ມເມືອງ ໄດ້ຜ່ານບົດລາຍງານການຈັດຕັ້ງປະຕິບັດວຽກງານຊາວໜຸ່ມ-ເຍົາວະຊົນທົ່ວເມືອງ ເຊິ່ງທ່ານໄດ້ຍົກໃຫ້ເຫັນບາງຜົນງານທີ່ທາງຄະນະບໍລິຫານງານຊາວໜຸ່ມເມືອງໄດ້ພ້ອມກັນສຸ່ມໃສ່ຈັດຕັ້ງປະຕິບັດຕາມໂຄງການ ແລະ ແຜນງານທີ່ໄດ້ກຳນົດໄວ້ ໂດຍສະເພາະວຽກງານສຶກສາອົບຮົມການເມືອງ-ນຳພາແນວຄິດ, ວຽກງານປັບປຸງການຈັດຕັ້ງຕະຫຼອດໄລຍະ 5 ປີຜ່ານມາ ໄດ້ພ້ອມກັນຂະຫຍາຍສະມາຊິກຊາວໜຸ່ມ, ເຍົາວະຊົນ ແລະ ອະນຸຊົນ ເຂົ້າເຄື່ອນໄຫວໃນອົງການເພີ່ມຂຶ້ນເປັນກ້າວໆມາ, ນອກນັ້ນ ຍັງໄດ້ນໍາພາສະມາຊິກຊາວໜຸ່ມ-ເຍົາວະຊົນ ເຂົ້າຮ່ວມຂະບວນການຕ່າງໆຢ່າງເປັນປົກກະຕິ, ຕໍ່ເນື່ອງ ແລະ ເປັນຂະບວນຟົດຟື້ນ.
ໃນໂອກາດດັ່ງກ່າວສະຫາຍ ເລຂາຄະນະບໍລິຫານງານຊາວໜຸ່ມແຂວງ ໄດ້ຜ່ານບາງນິຕິກໍາທີ່ກ່ຽວຂ້ອງ ເພື່ອເປັນທິດໃນການຈັດຕັ້ງປະຕິບັດໃຫ້ບັນລຸຕາມຄາດໝາຍສູ້ຊົນທີ່ວາງໄວ້ ເຊິ່ງທ່ານຍັງໄດ້ເນັ້ນໜັກບາງບັນຫາໃຫ້ຄະນະຊາວໜຸ່ມເມືອງ ພ້ອມດ້ວຍສະມາຊິກຊາວໜຸ່ມໃນທົ່ວເມືອງ ຈະຕ້ອງໄດ້ພ້ອມກັນປັບປຸງໃຫ້ທັນກັບສະພາບການ ຄື: ຕ້ອງໄດ້ເອົາໃຈໃສ່ ແລະ ກຳແໜ້ນໄດ້ຕໍ່ນິຕິກຳຕ່າງໆ ເພື່ອສຶກສາອົບຮົມການເມືອງ-ແນວຄິດ ໃຫ້ສະມາຊິກຊາວໜຸ່ມ-ເຍົາວະຊົນຢ່າງທົ່ວເຖິງ, ແກ້ໄຂບັນຫາທີ່ພົບເຫັນໃຫ້ທວງທັນກັບສະພາບການ ໂດຍສະເພາະຕົວເລກຄາດໝາຍສູ້ຊົນຂອງການຂະຫຍາຍສະມາຊິກຊາວໜຸ່ມ, ເຍົາວະຊົນ ແລະ ອະນຸຊົນ, ຕົວເລກການດຳເນີນກອງປະຊຸມໃຫຍ່ຂັ້ນໜ່ວຍຊາວໜຸ່ມຂອງຕົນ ໃຫ້ໄດ້ຄາດໝາຍສູ້ຊົນທີ່ກຳນົດໄວ້, ສຸມໃສ່ຕໍ່ຂະບວນແຂ່ງຂັນ 4 ບຸກໃຫ້ໜັກແໜ້ນ-ເຂັ້ມແຂງ ຮັບປະກັນໄດ້ປະລິມານ ແລະ ຄຸນນະພາບ ຂອງວຽກງານ ເພື່ອພ້ອມກັນປະກາດເປັນເມືອງ ຄະນະຊາວໜຸ່ມ 4 ບຸກ ປີທີ 2 ແລະ ປີທີ 3 ໃນທ້າຍປີ 2018 ນີ້ ເພື່ອສ້າງເງື່ອນໄຂໃຫ້ແກ່ການເປີດກອງປະຊຸມໃຫຍ່ຜູ້ແທນຊາວໜຸ່ມທົ່ວເມືອງເຊບັ້ງໄຟ ໃຫ້ບັນລຸຜົນເປັນຈິງເປັນກ້າວໆ.

Editor: ນັກຂ່າວຊາວໜຸ່ມແຂວງຄຳມ່ວນ