ໃນວັນທີ 12 ກໍລະກົດ ທີ່ຜ່ານມາ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ໄດ້ຈັດງານແຂ່ງຂັນ ໄອຊີທີລາວ 2017 ທີ່ນະຄອນຫຼວງວຽງຈັນ ຊຶ່ງເປັນກຽດເຂົ້າຮ່ວມຂອງ ທ່ານ ບຸນສະເຫລີມໄຊ ເຄນນາວົງ, ຮອງລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ພ້ອມດ້ວຍແຂກທີ່ຖືກເຊີນ ຈາກບັນດາກະຊວງ, ອົງການທຽບເທົ່າ, ບໍລິສັດທາງດ້ານໄອທີ, ທະນາຄານ, ຫົວໜ່ວຍທຸລະກິດ ແລະ ສະຖາບັນສຶກສາຕ່າງໆເຂົ້າຮ່ວມ.
ງານແຂ່ງຂັນ ໄອຊີທີລາວ 2017 ແມ່ນການແຂ່ງຂັນນໍາສະເໜີຜະລິດຕະພັນໄອຊີທີ ຂອງຜູ້ເຂົ້າແຂ່ງຂັນທັງໝົດ 10 ທິມ ທີ່ແບ່ງອອກເປັນ 6 ໝວດ ຄື: ໝວດກ່ຽວກັບພາກລັດ, ໝວດກ່ຽວກັບພາກເອກະຊົນ, ໝວດເພື່ອສັງຄົມ, ໝວດເນື້ອໃນດີຈີຕອນ, ໝວດບໍລິສັດສ້າງຕັ້ງໃໝ່ ດ້ານໄອຊີທີ ແລະ ໝວດຄົ້ນຄວ້າ-ພັດທະນາ ດ້ານໄອທີ.
ການຈັດການແຂ່ງຂັນ ໄອຊີທີລາວ ກໍ່ເປັນແຜນງານໜຶ່ງ ທີ່ນອນໃນແຜນພັດທະນາ ຂະແໜງການໄປສະນີ ໂທລະຄົມມະນາຄົມ ແລະ ການສື່ສານ ທີ່ຄະນະພັກກະຊວງໄປສະນີ ໂທລະຄົມມະນາຄົມ ແລະ ການສື່ສານ ກໍ່ໄດ້ໃຫ້ບູລິມະສິດ ໃນການຈັດຕັ້ງປະຕິບັດ ເພາະເຫັນໄດ້ເຖິງຄວາມສຳຄັນຂອງການແຂ່ງຂັນດັ່ງກ່າວ ຊຶ່ງມັນບໍ່ພຽງແຕ່ສົ່ງເສີມການແຂ່ງຂັນ ໃນການພັດທະນາດ້ານໄອຊີທີ ເທົ່ານັ້ນ ແຕ່ມັນຍັງເປັນການເປີດໂອກາດໃຫ້ແກ່ ນັກພັດທະນາໄອຊີທີຮຸ້ນໃໝ່ ຫຼື ບໍລິສັດໄອທີຊີລາຍໃໝ່ ຫຼື ທີ່ເອິ້ນວ່າ ສະຕາດ ອັບ Start Up ໄດ້ສ້າງຊື່ສຽງ ແລະ ຄວາມໜ້າເຊື່ອຖືໃຫ້ແກ່ສັງຄົມລາວ ຫຼື ກ້າວໄປໄກສູ່ລະດັບສາກົນ. ການປະກວດຄັ້ງນີ້ ຈະໄດ້ຮັບບູລິມະສິດ ໃນການເຂົ້າປະກວດການແຂ່ງຂັນໄອຊີທີລະດັບອາຊຽນ ທີ່ປະເທດກຳປູເຈຍໃນທ້າຍປີນີ້.
Editor: ດາວໄຊ ສີວິໄລ
