ຕອນບ່າຍ ວັນທີ 11 ມິຖຸນາ 2018 ນີ້ ທ່ານ ພັນໂທ ແສງປະເສີດ ສຸທຳມະວົງ ຮອງຫົວໜ້າກົມສື່ສານ ກະຊວງ ປ້ອງກັນຄວາມສະຫົງບ ໄດ້ລົງຊີ້ນໍາວຽກງານສື່ສານດ້ວຍລະບົບທັນສະໄໝ ຢູ່ ປກສ ແຂວງ ບໍລິຄໍາໄຊ ເປັນກຽດເຂົ້າຮ່ວມໂດຍ ທ່ານ ພັນເອກ ທອງໃບ ລໍວັນໄຊ ຫົວໜ້າ ກອງບັນຊາການ ປກສ ແຂວງ ບໍລິຄຳໄຊ, ມີຄະນະກອງບັນຊາການ, ບັນດາຄະນະຫ້ອງ, ກອງພັນປ້ອງກັນເຄື່ອນທີ່, ຄ້າຍຄຸມຂັງ-ດັດສ້າງ, ໂຮງຮຽນ ປກສ ຊັ້ນຕົ້ນເລກ 4, ປກສ ເມືອງ 7 ຕົວເມືອງ, ພ້ອມດ້ວຍພະນັກງານວິຊາສະເພາະສື່ສານ ເຂົ້າຮ່ວມ.
ທ່ານ ພັນໂທ ແສງປະເສີດ ສຸທຳມະວົງ ຮອງຫົວໜ້າກົມສື່ສານ ກະຊວງ ປ້ອງກັນຄວາມສະຫົງບ ໄດ້ກ່າວວ່າ: ວຽກງານສື່ສານເປັນວຽກງານໜື່ງທີ່ສຳຄັນຂອງກຳລັງປ້ອງກັນຄວາມສະຫງົບ, ເຊິ່ງເປັນເສນາທິການໃຫ້ແກ່ຄະນະພັກ, ຄະນະບັນຊາທຸກຂັ້ນ, ເອົາໃຈໃສ່ໃນການຕິດຕາມ, ກວດກາ ແລະ ສະກັດກັ້ນການເຄື່ອນໄຫວທີ່ບໍ່ຖືກຕ້ອງຂອງພວກກຸ່ມຄົນບໍ່ດີ ທີ່ຫວັງມ້າງເພທຳລາຍຄວາມສະຫົງບ, ຄວາມເປັນລະບຽບຮຽບຮ້ອຍໃນສັງຄົມ, ສະນັ້ນ ເພື່ອເປັນການປັບປຸງໃຫ້ກໍາລັງເລົ່າຮົບວິຊາສະເພາະສື່ສານຂອງກຳລັງປ້ອງກັນຄວາມສະຫງົບໃນຂອບເຂດທົ່ວປະເທດ ເວົ້າລວມເວົ້າສະເພາະກໍ່ຄືວຽກງານສື່ສານຢູ່ກອງບັນຊາການ ປກສ ແຂວງ ບໍລິຄຳໄຊ ໄດ້ນຳໃຊ້ອຸປະກອນທີ່ທັນສະໄໝເຂົ້້າໃນວຽກງານດັ່ງກ່າວໃຫ້ມີຄວາມສະດວກວ່ອງໄວ ແລະ ທັນສະໄໝຂື້ນກວ່າເກົ່າ ເພື່ອຕອບສະໜອງໃຫ້ແກ່ຫນ້າທີ່ວຽກງານການເມືອງ ແລະ ການປະຕິບັດວຽກງານວິຊາສະເພາະຂອງກຳລັງປ້ອງກັນຄວາມສະຫງົບໃນໄລຍະໃໝ່ໃຫ້ມີການເຕີບໃຫຍ່ຂະຫຍາຍຕົວ ແລະ ທັນສະໄໝຂື້ນເລື້ອຍໆ ສະນັ້ນ ທາງກົມສື່ສານ ກະຊວງ ປກສ ຈຶ່ງໄດ້ນຳເອົາອຸປະກອນຮັບໃຊ້ເຂົ້າໃນວຽກງານສື່ສານດ້ວຍລະບົບທັນສະໄໝ ມາປະກອບໃຫ້ແກ່ ກຳລັງສື່ສານຂອງກອງບັນຊາການ ປກສ ແຂວງບໍລິຄຳໄຊ ເພື່ອຕິດຕັ້ງ ແລະ ນຳໃຊ້ໃນ 8 ຈຸດ, ມີຈຳນວນ 235 ເຄື່ອງ, ມີ 2 ຊະນິດ ຄື: ຊະນິດ ພີດີ ເຈັດແປດແປດ PD 788 ຈໍານວນ 80 ເຄື່ອງ, ພີດີ ຫົກແປດແປດ PD 688 ຈຳນວນ 155 ເຄື່ອງ, ຄອມພິວເຕີໂນດບຸກ 1 ເຄື່ອງ, ປິ່ນເຕີສີ 1 ເຄື່ອງ, ໂດຍນໍາໃຊ້ເຊື່ອມຕໍ່ກັບລະບົບເຄື່ອຂ່າຍອິນເຕີເນັດ 4G, ຈາກນັ້ນ ບັນດາຄະນະທີ່ມາຈາກກົມສື່ສານກະຊວງ ປກສ ກໍ່ໄດ້ອະທິບາຍວິທີການຕິດຕັ້ງ, ການນໍາໃຊ້ ອຸປະກອນສື່ສານດ້ວຍລະບົບທີ່ທັນສະໄໝ, ການຄຸ້ມຄອງ ແລະ ວິທີການປົກປັກຮັກສາໃຫ້ຖືກຕ້ອງພ້ອມໃຊ້ງານຕະຫຼອດເວລາ.
ຕອນທ້າຍ ທ່ານ ພັນເອກ ທອງໃບ ລໍວັນໄຊ ຫົວໜ້າກອງບັນຊາການ ປກສ ແຂວງ ກໍໄດ້ກ່າວສະແດງຄຳຂອບໃຈມາຍັງທ່ານ ພັນໂທ ແສງປະເສີດ ສຸທຳມະວົງ ຮອງຫົວໜ້າກົມສື່ສານ ກະຊວງ ປ້ອງກັນຄວາມສະຫົງບ ທີ່ໄດ້ນຳເອົາອຸປະກອນນຳໃຊ້ເຂົ້າໃນວຽກງານສື່ສານດ້ວຍລະບົບທີ່ທັນສະໄໝ ມາປະກອນໃຫ້ກຳລັງສື່ສານຂອງ ກອງບັນຊາການ ປກສ ແຂວງ ບໍລິຄຳໄຊໃນຄັ້ງນີ້, ແລະ ໄດ້ເໜັ້ນໜັກໃຫ້ຄະພັກຄະນະບັນຊາທຸກຂັ້ນ ພ້ອມດ້ວຍພະນັກງານ-ນັກຮົບ ຜູ້ທີ່ເຮັດວຽກງານສື່ສານທຸກສະຫາຍຈົ່ງພ້ອມກັນ ເພີ່ມທະວີຄວາມຮັບຜິດຊອບໃນການເຮັດໜ້າທີ່ວຽກງານ ແລະ ເອົາໃຈໃສ່ຄົ້ນຄ້ວາຮ່ຳຮຽນການນຳໃຊ້ເຄື່ອງມື ແລະ ອຸປະກອນວຽກງານສື່ສານດ້ວຍລະບົບທີ່ທັນສະໄໝໃຫ້ຖືກວິທີ, ເພື່ອຮັບປະກັນຮັກສາໄດ້ຄວາມລັບ ໃນການປະຕິບັດໜ້າທີ່ວຽກງານວິຊາສະເພາະຢ່າງຖືກຕ້ອງ ສອດຄ່ອງກັບສະພາບການຕົວຈິງໃນປະຈຸັນ ກໍ່ຄືສະເພາະໜ້າ ແລະ ຍາວນານ, ເອົາໃຈໃສ່ປົກປັກຮັກສາຄຸ້ມຄອງອຸປະກອນດັ່ງກ່າວໃຫ້ຢູ່ໃນສະພາບທີ່ດີ ແລະ ສາມາດນຳໃຊ້ເຂົ້າໃນວຽກງານວິຊາສະເພາະໄດ້ຍາວນານ.
Editor: ປກສ ແຂວງບໍລິຄຳໄຊ
